ന്യൂഡല്ഹി: സീഷെല്സിന്റെ ദേശീയ ദിനത്തിന്റെ സുവര്ണ ജൂബിലി ആഘോഷങ്ങളില് മുഖ്യാതിഥിയായി പങ്കെടുക്കാന് പ്രധാനമന്ത്രി നരേന്ദ്ര മോദി ജൂണ് 27 മുതല് 29 വരെ ദ്വീപ് രാഷ്ട്രം സന്ദര്ശിക്കും. സീഷെല്സ് പ്രസിഡന്റ് പാട്രിക് ഹെര്മിനിയുടെ ക്ഷണപ്രകാരമാണ് സന്ദര്ശനം. വിദേശകാര്യ മന്ത്രാലയമാണ് ഇക്കാര്യം ഔദ്യോഗികമായി അറിയിച്ചത്.
ആഘോഷങ്ങളുടെ ഭാഗമായി ഇന്ത്യന് പ്രതിരോധ സേനയുടെ ഒരു വിഭാഗവും ഇന്ത്യന് നാവികസേനയുടെ രണ്ട് യുദ്ധക്കപ്പലുകളും ചടങ്ങുകളില് പങ്കെടുക്കും. 2015-ന് ശേഷം പ്രധാനമന്ത്രി മോദിയുടെ ആദ്യ സീഷെല്സ് സന്ദര്ശനമാണിത്. സന്ദര്ശനത്തിനിടെ പ്രസിഡന്റ് പാട്രിക് ഹെര്മിനിയുമായി പ്രധാനമന്ത്രി കൂടിക്കാഴ്ച നടത്തും. ഇന്ത്യസീഷെല്സ് ബന്ധത്തിന്റെ വിവിധ മേഖലകളിലെ സഹകരണം വിലയിരുത്തുന്നതിനൊപ്പം പ്രാദേശികവും അന്തര്ദേശീയവുമായ വിഷയങ്ങളിലും ഇരുനേതാക്കളും ചര്ച്ച നടത്തും.
കൂടാതെ, സീഷെല്സ് ദേശീയ അസംബ്ലിയെ പ്രധാനമന്ത്രി അഭിസംബോധന ചെയ്യുകയും അവിടെയുള്ള ഇന്ത്യന് വംശജരുമായി സംവദിക്കുകയും ചെയ്യും. ചരിത്രപരവും സാംസ്കാരികവും ജനങ്ങള് തമ്മിലുള്ള ബന്ധവും കൊണ്ട് ഇന്ത്യയും സീഷെല്സും ദീര്ഘകാല സൗഹൃദമാണ് പങ്കിടുന്നതെന്ന് വിദേശകാര്യ മന്ത്രാലയം വ്യക്തമാക്കി. ഇന്ത്യന് മഹാസമുദ്ര മേഖലയിലെ പ്രധാന സമുദ്ര അയല്രാജ്യമായ സീഷെല്സിന് ഇന്ത്യയുടെ ‘വിഷന് മഹാസാഗര്’ പദ്ധതിയിലും ഗ്ലോബല് സൗത്ത് സഹകരണ കാഴ്ചപ്പാടിലും സുപ്രധാന സ്ഥാനമാണുള്ളത്.
ഈ വര്ഷം ഫെബ്രുവരിയില് സീഷെല്സ് പ്രസിഡന്റ് ഇന്ത്യ സന്ദര്ശിച്ചപ്പോള് ഡിജിറ്റല് പരിവര്ത്തനം, സാമ്പത്തിക വികസനം, സമുദ്ര സുരക്ഷ, പ്രതിരോധ സഹകരണം എന്നിവയില് കൂടുതല് ഏകോപനത്തിന് ഇരു രാജ്യങ്ങളും ധാരണയിലെത്തിയിരുന്നു. സീഷെല്സിലെ ഡിജിറ്റല് ഭരണസംവിധാനങ്ങള് വികസിപ്പിക്കുന്നതിനും ഡിജിറ്റല് പേയ്മെന്റ് സംവിധാനങ്ങള് ഉള്പ്പെടെയുള്ള ഡിജിറ്റല് പബ്ലിക് ഇന്ഫ്രാസ്ട്രക്ചര് ഒരുക്കുന്നതിനും ഇന്ത്യ പിന്തുണ പ്രഖ്യാപിച്ചിരുന്നു.
ഇരു രാജ്യങ്ങളും ചേര്ന്ന് നടപ്പാക്കുന്ന വികസന പദ്ധതികളുടെ ഭാഗമായി 175 മില്യണ് യുഎസ് ഡോളറിന്റെ പ്രത്യേക സാമ്പത്തിക പാക്കേജും ഇന്ത്യ പ്രഖ്യാപിച്ചിട്ടുണ്ട്. ഇതില് രൂപ അടിസ്ഥാനത്തിലുള്ള വായ്പാ സഹായവും ഗ്രാന്റ് സഹായവും ഉള്പ്പെടുന്നു. വികസന പദ്ധതികള്, ശേഷി വികസനം, സമുദ്ര സുരക്ഷ, പ്രതിരോധ സഹകരണം, സുസ്ഥിര വളര്ച്ച തുടങ്ങിയ മേഖലകളില് ഈ സഹായം വിനിയോഗിക്കാനാണ് തീരുമാനം.
