കണ്ണന്റെ പുഞ്ചിരിയും ഓടക്കുഴലിന്റെ നാദവും മനസിൽ നിറയ്ക്കുന്ന പുണ്യദിനമാണ് അഷ്ടമിരോഹിണി. ലോകരക്ഷാർഥം മഹാവിഷ്ണുവിന്റെ എട്ടാമത്തെ അവതാരമായി ഭഗവാൻ ശ്രീകൃഷ്ണൻ ഭൂമിയിൽ അവതരിച്ച ദിനത്തിന്റെ ഓർമ പുതുക്കുന്ന ഈ ദിവസം ഭക്തർ ഏറെ പ്രാധാന്യത്തോടെയാണ് ആചരിക്കുന്നത്. ഈ വർഷത്തെ അഷ്ടമിരോഹിണി സെപ്റ്റംബർ 4 വെള്ളിയാഴ്ചയാണ്.
അഷ്ടമിരോഹിണി ദിനത്തിൽ വ്രതം അനുഷ്ഠിച്ച് ഭഗവാനെ പ്രാർഥിക്കുന്നവരുടെ ആഗ്രഹങ്ങൾ ശ്രീകൃഷ്ണൻ സാധിച്ചുതരുമെന്നാണ് വിശ്വാസം. ദേവന്മാർ വ്രതാനുഷ്ഠാനം നടത്തിയതിന്റെ ഫലമായാണ് ലോകധർമ സംരക്ഷണത്തിനായി മഹാവിഷ്ണു കൃഷ്ണാവതാരം പൂണ്ടതെന്നാണ് വിശ്വാസം. അതുകൊണ്ടുതന്നെ ആ മഹാവ്രതത്തിന്റെ സ്മരണ പുതുക്കുക കൂടിയാണ് അഷ്ടമിരോഹിണി വ്രതം.
ദ്വാപരയുഗത്തിൽ ഭദ്രപാദ മാസത്തിലെ കൃഷ്ണപക്ഷ അഷ്ടമി തിഥിയിൽ രോഹിണി നക്ഷത്രത്തിലാണ് ശ്രീകൃഷ്ണൻ അവതരിച്ചതെന്നാണ് വിശ്വാസം. കേരളത്തിൽ അഷ്ടമിയും രോഹിണിയും ചേർന്നുവരുന്ന ദിനമാണ് പൊതുവെ അഷ്ടമിരോഹിണി അഥവാ ശ്രീകൃഷ്ണ ജയന്തിയായി ആഘോഷിക്കുന്നത്. എന്നാൽ ഭാരതത്തിലെ മറ്റ് പല പ്രദേശങ്ങളിലും, പ്രത്യേകിച്ച് ഉത്തരേന്ത്യയിൽ, അഷ്ടമി തിഥിക്കാണ് ജന്മാഷ്ടമി ആചരിക്കുന്നത്.
തലേന്ന് വൈകുന്നേരം മുതൽ വ്രതം
അഷ്ടമിരോഹിണിയുടെ തലേന്ന് സൂര്യാസ്തമയം മുതലാണ് വ്രതം ആരംഭിക്കേണ്ടത്. അത്താഴത്തിന് അരിയാഹാരം ഉൾപ്പെടെയുള്ള ധാന്യഭക്ഷണങ്ങൾ പൂർണമായും ഒഴിവാക്കുന്നതാണ് ആചാരം. പകരം പഴവർഗങ്ങളോ പാലോ കഴിക്കാം. ആരോഗ്യസ്ഥിതിക്ക് അനുസരിച്ച് പിറ്റേന്ന് ഒരിക്കലോടെ ഭക്ഷണം കഴിച്ചോ, ലഘുഭക്ഷണം മാത്രം കഴിച്ചോ വ്രതം അനുഷ്ഠിക്കാം.
വ്രതദിനത്തിൽ കഴിയുന്നത്ര സമയം ഭഗവൽസ്മരണയിൽ ചെലവഴിക്കുന്നത് ഉത്തമമാണ്. ഭഗവാന്റെ മൂലമന്ത്രങ്ങൾ ജപിക്കുന്നതും ശ്രേഷ്ഠമായി കണക്കാക്കുന്നു.
‘ഓം നമോ നാരായണായ’ എന്ന അഷ്ടാക്ഷരമന്ത്രവും ‘ഓം നമോ ഭഗവതേ വാസുദേവായ’ എന്ന ദ്വാദശാക്ഷരമന്ത്രവുമാണ് പ്രധാന മൂലമന്ത്രങ്ങൾ.
സാധിക്കുമെങ്കിൽ ശ്രീകൃഷ്ണ ക്ഷേത്രത്തിൽ ദർശനം നടത്തി വഴിപാടുകൾ സമർപ്പിക്കാം. പാൽപ്പായസം പ്രധാന വഴിപാടുകളിലൊന്നാണ്. ഉണ്ണിയപ്പം, നെയ്യപ്പം, ഇളനീർ, വെണ്ണ നിവേദ്യം എന്നിവയും വിശേഷമാണ്. പ്രത്യേകിച്ച് ഉണ്ണിക്കണ്ണന് വെണ്ണ നിവേദിക്കുന്നത് ഏറെ പ്രധാനമായി കരുതുന്നു.
അർധരാത്രി വരെ കണ്ണനെ ഭജിക്കാം
ശ്രീകൃഷ്ണന്റെ അവതാരസമയം അർധരാത്രിയാണെന്നാണ് വിശ്വാസം. അതിനാൽ അർധരാത്രി വരെ ഭഗവൽസ്മരണയിലും ശ്രീകൃഷ്ണകഥകളുടെ പാരായണത്തിലും മുഴുകുന്നത് ഉത്തമമാണ്.
അഷ്ടമിരോഹിണി ദിവസം ഭാഗവതം പാരായണം ചെയ്യുന്നതും ഭക്തിയോടെ ശ്രവിക്കുന്നതും ജന്മാന്തര പാപങ്ങൾ അകറ്റുമെന്നാണ് വിശ്വാസം. വിഷ്ണു സഹസ്രനാമം, ഹരിനാമകീർത്തനം, ഭഗവദ്ഗീത, നാരായണീയം, ശ്രീകൃഷ്ണ കർണാമൃതം, കൃഷ്ണഗാഥ തുടങ്ങിയവയും പാരായണം ചെയ്യാം.
അഷ്ടഗോപാല മന്ത്രങ്ങൾ ഓരോന്നും 41 തവണ ജപിക്കുന്നത് സദ്ഫലം നൽകുമെന്നും വിശ്വാസമുണ്ട്.
ആഗ്രഹങ്ങൾക്കനുസരിച്ച് ഗോപാലമന്ത്ര ജപം
അഷ്ടമിരോഹിണി ദിവസം സന്താന ഗോപാലമന്ത്രം ജപിക്കുന്നത് വിശേഷമാണ്. മന്ത്രോപദേശമുള്ളവർക്ക് രാജഗോപാല മന്ത്രവും ജപിക്കാം. മന്ത്രോപദേശം ലഭിച്ചവർക്കും ഇല്ലാത്തവർക്കും ‘ഓം നമോ നാരായണായ’ എന്ന അഷ്ടാക്ഷരി മന്ത്രം ജപിക്കാവുന്നതാണ്.
ജാതകവശാൽ ആയുസ്സിന് മാന്ദ്യമുള്ളവർ ആയുർഗോപാലമന്ത്രം ജപിക്കുന്നത് ഉത്തമമായി കരുതുന്നു. വിദ്യാഭ്യാസ പുരോഗതിക്കും വിദ്യാവിജയത്തിനും വിദ്യാഗോപാല മന്ത്രം ജപിക്കാം.
വിദ്യാർത്ഥികളും പഠിതാക്കളും ഹയഗ്രീവമൂർത്തിയെ ഉപാസിക്കണമെന്നാണ് വിശ്വാസം. അഷ്ടമിരോഹിണി നാളിൽ ‘ഹയഗ്രീവ ഗോപാല മന്ത്രം’ ജപിക്കുന്നതും വിശേഷമാണ്.
സന്താന ഗോപാല, രാജഗോപാല മന്ത്രങ്ങൾ ഉപയോഗിച്ച് അഷ്ടമിരോഹിണി നാളിൽ ശ്രീകൃഷ്ണ പ്രതിഷ്ഠയുള്ള ക്ഷേത്രത്തിൽ പൂജ നടത്തുന്നതും ശ്രേഷ്ഠമായി കണക്കാക്കുന്നു. അതുപോലെ ആയുർഗോപാലമന്ത്രം, വിദ്യാഗോപാലമന്ത്രം, ഹയഗ്രീവ ഗോപാലമന്ത്രം എന്നിവ ഉപയോഗിച്ച് അർച്ചനകളും നടത്താം.
പിറ്റേന്ന് വ്രതം അവസാനിപ്പിക്കാം
അഷ്ടമിരോഹിണി വ്രതം പിറ്റേന്ന് പുലർച്ചെ ശ്രീകൃഷ്ണ ക്ഷേത്രദർശനം നടത്തിയ ശേഷം പാരണവീടുന്നതാണ് ആചാരം. ക്ഷേത്രത്തിലെത്തി തീർഥം സേവിച്ചും വ്രതം അവസാനിപ്പിക്കാം. തുളസിവെള്ളം സേവിക്കുന്നതും ആചാരപരമായി ചെയ്യാവുന്നതാണ്.
അഷ്ടമിരോഹിണി ദിനത്തിൽ തുളസിത്തൈ നടുന്നതും കൃഷ്ണക്ഷേത്രങ്ങളിൽ തുളസീഹാരം സമർപ്പിക്കുന്നതും വിശേഷമായി കണക്കാക്കുന്നു.
അങ്ങനെ ഭഗവാന്റെ അവതാരസ്മരണയിൽ മനസ്സും ശരീരവും സമർപ്പിച്ച്, മന്ത്രജപത്തോടെയും പാരായണത്തോടെയും ക്ഷേത്രദർശനത്തോടെയും അഷ്ടമിരോഹിണി ആചരിക്കാം. ആചാരങ്ങളും വ്രതരീതികളും വിശ്വാസങ്ങളും ഓരോ കുടുംബത്തിനും സമ്പ്രദായത്തിനും അനുസരിച്ച് വ്യത്യാസപ്പെടാം. എന്നാൽ ഭക്തിയോടെയും ശുദ്ധമായ മനസ്സോടെയും ഉണ്ണിക്കണ്ണനെ സ്മരിക്കുന്നതാണ് ഈ പുണ്യദിനത്തിന്റെ കാതൽ.
