ന്യൂഡൽഹി: ഭാരതത്തിന്റെ ഡിജിറ്റൽ തിരിച്ചറിയൽ രേഖയായ ആധാർ ഇനി ഗൂഗിൾ വാലറ്റിലും ലഭ്യമാകും. ‘ഡിജിറ്റൽ-ഫസ്റ്റ്’ എന്ന നയം മുൻനിർത്തി ഗൂഗിൾ വാലറ്റിൽ ആധാർ ഉൾപ്പെടുത്തുന്നതോടെ വേഗത്തിലുള്ള വെരിഫിക്കേഷനും ഉയർന്ന സുരക്ഷയും ഉറപ്പാക്കാൻ സാധിക്കും. വ്യക്തിഗത വിവരങ്ങൾ കൈമാറുന്നത് പരിമിതപ്പെടുത്തിക്കൊണ്ട് തന്നെ ഔദ്യോഗിക ആവശ്യങ്ങൾക്കായി ആധാർ ഉപയോഗിക്കാമെന്നതാണ് ഇതിന്റെ പ്രധാന സവിശേഷത.
ശാരീരികമായി ആധാർ കാർഡ് കൈവശം വെക്കാതെ തന്നെ സ്മാർട്ട്ഫോണിലെ ഗൂഗിൾ വാലറ്റ് വഴി എളുപ്പത്തിൽ വെരിഫിക്കേഷൻ പൂർത്തിയാക്കാം. ഒരു വ്യക്തിയുടെ മുഴുവൻ ആധാർ വിവരങ്ങളും വെളിപ്പെടുത്താതെ തന്നെ ആവശ്യമായ വിവരങ്ങൾ മാത്രം കൈമാറാനുള്ള സംവിധാനം (Selective Disclosure) ഇതിൽ ഒരുക്കിയിട്ടുണ്ട്. ഇത് സ്വകാര്യത സംരക്ഷിക്കാൻ സഹായിക്കുന്നു. ഫോണിലെ സുരക്ഷിതമായ എൻക്ലേവുകളിൽ വിവരങ്ങൾ സൂക്ഷിക്കുന്നതിനാൽ ഹാക്കിംഗ് ഭീഷണി കുറവാണ്.
വിമാനത്താവളങ്ങൾ, ഹോട്ടലുകൾ തുടങ്ങിയ ഇടങ്ങളിൽ തിരിച്ചറിയൽ രേഖയായി ഡിജിറ്റൽ ആധാർ ഉപയോഗിക്കുന്നത് കൂടുതൽ ലളിതമാകും.
ഡിജിറ്റൽ ഇന്ത്യ പദ്ധതിയുടെ ഭാഗമായി ജനങ്ങൾക്ക് സേവനങ്ങൾ കൂടുതൽ സുതാര്യമായും വേഗത്തിലും ലഭ്യമാക്കുന്നതിന്റെ ഭാഗമായാണ് ഈ പുതിയ നീക്കം.
