ബെംഗളൂരു: ഓടിക്കൊണ്ടിരിക്കുന്ന ട്രെയിനിൽ വെച്ച് കുഞ്ഞിന് പെട്ടെന്നുണ്ടായ ആരോഗ്യപ്രശ്നം പരിഭ്രാന്തിയിലാഴ്ത്തിയ ഒരു കുടുംബത്തിന് തുണയായി ഇന്ത്യൻ റെയിൽവേ. ഭാവന എന്ന ദന്തഡോക്ടർക്കും കുടുംബത്തിനുമാണ് റെയിൽവേ ജീവനക്കാർ താങ്ങായത്.
യാത്രയ്ക്കിടയിൽ മുരിങ്ങയ്ക്ക സൂപ്പ് കഴിച്ചതിനെത്തുടർന്ന് ഭാവനയുടെ കുഞ്ഞിന് അസ്വസ്ഥത അനുഭവപ്പെടുകയും തുടർച്ചയായി ഛർദ്ദിക്കാൻ തുടങ്ങുകയും ചെയ്തു. പരിചിതമല്ലാത്ത സാഹചര്യത്തിൽ എന്തുചെയ്യണമെന്നറിയാതെ മാതാപിതാക്കൾ പകച്ചുപോയ നിമിഷമായിരുന്നു അത്. വിവരമറിഞ്ഞ ഉടൻ തന്നെ ട്രെയിനിലെ ജീവനക്കാർ സഹായവുമായെത്തി. അടുത്ത സ്റ്റേഷനിൽ തന്നേ ഡോക്ടറുടെ സേവനവും റെയിൽവേ ഉറപ്പാക്കി. പരിശോധനയ്ക്ക് ശേഷം ആവശ്യമായ മരുന്നുകൾ നൽകിയതോടെ കുഞ്ഞിന്റെ ആരോഗ്യനില മെച്ചപ്പെട്ടു. റെയിൽവേ ജീവനക്കാരുടെ ഈ പെട്ടെന്നുള്ള നീക്കവും കരുതലും തങ്ങളെ വലിയൊരു അപകടത്തിൽ നിന്നും ആശ്വാസത്തിലേക്ക് നയിച്ചുവെന്ന് ഭാവന ഇൻസ്റ്റാഗ്രാമിൽ പങ്കുവെച്ച വീഡിയോയിൽ പറയുന്നു.
സോഷ്യൽ മീഡിയയിൽ പങ്കുവെച്ച ഈ വീഡിയോ ഇതിനോടകം തന്നെ നിരവധി പേരുടെ ശ്രദ്ധ പിടിച്ചുപറ്റിയിട്ടുണ്ട്. ഇന്ത്യൻ റെയിൽവേയുടെ സേവനമനോഭാവത്തെ പ്രകീർത്തിച്ച് നിരവധി കമന്റുകളാണ് വീഡിയോയ്ക്ക് താഴെ വരുന്നത്.
