കൊച്ചി: മലയാള സിനിമ കാത്തിരുന്ന ആ വലിയ പ്രഖ്യാപനം എത്തിയിരിക്കുന്നു. മെഗാസ്റ്റാർ മമ്മൂട്ടിയും കംപ്ലീറ്റ് ആക്ടർ മോഹൻലാലും വർഷങ്ങൾക്കുശേഷം സ്ക്രീനിൽ ഒന്നിക്കുന്ന ബിഗ് ബജറ്റ് ചിത്രം ‘പേട്രിയറ്റ്’ (Patriot) മെയ് ഒന്നിന് ലോകമെമ്പാടുമുള്ള തിയറ്ററുകളിലെത്തും. പ്രശസ്ത സംവിധായകൻ മഹേഷ് നാരായണൻ ഒരുക്കുന്ന ഈ ചിത്രം സിനിമാപ്രേമികൾക്ക് വലിയൊരു ദൃശ്യവിരുന്നാകുമെന്നാണ് പ്രതീക്ഷിക്കുന്നത്. ആന്റോ ജോസഫ് ഫിലിം കമ്പനിയും കിച്ചാപ്പൂസ് ഫിലിംസും ചേർന്നാണ് ഈ ബ്രഹ്മാണ്ഡ ചിത്രം നിർമ്മിക്കുന്നത്.
വേനലവധി സീസൺ ലക്ഷ്യമിട്ട് റിലീസിനെത്തുന്ന ചിത്രത്തിൽ മമ്മൂട്ടിക്കും മോഹൻലാലിനുമൊപ്പം മലയാളത്തിലെയും തമിഴിലെയും മുൻനിര താരങ്ങളുടെ ഒരു വലിയ നിര തന്നെയുണ്ട്. ഫഹദ് ഫാസിൽ, കുഞ്ചാക്കോ ബോബൻ, നയൻതാര, രേവതി തുടങ്ങിയവർ പ്രധാന വേഷങ്ങളിൽ എത്തുന്ന ചിത്രം ഒരു കംപ്ലീറ്റ് പാക്കേജ് ആയിരിക്കുമെന്ന് അണിയറപ്രവർത്തകർ ഉറപ്പുനൽകുന്നു.
ചിത്രത്തെക്കുറിച്ച് മമ്മൂട്ടിയുടെ വാക്കുകൾ ആരാധകരിൽ ആവേശം വർധിപ്പിച്ചിരിക്കുകയാണ്. “മലയാളികൾക്ക് തികച്ചും പുതിയൊരു കാഴ്ചാനുഭവമായിരിക്കും ഈ സിനിമയെന്നും ജനങ്ങൾ ഏറ്റെടുത്താൽ പേട്രിയറ്റ് മലയാള സിനിമയിലെ തന്നെ ഒരു പുതിയ നാഴികക്കല്ലായി മാറും” എന്നും താരം പറഞ്ഞു.
താരനിരയെപ്പോലെ തന്നെ സിനിമയുടെ കഥയ്‌ക്കും തുല്യ പ്രാധാന്യമുണ്ടെന്ന് സംവിധായകൻ മഹേഷ് നാരായണൻ വ്യക്തമാക്കി. ഏറെ നാളത്തെ മുന്നൊരുക്കങ്ങൾക്കൊടുവിലാണ് ചിത്രം റിലീസിനൊരുങ്ങുന്നത്.
