മലയാള സിനിമയിലെ എക്കാലത്തെയും വലിയ ഹിറ്റ് ഫ്രാഞ്ചൈസിയായ ‘ദൃശ്യം’ മൂന്നാം ഭാഗത്തിന്റെ മുഴുവന് ഡിജിറ്റല് അവകാശങ്ങളും ആമസോണ് പ്രൈം സ്വന്തമാക്കി. ചിത്രത്തിന്റെ സ്ട്രീമിംഗ് അവകാശങ്ങള് (SVOD, TVOT ഉള്പ്പെടെയുള്ളവ) തങ്ങള്ക്കാണെന്നും ഇതില് ഇടപെടാന് മറ്റാര്ക്കും അവകാശമില്ലെന്നും വ്യക്തമാക്കി ആമസോണ് സെല്ലര് സര്വീസസ് പ്രൈവറ്റ് ലിമിറ്റഡ് ഔദ്യോഗിക പ്രസ്താവന പുറത്തിറക്കി.
ആശിര്വാദ് സിനിമാസും ആമസോണും തമ്മിലുള്ള നിലവിലെ നിയമപരമായ കരാറുകള് പ്രകാരം ചിത്രത്തിന്റെ ഡിജിറ്റല് ഉടമസ്ഥാവകാശം ആമസോണിന് മാത്രമാണ്. ഈ അവകാശങ്ങള് വില്ക്കാനോ, ലൈസന്സ് നല്കാനോ ആശിര്വാദ് സിനിമാസിനോ മറ്റ് മൂന്നാം കക്ഷികള്ക്കോ അധികാരമില്ല. ആമസോണിന്റെ അനുമതിയില്ലാതെ സിനിമയുടെ ഡിജിറ്റല് അവകാശങ്ങളുമായി ബന്ധപ്പെട്ട ഏതെങ്കിലും തരത്തിലുള്ള ഇടപാടുകള് നടത്തിയാല് അതിന്റെ പൂര്ണ്ണ ഉത്തരവാദിത്തവും പ്രത്യാഘാതങ്ങളും ബന്ധപ്പെട്ടവര് തന്നെ അനുഭവിക്കേണ്ടി വരും.
കരാര് ലംഘിക്കുന്നവര്ക്കെതിരെ ഇന്ജംഗ്ഷന് ഉത്തരവുകളും നഷ്ടപരിഹാരവും ഉള്പ്പെടെയുള്ള കടുത്ത നിയമനടപടികള് സ്വീകരിക്കുമെന്നും പ്രസ്താവനയില് മുന്നറിയിപ്പ് നല്കുന്നു. നേരത്തെ ഏപ്രില് 2-ന് റിലീസ് ചെയ്യാനിരുന്ന ചിത്രം മെയ് 21-ലേക്ക് മാറ്റിയിരുന്നു. മോഹന്ലാലിന്റെ ജന്മദിനമായ മെയ് 21-ന് തന്നെ ചിത്രം തിയേറ്ററുകളില് എത്തിക്കാനാണ് അണിയറപ്രവര്ത്തകരുടെ തീരുമാനം.
ജിത്തു ജോസഫ് സംവിധാനം ചെയ്യുന്ന ഈ ഇന്വെസ്റ്റിഗേഷന് ത്രില്ലറില് മീന, അന്സിബ ഹസന്, എസ്തര് അനില്, ആശാ ശരത്, സിദ്ദിഖ് തുടങ്ങിയ വന് താരനിര അണിനിരക്കുന്നുണ്ട്. നിയമപോരാട്ടങ്ങളും ബിസിനസ് ഇടപാടുകളും വാര്ത്തകളില് നിറയുമ്പോഴും ജോര്ജുകുട്ടിയുടെയും കുടുംബത്തിന്റെയും പുതിയ നീക്കങ്ങള് കാണാനായി കാത്തിരിക്കുകയാണ് ആരാധകര്.
