ജഗജ്ജനനിയായ പരാശക്തിയുടെ ആരാധനയ്ക്ക് ഏറ്റവും വിശേഷപ്പെട്ട ദിവസങ്ങളാണ് നവരാത്രി കാലം. ഭക്തജനങ്ങൾ ആചരിച്ചു വരുന്ന നാല് വ്യത്യസ്തത നവരാത്രികളുണ്ട്. ചൈത്ര നവരാത്രി, ആഷാഢ നവരാത്രി, ആശ്വിന നവരാത്രി, മാഘ നവരാത്രി എന്നിവയാണവ. ഇവയിൽ ചൈത്ര(മീനം), ആശ്വിന(കന്നി/തുലാം) നവരാത്രികൾ മുഖ്യ നവ രാത്രികളെന്നും മാഘ(മകരം), ആഷാഢ(കർക്കടകം) നവരാത്രികൾ ഗുപ്ത നവരാത്രികൾ എന്നും അറിയപ്പെടുന്നു. ആശ്വിന നവരാത്രിയെ ശാരദാ നവരാത്രിയെന്നും ചൈത്ര നവരാത്രിയെ ലളിതാ നവരാത്രിയെ ന്നും മാഘ നവരാത്രിയെ ശ്യാമളാ നവരാത്രിയെന്നും ആഷാഢ നവരാ ത്രിയെ വാരാഹി നവരാത്രിയെന്നും ദേവ്യുപാസകർ വിശേഷിപ്പിക്കുന്നു.
ഭാരതമൊട്ടാകെ ഏറ്റവുമധികം ആഘോഷങ്ങളോടെ ആചരിക്കപ്പെടുന്നതു ശാരദാനവരാത്രിയാണ്. മറ്റു മൂന്നു നവരാത്രികളും ഉപാസകർ വിധിപ്രകാരമുള്ള ജപധ്യാനാദികളോടെ ആചരിക്കുന്നു. വ്രതശുദ്ധിയോടെ ഈ ഒൻപത് ദിവസങ്ങൾ ചെലവഴിക്കുന്നതിലൂടെ വിശ്വാസികൾക്ക് ശാരീരികവും മാനസികവുമായ ഊർജ്ജം ലഭിക്കും.
പുരാണങ്ങൾ അനുസരിച്ച് വിധിപ്രകാരം നവരാത്രി പൂജ ചെയ്യേണ്ടത് ശരൽക്കാലത്തിലും വസന്തകാലത്തിലുമാകുന്നു. ഈ രണ്ട് ഋതുക്കളും കാലദംഷ്ട്രകൾ എന്ന പേരിലാണ് അറിയപ്പെടുന്നത്. രോഗങ്ങളും മരണവും അധികമായ കാലഘട്ടമാകയാൽ ചൈത്ര, ആശ്വിന മാസങ്ങളിലെ ശുക്ലപക്ഷ പ്രഥമ മുതൽ ഒൻപതു ദിവസം നവരാത്രി വ്രതമനുഷ്ഠിക്കേണ്ടതാണ് എന്ന് ദേവീഭാഗവതപുരാണത്തിൽ പറയുന്നു.
ഹൈന്ദവ കലണ്ടർ പ്രകാരം വർഷത്തിലെ ആദ്യ മാസമായ ചൈത്രം ആ ത്മീയമായും പ്രകൃതിപരമായും ഏറെ പ്രാധാന്യമർഹിക്കുന്ന ഒന്നാണ്. ചൈത്രമാസത്തിലെ ശുക്ലപക്ഷ പ്രതിപദ ദിവസമാണ് ‘യുഗാദി അഥവാ പുതു വർഷമായി ഭാരതത്തിന്റെ പല ഭാഗങ്ങളിലും ആഘോഷിക്കുന്നത്; ബ്രഹ്മാവ് പ്രപഞ്ചസൃഷ്ടി ആരംഭിച്ചത് ഈ ദിനത്തിലാണെന്നാണ് സങ്കല്പം.
ചൈത്രമാസത്തിലെ ശുക്ലപക്ഷ പ്രതിപദ മുതൽ നവമി വരെയുള്ള ഒൻപത് ദിവസങ്ങളിൽ ആചരിക്കുന്ന പുണ്യമായ ഉത്സവമാണ് ചൈത്ര നവരാത്രി. വസന്തകാലത്തിന്റെ വരവറിയിച്ചുകൊണ്ട് എത്തുന്നതിനാൽ ഇതിനെ ‘വസന്ത നവരാത്രി’ എന്നും വിളിക്കുന്നു. ഹൈന്ദവ വിശ്വാസമ നുസരിച്ച് ശക്തി ആരാധനയ്ക്കും ആത്മിയ ശുദ്ധീകരണത്തിനും ഏ റ്റവും അനുയോജ്യമായ സമയമാണിത്. പ്രകൃതി പുനർജനിക്കുന്ന ഈ കാലയളവിൽ ഭഗവതിയെ ഭജിക്കുന്നത് ജീവിതത്തിൽ ഐശ്വര്യവും മനഃശാന്തിയും പ്രദാനം ചെയ്യുന്നു.
ഈ വർഷത്തെ (2026) ചൈത്ര നവരാത്രി മാർച്ച് 19-ന് ആരംഭിച്ച് മാർ ച്ച് 27-ന് അവസാനിക്കുന്നു. ആശ്വിന നവരാത്രിയിലെന്നപോലെ ചൈത്ര നവരാത്രിയിലെ ഒൻപത് ദിവസങ്ങളിലും ആദിപരാശക്തിയുടെ ഒൻ പത് ഭാവങ്ങളെ (നവദുർഗ്ഗകൾ) ആരാധിക്കുന്ന പതിവാണ് ഉത്തരഭാര ത്തിൽ മുഖ്യമായുള്ളത്. ശൈലപുത്രി, ബ്രഹ്മചാരിണി, ചന്ദ്രഘണ്ട, കൂഷ്മാണ്ഡ, സ്കന്ദമാത, കാത്യായനി, കാളരാത്രി, മഹാഗൗരി, സിദ്ധിദാത്രി എന്നീ ഭാവങ്ങളിൽ ഈ ദിവസങ്ങളിൽ ഭഗവതി ഭക്തരെ അനുഗ്രഹി ക്കുന്നു. ഓരോ ദിവസവും ഓരോ പ്രത്യേക നിറത്തിലുള്ള വസ്ത്ര ങ്ങൾ ധരിച്ചും വിശിഷ്ടമായ നിവേദ്യങ്ങൾ സമർപ്പിച്ചും ഭക്തർ വ്രതമ നുഷ്ഠിക്കുന്നു.
ചൈത്ര നവരാത്രികാലത്ത് ദക്ഷിണഭാരതത്തിലെ ഭക്തർ (വിശിഷ്യാ ലളിതോപാസകർ) ലളിതാ സഹസ്രനാമവും ലളിതാ ത്രിശതിയും ശ്രീവിദ്യാ മന്ത്രവും ജപിച്ചുകൊണ്ടും ലളിതോപാഖ്യാനം പാരായണം ചെയ്തുകൊണ്ടും കാമാക്ഷി-ലളിതാംബികാ രൂപത്തിലുള്ള ദേവിയെ ഉപാസിക്കുന്നു. ഈ ദിവസങ്ങളിൽ ലളിതാ സഹസ്രനാമാവലിയാൽ ദേവിക്ക് കുങ്കുമാർച്ചന നടത്തുന്നതും വിശേഷമാണ്. ഓരോ ദിവസവും ദേവിക്ക് പ്രിയപ്പെട്ട പൂക്കൾ (പ്രധാനമായും താമര, തെച്ചി, ചെമ്പരത്തി തുടങ്ങിയവ) സമർപ്പിച്ച് ആരാധിക്കുന്നത് ഉപാസനയെ കൂടുതൽ ധന്യമാക്കും.
ചൈത്ര നവരാത്രിയുടെ ഒൻപതാം ദിവസം ‘രാമനവമി’ ആയി ആ ഘോഷിക്കുന്നു എന്നതാണ് ഈ ഉത്സവത്തിന്റെ മറ്റൊരു പ്രത്യേകത. മര്യാദാപുരുഷോത്തമനായ ശ്രീരാമചന്ദ്രന്റെ ജന്മദിനമാണിത്. അതിനാൽ തന്നെ ചൈത്ര നവരാത്രിക്കാലം ‘രാമ നവരാത്രി’ എന്നും വിളിക്കപ്പെടുന്നു. നവമി ദിവസം വ്രതമെടുക്കുന്നതും ശ്രീരാമപൂജചെയ്യുന്നതും രാമായണ പാരായണം നടത്തുന്നതും അതിവ പുണ്യകരമാണ്.
നവരാത്രികാലത്തെ ദേവോപാസന മനുഷ്യന്റെ അന്തർഗതമായ വാസനകളെയും വികാരങ്ങളെയും ശുദ്ധീകരിക്കുന്ന ഒരു മനശ്ശാസ്ത്രപരമായ പ്രക്രിയയുമാണ്. കാമ, ക്രോധ, ലോഭ, മോഹ, മദ, മാത്സര്യങ്ങൾ ദേവിയുടെ കൃപയാൽ പരിവർത്തനം ചെയ്യാൻ സാധിക്കുന്നു. അതുകൊണ്ടു തന്നെ നവരാത്രികാലത്തെ ആരാധന ആത്മപരിവർത്തനത്തിന്റെ മാർഗ്ഗം മാത്രമല്ല, മറിച്ച് ചിത്ത ശുദ്ധീകരണത്തിലൂടെ മോക്ഷസാക്ഷാത്കാരത്തിലേക്ക് നയിക്കുന്ന ദിവ്യസാധന കൂടിയാണ്.
2026 ലെ ചൈത്ര നവരാത്രി മാർച്ച് 19 മുതൽ മാർച്ച് 27 വെള്ളിയാഴ്ചവരെയാണ്. മാർച്ച് 19 രാവിലെ 6 .53 മുതൽ ആണ് ചൈത്ര ശുക്ല പക്ഷ പ്രഥമ തുടങ്ങുന്നത്. മാർച്ച് 27 വെള്ളിയാഴ്ചയാണ് മഹാനവമി.
സുകേഷ് വൈഖരി
ഫോൺ : +91 86063 35299
