തിരുവനന്തപുരം: സംസ്ഥാനത്ത് മുന്ഗണനാ റേഷന് കാര്ഡുകള് (പിങ്ക് കാര്ഡ്) ലഭിക്കുന്നതിനുള്ള അപേക്ഷ സ്വീകരിക്കല് ജൂണ് 27 മുതല് ആരംഭിക്കും. പൊതുവിഭാഗം (വെള്ള, നീല) റേഷന് കാര്ഡുകള് മുന്ഗണനാ വിഭാഗമായ പിഎച്ച്എച്ച് കാര്ഡുകളാക്കി മാറ്റുന്നതിനാണ് അപേക്ഷ ക്ഷണിച്ചിരിക്കുന്നത്. പൊതുവിതരണ ഉപഭോക്തൃകാര്യ കമ്മിഷണറാണ് ഇക്കാര്യം അറിയിച്ചത്.
ഒഴിവാക്കല് മാനദണ്ഡങ്ങളില് ഉള്പ്പെടാത്തതും മുന്ഗണനാ റേഷന് കാര്ഡിന് അര്ഹതയുള്ളതുമായ കുടുംബങ്ങള്ക്ക് ഈ അവസരം പ്രയോജനപ്പെടുത്താം. അപേക്ഷ സമര്പ്പിക്കാനുള്ള അവസാന തീയതി അടുത്ത മാസം 17 ആണ്. അര്ഹരായ കാര്ഡുടമകള് ആവശ്യമായ രേഖകള് സഹിതം അക്ഷയ കേന്ദ്രങ്ങള് വഴിയോ സിറ്റിസണ് ലോഗിന് പോര്ട്ടല് മുഖേനയോ ഓണ്ലൈനായി അപേക്ഷ സമര്പ്പിക്കണം. അപേക്ഷകള് പരിശോധിച്ച ശേഷമായിരിക്കും അര്ഹതയുടെ അടിസ്ഥാനത്തില് മുന്ഗണനാ വിഭാഗത്തിലേക്ക് തരംമാറ്റം നടത്തുക.
നിലവില് വെള്ളയോ നീലയോ റേഷന് കാര്ഡ് കൈവശമുള്ളവരും എന്നാല് സര്ക്കാരിന്റെ മാനദണ്ഡങ്ങള് പ്രകാരം മുന്ഗണനാ റേഷന് കാര്ഡിന് അര്ഹതയുള്ളവരുമായ കുടുംബങ്ങള്ക്കാണ് ഈ നടപടി ഗുണകരമാകുക. അര്ഹരായ നിരവധി കുടുംബങ്ങള്ക്ക് ഭക്ഷ്യധാന്യ വിതരണത്തിലെ മുന്ഗണനാ ആനുകൂല്യങ്ങള് ഇതിലൂടെ ലഭ്യമാകുമെന്നാണ് പ്രതീക്ഷ. അപേക്ഷ സമര്പ്പിക്കുന്നതിന് മുമ്പ് ആവശ്യമായ രേഖകള് പൂര്ണമായി തയ്യാറാക്കി വയ്ക്കാനും വിവരങ്ങള് കൃത്യമായി നല്കാനും അധികൃതര് നിര്ദേശിച്ചിട്ടുണ്ട്.
