ന്യൂഡല്ഹി: ഇന്ത്യന് റെയില്വേയുടെ സ്വപ്ന പദ്ധതിയായ ബുള്ളറ്റ് ട്രെയിന് യാഥാര്ത്ഥ്യത്തിലേക്ക്. പൂര്ണ്ണമായും ഇന്ത്യയില് നിര്മ്മിക്കുന്ന ആദ്യ അതിവേഗ ബുള്ളറ്റ് ട്രെയിന് ‘B28’ (BHARATH MADE BULLET) 2027 മാര്ച്ചോടെ പുറത്തിറക്കാന് റെയില്വേ മന്ത്രാലയം ലക്ഷ്യമിടുന്നു. ബെംഗളൂരുവിലെ പൊതുമേഖലാ സ്ഥാപനമായ ബി.ഇ.എം.എല് ആണ് ഈ ട്രെയിനുകള് നിര്മ്മിക്കുന്നത്. ചെന്നൈ ആസ്ഥാനമായുള്ള ഇന്റഗ്രല് കോച്ച് ഫാക്ടറി നല്കിയ കരാര് പ്രകാരം രണ്ട് അതിവേഗ ട്രെയിന് സെറ്റുകളുടെ രൂപകല്പ്പനയും നിര്മ്മാണവും പുരോഗമിക്കുകയാണ്.
മുംബൈ-അഹമ്മദാബാദ് ബുള്ളറ്റ് ട്രെയിന് ഇടനാഴിയുടെ ഭാഗമായ സൂറത്ത് മുതല് വാപി വരെയുള്ള 97 കിലോമീറ്റര് പാതയിലായിരിക്കും ആദ്യമായി സര്വീസ് നടത്തുക. 2027 ഓഗസ്റ്റില് ഈ റൂട്ടില് സര്വീസ് ആരംഭിക്കാനാണ് റെയില്വേയുടെ തീരുമാനം. ജപ്പാനില് നിന്നുള്ള ഷിന്കാന്സെന് ട്രെയിനുകള് ലഭ്യമാക്കുന്നതിലെ വെല്ലുവിളികള് കണക്കിലെടുത്താണ് ഇന്ത്യ സ്വന്തം നിലയ്ക്ക് ട്രെയിനുകള് നിര്മ്മിക്കാന് തീരുമാനിച്ചത്.
മണിക്കൂറില് 280 കിലോമീറ്റര് വേഗത്തിലാണ് ട്രെയിന് ഡിസൈന് ചെയ്തിരിക്കുന്നത്. എന്നാല് ആദ്യഘട്ടത്തില് മണിക്കൂറില് 250 കിലോമീറ്ററില് വേഗത്തിലായിരിക്കും ട്രെയിന് ഓടുക. ഒരു ട്രെയിന് സെറ്റില് 8 കോച്ചുകള് ഉണ്ടായിരിക്കും. ഒരു കോച്ചിന് ഏകദേശം 27.86 കോടി രൂപയാണ് നിര്മ്മാണച്ചെലവ്. രൂപകല്പ്പനയും പരീക്ഷണ സൗകര്യങ്ങള് ഉള്പ്പെടെ ഏകദേശം 866.87 കോടി രൂപയാണ് കരാര് തുക.
പൂര്ണ്ണമായും എയര്കണ്ടീഷന് ചെയ്ത ‘ചെയര് കാര്’ രീതിയിലുള്ള കോച്ചുകളാണ് B28ല് ഉണ്ടാവുക. യാത്രക്കാര്ക്ക് മികച്ച യാത്രാനുഭവം നല്കുന്നതിനായി ആവശ്യാനുസരണം തിരിക്കാവുന്നതും പുറകോട്ട് ചരിക്കാവുന്നതുമായ റൊട്ടേറ്റബള് സീറ്റുകള്, യാത്രക്കാര്ക്ക് വിനോദത്തിനായി ഓണ്ബോര്ഡ് സ്ക്രീനുകള്, ശാരീരിക പരിമിതികളുള്ള യാത്രക്കാര്ക്കായി പ്രത്യേക സൗകര്യങ്ങള്, വൈ-ഫൈ, ജിപിഎസ് അധിഷ്ഠിത വിവരശേഖരണ സംവിധാനം തുടങ്ങിയവയും ഉണ്ടായിരിക്കും.
2027-ന്റെ ആദ്യ പാദത്തില് പുറത്തിറങ്ങുന്ന ട്രെയിന്, വിപുലമായ സുരക്ഷാ പരിശോധനകള്ക്കും ട്രയല് റണ്ണുകള്ക്കും ശേഷമായിരിക്കും പൊതുജനങ്ങള്ക്കായി തുറന്നുകൊടുക്കുക. അതിവേഗ റെയില് ശൃംഖലയില് സ്വയംപര്യാപ്തത കൈവരിക്കാനുള്ള ഇന്ത്യയുടെ നീക്കത്തിലെ നിര്ണ്ണായക ചുവടുവെപ്പാണിത്.
