കൊൽക്കത്ത: പശ്ചിമ ബംഗാളിൽ ബിജെപി സർക്കാർ അധികാരമേൽക്കാനൊരുങ്ങവെ, സംസ്ഥാന സെക്രട്ടേറിയറ്റായ നബന്നയിൽ സർക്കാർ ജീവനക്കാരുടെ ആഹ്ലാദപ്രകടനം. ചൊവ്വാഴ്ച സെക്രട്ടേറിയറ്റിനുള്ളിൽ ജീവനക്കാർ കൂട്ടമായി ചേർന്ന് ‘ജയ് ശ്രീറാം’, ‘ഭാരത് മാതാ കീ ജയ്’ വിളികൾ മുഴക്കി. തങ്ങൾ ഇനി ‘ഭയമുക്തരാണെന്ന്’ പ്രഖ്യാപിച്ചുകൊണ്ടായിരുന്നു ജീവനക്കാരുടെ ഈ അപ്രതീക്ഷിത നീക്കം.
സെക്രട്ടേറിയറ്റിലെ ഓരോ നിലയിലുമുള്ള ബാൽക്കണികളിൽ ഒത്തുകൂടിയ ജീവനക്കാർ കാവി വസ്ത്രങ്ങൾ വീശിയാണ് തങ്ങളുടെ ആഹ്ലാദം പ്രകടിപ്പിച്ചത്. എല്ലാ വകുപ്പുകളിൽ നിന്നുമുള്ള ജീവനക്കാർ ഇതിൽ പങ്കുചേർന്നു. പുതിയ സർക്കാർ തങ്ങൾക്ക് ഗുണകരമായ തീരുമാനങ്ങൾ എടുക്കുമെന്ന പ്രതീക്ഷയിലാണ് തങ്ങളെന്ന് ഒരു ജീവനക്കാരൻ പ്രതികരിച്ചു.
അതേസമയം, നഗരത്തിന്റെ മറ്റൊരു ഭാഗത്ത് ‘സംഗ്രാമി ജൗത മഞ്ച’യുടെ നേതൃത്വത്തിൽ സർക്കാർ ജീവനക്കാർ പ്രതിഷേധവുമായി രംഗത്തെത്തി. തൃണമൂൽ സർക്കാരിന്റെ കാലത്ത് കോവിഡ് മഹാമാരിയുടെ മറവിൽ നടന്ന അഴിമതികളുടെ ഫയലുകൾ ആരോഗ്യ വകുപ്പ് ആസ്ഥാനമായ സ്വാസ്ഥ്യ ഭവനിൽ നിന്ന് നീക്കം ചെയ്യാൻ ശ്രമം നടക്കുന്നുണ്ടെന്ന് ഇവർ ആരോപിക്കുന്നു.
ഹെൽത്ത് സെക്രട്ടറിയുടെ നേതൃത്വത്തിലാണ് തെളിവുകൾ നശിപ്പിക്കാൻ ശ്രമിക്കുന്നതെന്ന് ആരോപിച്ചാണ് ജീവനക്കാർ പ്രതിഷേധിക്കുന്നത്. ബിജെപി സർക്കാർ അധികാരമേൽക്കുന്നതോടെ പഴയ സെക്രട്ടേറിയറ്റ് മന്ദിരമായ റൈറ്റേഴ്സ് ബിൽഡിംഗിലേക്ക് ഭരണം മാറ്റാനുള്ള തയ്യാറെടുപ്പുകൾ ആരംഭിച്ചു. ഇതിന്റെ ഭാഗമായി പി.ഡബ്ല്യു.ഡി ഉദ്യോഗസ്ഥർ മന്ദിരം സന്ദർശിക്കുകയും മുഖ്യമന്ത്രിയുടെയും മറ്റ് മന്ത്രിമാരുടെയും ഓഫീസുകൾ നവീകരിക്കുന്നതിനുള്ള നടപടികൾ തുടങ്ങുകയും ചെയ്തു. ബിജെപി അധികാരത്തിലെത്തിയാൽ ഭരണം പഴയ സെക്രട്ടേറിയറ്റിലേക്ക് മാറ്റുമെന്ന് നേരത്തെ സൂചനകളുണ്ടായിരുന്നു.
