ന്യൂഡല്ഹി: നിരോധിത ലഹരിമരുന്ന് ഉപയോഗിച്ചെന്ന കണ്ടെത്തലിനെത്തുടര്ന്ന് പാകിസ്ഥാന് ഓള്റൗണ്ടര് മുഹമ്മദ് നവാസ് പാകിസ്ഥാന് ക്രിക്കറ്റ് ബോര്ഡിന്റെ (പി.സി.ബി) അന്വേഷണ നിഴലില്. ഇതോടെ ഇംഗ്ലണ്ടിലെ ടി20 ബ്ലാസ്റ്റ് ടൂര്ണമെന്റില് സറേ കൗണ്ടി ക്ലബ്ബിന് വേണ്ടി കളിക്കാനുള്ള നവാസിന്റെ കരാര് റദ്ദാക്കി. ഈ വര്ഷം നടന്ന ടി20 ലോകകപ്പിനിടെ ശേഖരിച്ച സാമ്പിളിലാണ് നവാസ് പോസിറ്റീവായതെന്ന് ഇ.എസ്.പി.എന് ക്രിക് ഇന്ഫോ റിപ്പോര്ട്ട് ചെയ്യുന്നു. ശ്രീലങ്കയില് നടന്ന ടൂര്ണമെന്റില് പാകിസ്ഥാന്റെ ഏഴ് മത്സരങ്ങളിലും 32-കാരനായ നവാസ് കളിച്ചിരുന്നു.
സൂപ്പര് എയിറ്റ് ഘട്ടത്തില് പാകിസ്ഥാന് പുറത്തായെങ്കിലും, ഏഴ് വിക്കറ്റുകളും 15 റണ്സും താരം നേടിയിരുന്നു. ഐ.സി.സി (അന്താരാഷ്ട്ര ക്രിക്കറ്റ് കൗണ്സില്) നല്കിയ വിവരത്തിന്റെ അടിസ്ഥാനത്തിലാണ് പി.സി.ബി ഇപ്പോള് അന്വേഷണം ആരംഭിച്ചിരിക്കുന്നത്. ‘ഐ.സി.സിയില് നിന്ന് ലഭിച്ച വിവരത്തിന്റെ അടിസ്ഥാനത്തില് പി.സി.ബി നടപടികള് ആരംഭിച്ചു കഴിഞ്ഞു. അന്വേഷണ റിപ്പോര്ട്ട് ഇന്ന് തന്നെ ഐ.സി.സിക്ക് കൈമാറും,’ പി.സി.ബി വക്താവ് വ്യക്തമാക്കി.
മെയ് 26 മുതല് ജൂലൈ 18 വരെ നടക്കുന്ന ടി20 ബ്ലാസ്റ്റില് സറേയ്ക്ക് വേണ്ടി കളിക്കാനായിരുന്നു നവാസിന്റെ തീരുമാനം. രണ്ടാഴ്ച മുന്പ് പി.സി.ബി ഇതിനായി താരത്തിന് എന്.ഒ.സി (അനാക്ഷേപ പത്രം) നല്കുകയും ചെയ്തിരുന്നു. കരാര് ഔദ്യോഗികമായി പ്രഖ്യാപിക്കാനിരിക്കെയാണ് അപ്രതീക്ഷിതമായ തിരിച്ചടി നേരിട്ടത്. സംഭവത്തില് സറേ ഇതുവരെ ഔദ്യോഗികമായി പ്രതികരിച്ചിട്ടില്ല.
അന്വേഷണം നേരിടുന്നുണ്ടെങ്കിലും നിലവില് നടക്കുന്ന പാകിസ്ഥാന് സൂപ്പര് ലീഗില് (പി.എസ്.എല്) മുള്ട്ടാന് സുല്ത്താന്സിന് വേണ്ടി നവാസ് കളിക്കുന്നുണ്ട്. കഴിഞ്ഞ മത്സരത്തില് റാവല്പിണ്ടിക്കെതിരെ മൂന്ന് ഓവര് ബൗള് ചെയ്ത താരം വിക്കറ്റുകളൊന്നും നേടിയിരുന്നില്ല. എട്ട് മത്സരങ്ങളില് ആറ് വിജയങ്ങളുമായി പോയിന്റ് പട്ടികയില് രണ്ടാം സ്ഥാനത്താണ് മുള്ട്ടാന്. അന്വേഷണം പുരോഗമിക്കുന്ന പശ്ചാത്തലത്തില് കൂടുതല് പ്രതികരണത്തിന് ഐ.സി.സി തയ്യാറായിട്ടില്ല. ഈ അന്വേഷണത്തിന്റെ ഫലം നവാസിന്റെ അന്താരാഷ്ട്ര ക്രിക്കറ്റ് കരിയറില് നിര്ണ്ണായകമാകും.
