കുവൈറ്റ് സിറ്റി: പ്രവാസി വിദ്യാർത്ഥികളുടെയും രക്ഷിതാക്കളുടെയും കാത്തിരിപ്പിന് ഒടുവിൽ ജെഇഇ മെയിൻ 2026 സെഷൻ 2 പരീക്ഷയ്‌ക്ക് കുവൈറ്റിൽ കേന്ദ്രം അനുവദിച്ചു. സാല്‍മിയ ബ്ലോക്ക് 10ല്‍ ഉള്ള ബ്രിട്ടണ്‍ അക്കാദമിയെയാണ് പരീക്ഷാ കേന്ദ്രമായി എൻ.ടി.എ ഔദ്യോഗികമായി സ്ഥിരീകരിച്ചത്.
കുവൈറ്റിൽ പരീക്ഷാ കേന്ദ്രം അനുവദിക്കണമെന്ന് ആവശ്യപ്പെട്ട് വലിയ തോതിലുള്ള ഇടപെടലുകളാണ് കഴിഞ്ഞ ആഴ്ചകളിൽ നടന്നത്. ഭാരതീയ പ്രവാസി പരിഷത്ത് (BPP) കുവൈറ്റ്, കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന് കഴിഞ്ഞ ആഴ്ച നേരിട്ട് നിവേദനം നൽകിയിരുന്നു. കുവൈറ്റിലെ നൂറുകണക്കിന് വിദ്യാർത്ഥികൾക്ക് പരീക്ഷ എഴുതാൻ നാട്ടിലേക്ക് പോകേണ്ടി വരുന്ന ബുദ്ധിമുട്ട് ചൂണ്ടിക്കാട്ടിയുള്ള ഇടപെടലിനെ തുടര്‍ന്നാണ് പരീക്ഷാ കേന്ദ്രം അനുവദിച്ച് ഇപ്പോൾ സിറ്റി ഇൻറ്റിമേഷൻ സ്ലിപ്പുകൾ പുറത്തിറക്കിയിരിക്കുന്നത്.
ഏപ്രിൽ 2 മുതൽ 8 വരെയാണ് പരീക്ഷകൾ നടക്കുക. ഏപ്രിൽ 2, 4, 5, 6, 8 തീയതികളിൽ ജെഇഇ മെയിൻ പരീക്ഷകളും, ഏപ്രിൽ 7-ന് പേപ്പർ 2 പരീക്ഷയും നടക്കും. കുവൈറ്റിൽ നിന്നും ദുബായിൽ നിന്നും രജിസ്റ്റർ ചെയ്ത വിദ്യാർത്ഥികൾക്ക് ഇപ്പോൾ തങ്ങളുടെ സിറ്റി ഇൻറ്റിമേഷൻ സ്ലിപ്പുകൾ എൻ.ടി.എ വെബ്സൈറ്റിൽ നിന്നും ഡൗൺലോഡ് ചെയ്യാം.
ബഹ്‌റൈനിൽ നിന്നുള്ള വിദ്യാർത്ഥികളുടെ പരീക്ഷാ കേന്ദ്രം സംബന്ധിച്ച കാര്യത്തിൽ ഇന്ത്യൻ എംബസിയുമായി ചേർന്ന് എൻ.ടി.എ നടപടികൾ പൂർത്തിയാക്കി വരികയാണ്. പരീക്ഷാ നഗരങ്ങളിൽ മാറ്റം ആഗ്രഹിക്കുന്നവർക്ക് എൻ.ടി.എ ഹെൽപ്പ് ലൈൻ നമ്പറിലോ ഇമെയിൽ വഴിയോ ബന്ധപ്പെടാവുന്നതാണ്. കൂടുതൽ അപ്‌ഡേറ്റുകൾക്കായി ഔദ്യോഗിക വെബ്സൈറ്റുകൾ പരിശോധിക്കാൻ എൻ.ടി.എ നിർദ്ദേശിച്ചിട്ടുണ്ട്. അലോട്ട് ചെയ്ത പരീക്ഷാ നഗരങ്ങളിൽ മാറ്റം ആഗ്രഹിക്കുന്നവർക്ക് എൻ.ടി.എയുടെ ഹെൽപ്പ് ലൈൻ നമ്പറിലോ ഇമെയിൽ വഴിയോ ബന്ധപ്പെടാവുന്നതാണ്.
