തിരുവനന്തപുരം: പേരൂർക്കട ഊന്നാംപാറയിൽ ഇരുനില വീടിന് തീപിടിച്ചു. മാൻഷൻ പാം ഹിൽസ് ഫ്ലാറ്റ് സമുച്ചയത്തിന് സമീപം താമസിക്കുന്ന അരുൺ എസ്.എസ്. കുമാറിന്റെ ‘ശ്രീദക്ഷ’ എന്ന വീടാണ് അഗ്നിക്കിരയായത്. ഏകദേശം ഒരു വർഷം മാത്രം പഴക്കമുള്ള വീടിനാണ് ഇന്നലെ രാത്രിയോടെ തീപിടിച്ചത്.
വീടിന്റെ താഴത്തെ നിലയിലുള്ള അടുക്കള, വർക്ക് ഏരിയ, ഡൈനിംഗ് ഏരിയ എന്നിവ പൂർണ്ണമായും കത്തിനശിച്ചു. കനത്ത ചൂടിൽ മുകൾനിലയിലെ ഇലക്ട്രിക് ഉപകരണങ്ങൾക്കും ഗൃഹോപകരണങ്ങൾക്കും കേടുപാടുകൾ സംഭവിച്ചിട്ടുണ്ട്. പ്രാഥമിക നിഗമനമനുസരിച്ച് ഷോർട്ട് സർക്യൂട്ടാണ് തീപിടിത്തത്തിന് കാരണമായത്. വീടിനുള്ളിലെ ജിപ്സം ബോർഡുകളും തടി കൊണ്ടുള്ള പാനലിംഗും തീ അതിവേഗം പടരാൻ ഇടയാക്കി.
വിവരമറിഞ്ഞയുടൻ തിരുവനന്തപുരം അഗ്നിരക്ഷാ സേനയുടെ രണ്ട് യൂണിറ്റുകൾ സ്ഥലത്തെത്തി. ഏകദേശം രണ്ട് മണിക്കൂർ നീണ്ട പരിശ്രമത്തിനൊടുവിലാണ് തീ പൂർണ്ണമായും നിയന്ത്രണവിധേയമാക്കിയത്. വാഹനത്തിൽ നിന്നും സമീപത്തെ ഫ്ലാറ്റിൽ നിന്നും ഹോസുകൾ ഘടിപ്പിച്ചാണ് തീയണച്ചത്. ഏകദേശം 15 ലക്ഷം രൂപയുടെ നാശനഷ്ടം സംഭവിച്ചതായാണ് പ്രാഥമിക കണക്കുകൾ സൂചിപ്പിക്കുന്നത്. കൃത്യസമയത്ത് അഗ്നിരക്ഷാ സേനക്ക് ഇടപെടാൻ കഴിഞ്ഞതിനാൽ വലിയൊരു ദുരന്തം ഒഴിവാക്കാനായി. സംഭവത്തിൽ ആർക്കും പരിക്കേറ്റതായി റിപ്പോർട്ടുകളില്ല. പൊലീസ് സ്ഥലത്തെത്തി മേൽനടപടികൾ സ്വീകരിച്ചു.
