ന്യൂഡല്‍ഹി: പ്രധാനമന്ത്രി നരേന്ദ്ര മോദിയെ അധിക്ഷേപിക്കുന്ന തരത്തില്‍ സംസാരിച്ചുവെന്ന പരാതിയില്‍ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ 24 മണിക്കൂറിനുള്ളില്‍ വിശദീകരണം നല്‍കണമെന്ന് തിരഞ്ഞെടുപ്പ് കമ്മീഷന്‍ ഉത്തരവിട്ടു. ചെന്നൈയില്‍ ചൊവ്വാഴ്ച നടന്ന വാര്‍ത്താസമ്മേളനത്തിലെ പരാമര്‍ശമാണ് രാഷ്‌ട്രീയ വിവാദത്തിന് തിരികൊളുത്തിയത്. ധനമന്ത്രി നിര്‍മല സീതാരാമന്‍, കിരണ്‍ റിജിജു തുടങ്ങിയ മുതിര്‍ന്ന കേന്ദ്രമന്ത്രിമാരുടെ നേതൃത്വത്തിലുള്ള ബിജെപി പ്രതിനിധി സംഘം കമ്മീഷനെ നേരില്‍ കണ്ട് ഖാര്‍ഗെയ്‌ക്കെതിരെ നടപടി ആവശ്യപ്പെട്ടു.
പ്രധാനമന്ത്രിയെ ഭീകരവാദി എന്ന് വിളിക്കുന്നത് രാജ്യത്തെ ജനവിധിയെയും ജനാധിപത്യത്തെയും അവഹേളിക്കുന്നതിന് തുല്യമാണെന്ന് മന്ത്രി കിരണ്‍ റിജിജു പ്രതികരിച്ചു. ഖാര്‍ഗെ പരസ്യമായി മാപ്പ് പറയണമെന്നും ബിജെപി ആവശ്യപ്പെട്ടു. തമിഴ്‌നാട്ടിലും ബംഗാളിലും തിരഞ്ഞെടുപ്പ് നടക്കാനിരിക്കെ, തോല്‍വി ഭയന്നുള്ള നിരാശയില്‍ നിന്നാണ് കോണ്‍ഗ്രസ് ഇത്തരം മോശം വാക്കുകള്‍ ഉപയോഗിക്കുന്നതെന്ന് നിര്‍മല സീതാരാമന്‍ ആരോപിച്ചു. വിവാദം കൊഴുത്തതോടെ തന്റെ പ്രസ്താവനയെ ന്യായീകരിച്ച് ഖാര്‍ഗെ രംഗത്തെത്തി. താന്‍ ആ വാക്ക് അക്ഷരാര്‍ത്ഥത്തില്‍ പ്രയോഗിച്ചതല്ലെന്നും രാഷ്‌ട്രീയമായ അര്‍ത്ഥത്തിലാണ് ഉദ്ദേശിച്ചതെന്നും അദ്ദേഹം വ്യക്തമാക്കി.
കേന്ദ്ര ഏജന്‍സികളെ ഉപയോഗിച്ച് പ്രതിപക്ഷത്തെ ഭയപ്പെടുത്തുന്ന മോദിയുടെ രീതിയെ വിമര്‍ശിക്കുക മാത്രമാണ് ചെയ്തതെന്നാണ് അദ്ദേഹത്തിന്റെ വാദം. പ്രതിപക്ഷ നേതാവ് കൂടിയായ ഖാര്‍ഗെയുടെ വിശദീകരണം ലഭിച്ച ശേഷം തുടര്‍നടപടികള്‍ സ്വീകരിക്കാനാണ് തിരഞ്ഞെടുപ്പ് കമ്മീഷന്റെ തീരുമാനം. തിരഞ്ഞെടുപ്പ് പെരുമാറ്റച്ചട്ട ലംഘനം നടന്നോ എന്ന കാര്യം കമ്മീഷന്‍ പരിശോധിച്ചു വരികയാണ്. ഈ സംഭവം വരും ദിവസങ്ങളില്‍ തിരഞ്ഞെടുപ്പ് പ്രചാരണങ്ങളില്‍ വലിയ ചര്‍ച്ചാവിഷയമാകുമെന്ന് ഉറപ്പാണ്.
