തിരുവനന്തപുരം: കേരളത്തിലെ ഉപഭോക്താക്കള്ക്ക് അധിക സാമ്പത്തിക ബാധ്യത വരുത്തിക്കൊണ്ട് പാല് വിലയില് ഉടന് വര്ധനവുണ്ടായേക്കും. ലിറ്ററിന് കുറഞ്ഞത് ആറ് രൂപയെങ്കിലും വര്ധിപ്പിക്കണമെന്ന ആവശ്യത്തില് ഉറച്ചുനില്ക്കുകയാണ് മില്മ. ഇതുസംബന്ധിച്ച അന്തിമ തീരുമാനം ഈ മാസം 29-ന് ചേരുന്ന മില്മ ഡയറക്ടര് ബോര്ഡ് യോഗത്തില് കൈക്കൊള്ളും. കാലിത്തീറ്റയുടെ അനിയന്ത്രിതമായ വിലക്കയറ്റവും പരിപാലന ചെലവ് വര്ധിച്ചതും കര്ഷകരെ കടുത്ത സാമ്പത്തിക ബുദ്ധിമുട്ടിലാക്കിയിരിക്കുകയാണ്. കര്ഷകരെ സഹായിക്കാന് വില വര്ധിപ്പിക്കുകയല്ലാതെ മറ്റ് മാര്ഗ്ഗങ്ങളില്ലെന്ന് മില്മ ചെയര്മാന് കെ.എസ് മണി വ്യക്തമാക്കി.
പാല് വില നിശ്ചയിക്കാന് മില്മയ്ക്ക് നിയമപരമായ അധികാരമുണ്ടെന്നും അദ്ദേഹം ഓര്മ്മിപ്പിച്ചു. വില വര്ധന നടപ്പിലാക്കാന് വൈകുന്നതിനെതിരെ മില്മയുടെ ഡയറക്ടര് ബോര്ഡ് അംഗങ്ങള് തന്നെ ആസ്ഥാനത്തിന് മുന്നില് പ്രതിഷേധവുമായി രംഗത്തെത്തിയിരുന്നു. പാല് വില വര്ധിക്കുന്നത് സാധാരണക്കാരുടെ കുടുംബ ബജറ്റിനെ താളംതെറ്റിക്കും. പാലിന് പുറമെ മറ്റ് പല മേഖലകളിലും വിലക്കയറ്റത്തിന് ഇത് കാരണമാകും. ചായ, കാപ്പി എന്നിവയ്ക്കും പാല് ഉപയോഗിച്ചുണ്ടാക്കുന്ന വിഭവങ്ങള്ക്കും വില കൂടും. തൈര്, വെണ്ണ, നെയ്യ്, പനീര് തുടങ്ങിയ അനുബന്ധ ഉല്പ്പന്നങ്ങളുടെ വിലയും കുത്തനെ ഉയര്ന്നേക്കാം.
മില്മ വില വര്ധനയുമായി മുന്നോട്ട് പോകാന് തീരുമാനിച്ചെങ്കിലും, സര്ക്കാരിന്റെ നിലപാട് കൂടി പരിഗണിച്ചാകും അന്തിമ പ്രഖ്യാപനം. ഉപഭോക്താക്കളെ പിണക്കാതെ കര്ഷകര്ക്ക് എങ്ങനെ ആനുകൂല്യം നല്കാം എന്നതിലാണ് ഇപ്പോള് ചര്ച്ചകള് പുരോഗമിക്കുന്നത്.
