ന്യൂഡല്ഹി: രാജ്യത്തിന്റെ ആഭ്യന്തര രഹസ്യാന്വേഷണ ഏജന്സിയായ ഇന്റലിജന്സ് ബ്യൂറോയുടെ പുതിയ ഡയറക്ടറായി മുതിര്ന്ന ഐപിഎസ് ഉദ്യോഗസ്ഥന് മഹേഷ് ദീക്ഷിത്തിനെ കേന്ദ്ര സര്ക്കാര് നിയമിച്ചു. പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന കേന്ദ്ര മന്ത്രിസഭാ നിയമന സമിതിയാണ് നിയമനത്തിന് അംഗീകാരം നല്കിയത്. നിലവിലെ ഡയറക്ടര് തപന് കുമാര് ദേക്കയുടെ പിന്ഗാമിയായാണ് ദീക്ഷിത് ചുമതലയേല്ക്കുന്നത്.
1993 ബാച്ചിലെ ആന്ധ്രാപ്രദേശ് കേഡര് ഐപിഎസ് ഉദ്യോഗസ്ഥനായ മഹേഷ് ദീക്ഷിത് നിലവില് ഐബിയുടെ സ്പെഷ്യല് ഡയറക്ടറായിരുന്നു. ചുമതലയേറ്റ തീയതി മുതല് രണ്ട് വര്ഷത്തേക്കാണ് നിയമനം. കേന്ദ്ര സര്ക്കാര് പുറത്തിറക്കിയ ഉത്തരവ് പ്രകാരം, സര്വീസ് കാലാവധി നീട്ടിയാണ് അദ്ദേഹത്തെ ഡയറക്ടര് സ്ഥാനത്തേക്ക് നിയമിച്ചിരിക്കുന്നത്.
ഇന്റലിജന്സ് രംഗത്ത് ദീര്ഘകാല പരിചയസമ്പത്തുള്ള ഉദ്യോഗസ്ഥനാണ് മഹേഷ് ദീക്ഷിത്. പ്രത്യേകിച്ച് ജമ്മു-കശ്മീരിലെ സേവനകാലമാണ് അദ്ദേഹത്തിന്റെ കരിയറിലെ പ്രധാനഘട്ടങ്ങളിലൊന്ന്. ശ്രീനഗറിലെ സബ്സിഡിയറി ഇന്റലിജന്സ് ബ്യൂറോയുടെ മേധാവിയായിരുന്ന അദ്ദേഹം ജമ്മു, കശ്മീര്, ലഡാക്ക് മേഖലകളിലെ രഹസ്യാന്വേഷണ പ്രവര്ത്തനങ്ങള്ക്ക് നേതൃത്വം നല്കിയിരുന്നു.
2019-ല് ഭരണഘടനയുടെ ആര്ട്ടിക്കിള് 370 റദ്ദാക്കിയതിന് ശേഷമുള്ള സുരക്ഷാ സാഹചര്യങ്ങള് നിരീക്ഷിക്കുന്നതിലും നിര്ണായക പങ്കുവഹിച്ചതായി വിലയിരുത്തപ്പെടുന്നു. പാകിസ്ഥാന് പിന്തുണയുള്ള നുഴഞ്ഞുകയറ്റ ശൃംഖലകളെ നേരിടല്, തീവ്രവല്ക്കരണ പ്രവര്ത്തനങ്ങള് നിരീക്ഷിക്കല്, ഇടതുപക്ഷ തീവ്രവാദവുമായി ബന്ധപ്പെട്ട സുരക്ഷാ വെല്ലുവിളികള് കൈകാര്യം ചെയ്യല് എന്നിവയുള്പ്പെടെ നിരവധി സുപ്രധാന ദൗത്യങ്ങളില് മഹേഷ് ദീക്ഷിത് പ്രവര്ത്തിച്ചിട്ടുണ്ട്. ആഭ്യന്തര സുരക്ഷയുമായി ബന്ധപ്പെട്ട അതീവ രഹസ്യമായ ചുമതലകള് വിജയകരമായി നിര്വഹിച്ച ഉദ്യോഗസ്ഥനെന്ന പേരും അദ്ദേഹത്തിനുണ്ട്.
രാജ്യത്തിനകത്തെ സുരക്ഷാ ഭീഷണികളെക്കുറിച്ചുള്ള വിവരശേഖരണവും വിശകലനവും നടത്തുന്ന ഇന്ത്യയുടെ പ്രധാന ആഭ്യന്തര രഹസ്യാന്വേഷണ ഏജന്സിയാണ് ഇന്റലിജന്സ് ബ്യൂറോ. ഭീകരവിരുദ്ധ പ്രവര്ത്തനങ്ങള്, ആഭ്യന്തര സുരക്ഷ, കൗണ്ടര് ഇന്റലിജന്സ് എന്നിവയില് നിര്ണായക പങ്ക് വഹിക്കുന്ന ഈ ഏജന്സി കേന്ദ്ര ആഭ്യന്തര മന്ത്രാലയത്തിന്റെ കീഴിലാണ് പ്രവര്ത്തിക്കുന്നത്. കേന്ദ്ര-സംസ്ഥാന സുരക്ഷാ ഏജന്സികളുമായി ചേര്ന്നാണ് ഐബി രാജ്യസുരക്ഷ ഉറപ്പാക്കുന്നതിനുള്ള പ്രവര്ത്തനങ്ങള് ഏകോപിപ്പിക്കുന്നത്.
