ദുബായ്: അമേരിക്കയും ഇറാനും തമ്മിലുള്ള താല്ക്കാലിക വെടിനിര്ത്തലിന് പിന്നാലെ തന്ത്രപ്രധാനമായ ഹോര്മുസ് കടലിടുക്ക് വഴി ആദ്യ ഇന്ത്യന് കപ്പല് പുറത്തെത്തി. ‘ജഗ് വിക്രം’ എന്ന എല്പിജി ടാങ്കറാണ് ശനിയാഴ്ച പുലര്ച്ചെയോടെ ഈ മേഖല പിന്നിട്ടതെന്ന് കപ്പല് ഗതാഗത വിവരങ്ങള് സൂചിപ്പിക്കുന്നു. യുദ്ധസമാനമായ സാഹചര്യത്തെത്തുടര്ന്ന് അടച്ചിട്ടിരുന്ന ഈ ജലപാതയിലൂടെ വെടിനിര്ത്തലിന് ശേഷം കടന്നുപോകുന്ന ആദ്യ ഇന്ത്യന് പതാകവാഹിത കപ്പലാണിത്.
നിലവില് ഒമാന് ഉള്ക്കടലിലുള്ള കപ്പല് കിഴക്കന് ദിശയിലേക്ക് സഞ്ചരിച്ചുകൊണ്ടിരിക്കുകയാണ്. ഗ്രേറ്റ് ഈസ്റ്റേണ് ഷിപ്പിംഗ് കമ്പനിയുടെ ഉടമസ്ഥതയിലുള്ള ഈ കപ്പലിന് 26,000 ടണ്ണിലധികം ഭാരം വഹിക്കാനുള്ള ശേഷിയുണ്ട്. ഏകദേശം 20,000 ടണ് എല്പിജി കപ്പലിലുണ്ടെന്നാണ് സൂചന. മാര്ച്ചിലെ സംഘര്ഷം ആരംഭിക്കുമ്പോള് 28 ഇന്ത്യന് കപ്പലുകളാണ് ഹോര്മുസ് മേഖലയില് ഉണ്ടായിരുന്നത്. ജഗ് വിക്രം പുറത്തുകടന്നതോടെ ഇനി 15 ഇന്ത്യന് കപ്പലുകള് കൂടി സുരക്ഷിത പാതയ്ക്കായി കാത്തുനില്ക്കുന്നുണ്ട്.
നൂറുകണക്കിന് വിദേശ കപ്പലുകളും ഇപ്പോഴും പേര്ഷ്യന് ഗള്ഫ് മേഖലയില് കുടുങ്ങിക്കിടക്കുകയാണ്. ഇന്ത്യയുടെ ക്രൂഡ് ഓയില്, പ്രകൃതിവാതകം, എല്പിജി എന്നിവയുടെ പ്രധാന ഇറക്കുമതി പാതയാണ് ഹോര്മുസ് കടലിടുക്ക്. സംഘര്ഷം മൂലം ഈ പാത അടഞ്ഞത് ഇന്ത്യയിലെ ഇന്ധന വിതരണത്തെ ബാധിച്ചിരുന്നു. പാത തടസ്സപ്പെട്ടതിനെത്തുടര്ന്ന് ഹോട്ടലുകള്, റെസ്റ്റോറന്റുകള് തുടങ്ങിയ വാണിജ്യ ഉപഭോക്താക്കള്ക്കുള്ള എല്പിജി വിതരണത്തില് ഇന്ത്യ നേരത്തെ നിയന്ത്രണം ഏര്പ്പെടുത്തിയിരുന്നു. എന്നാല് ബദല് സംവിധാനങ്ങള് ഒരുക്കിയതോടെ വിതരണം സാധാരണ നിലയിലായിട്ടുണ്ട്.
രണ്ടാഴ്ചത്തെ ഉപാധികളോടെയുള്ള വെടിനിര്ത്തലിനാണ് അമേരിക്കയും ഇറാനും ധാരണയിലെത്തിയത്. ഇതോടെയാണ് കപ്പല് ഗതാഗതത്തിനായി കടലിടുക്ക് വീണ്ടും തുറന്നത്. വ്യവസായങ്ങള്ക്കുള്ള പ്രകൃതിവാതക വിതരണത്തിലും ഏര്പ്പെടുത്തിയിരുന്ന നിയന്ത്രണങ്ങള് ഘട്ടംഘട്ടമായി നീക്കി വരികയാണെന്ന് ഔദ്യോഗിക വൃത്തങ്ങള് അറിയിച്ചു.
