വാഷിങ്ടണ്‍/തിരുവനന്തപുരം: കേരളം ഉള്‍പ്പെടെ അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പ് ഫലം വരാനിരിക്കെ, അമേരിക്കന്‍ വാതുവെപ്പ് വിപണികളില്‍ കോടികളുടെ പണമിടപാട് നടക്കുന്നതായി റിപ്പോര്‍ട്ട്. യുഎസ് കേന്ദ്രമായി പ്രവര്‍ത്തിക്കുന്ന ക്രിപ്‌റ്റോ പ്രെഡിക്ഷന്‍ പ്ലാറ്റ്ഫോമായ ‘പോളി മാര്‍ക്കറ്റില്‍’ മാത്രം ഇതിനകം 26 മില്യണ്‍ യുഎസ് ഡോളറിന്റെ (ഏകദേശം 247 കോടി രൂപ) വാതുവെപ്പ് നടന്നതായാണ് വിവരങ്ങള്‍ പുറത്തുവരുന്നത്.
ഏറ്റവും കൂടുതല്‍ പണം ഒഴുകിയത് തമിഴ്‌നാട് തിരഞ്ഞെടുപ്പിലാണ്. 20 മില്യണ്‍ ഡോളറിലധികം തമിഴ്‌നാടിന് മേല്‍ പന്തയം വെക്കപ്പെട്ടു. ഇതില്‍ ഡി.എം.കെയുടെ വിജയത്തിനാണ് 88 ശതമാനത്തോളം പേരും മുന്‍ഗണന നല്‍കുന്നത്. അഞ്ച് മില്യണ്‍ ഡോളറിന്റെ വാതുവെപ്പ് നടന്ന ബംഗാളില്‍ തൃണമൂല്‍ കോണ്‍ഗ്രസ് അധികാരം നിലനിര്‍ത്തുമെന്നാണ് 53 ശതമാനം പേര്‍ കരുതുന്നത്.
കേരളത്തില്‍ യു.ഡി.എഫ് അധികാരത്തില്‍ തിരിച്ചെത്തുമെന്ന പ്രവചനത്തിനാണ് വാതുവെപ്പുകാര്‍ക്കിടയില്‍ മുന്‍തൂക്കം. ഇന്ത്യയില്‍ വാതുവെപ്പ് നിയമവിരുദ്ധമാണെങ്കിലും, അതിര്‍ത്തികള്‍ കടന്നുള്ള ഈ ഡിജിറ്റല്‍ വാതുവെപ്പില്‍ ഭാരതത്തില്‍ നിന്നുള്ളവരും സജീവമാണെന്ന് റിപ്പോര്‍ട്ടുകള്‍ സൂചിപ്പിക്കുന്നു. ക്രിപ്‌റ്റോ കറന്‍സി വഴിയാണ് പ്രധാനമായും ഇടപാടുകള്‍ നടക്കുന്നത്.
‘കോഡ്’ ഭാഷകളും രഹസ്യ നാമങ്ങളും ഉപയോഗിച്ചാണ് ഇത്തരം പ്ലാറ്റ്ഫോമുകളില്‍ ആളുകള്‍ പണം നിക്ഷേപിക്കുന്നത്. ‘അസം തിരഞ്ഞെടുപ്പില്‍ ബി.ജെ.പിക്കും പുതുച്ചേരിയില്‍ എന്‍.ഡി.എ സഖ്യത്തിനുമാണ് (83% പേരും) നിലവില്‍ വാതുവെപ്പ് വിപണിയില്‍ വിജയസാധ്യത കല്‍പ്പിക്കപ്പെടുന്നത്.’ സാധാരണ എക്‌സിറ്റ് പോളുകളില്‍ നിന്ന് വ്യത്യസ്തമായി, സ്വന്തം പണം പന്തയം വെച്ച് ആളുകള്‍ നടത്തുന്ന ഈ പ്രവചനങ്ങള്‍ ലോകമെമ്പാടുമുള്ള രാഷ്‌ട്രീയ നിരീക്ഷകര്‍ കൗതുകത്തോടെയാണ് വീക്ഷിക്കുന്നത്.
ക്രിപ്‌റ്റോ അധിഷ്ഠിതമായ ഈ പ്ലാറ്റ്ഫോമിലെ ട്രെന്‍ഡുകള്‍ പലപ്പോഴും കൃത്യമാകാറുണ്ടെന്ന വാദവും ഉയരുന്നുണ്ട്. മെയ് 4 തിങ്കളാഴ്ച വോട്ടെണ്ണല്‍ ആരംഭിക്കുന്നതോടെ ഈ ‘കോടിപതി അങ്ക’ത്തിന്റെ വിധി അറിയാം.
