തിരുവനന്തപുരം : മുഖ്യമന്ത്രിയെ തീരുമാനിക്കാനായി മാരത്തോൺ ചർച്ചകളും ഫ്ലക്സ് യുദ്ധങ്ങളും നടക്കുന്നതിനിടെ സംസ്ഥാന കോൺഗ്രസിൽ ആലിംഗന വിവാദം.
കേന്ദ്ര നിരീക്ഷകർ വിളിച്ച യോഗത്തിനെത്തിയ ബിന്ദുകൃഷ്ണയെ കോൺഗ്രസ് നേതാവ് ചെറിയാൻ ഫിലിപ്പ് ആലിംഗനം ചെയ്യാൻ ശ്രമിച്ച വീഡിയോ ആണിപ്പോൾ വൈറലായിരിക്കുന്നത്. തിരുവനന്തപുരം ഇന്ദിരാഭവന് മുന്നിൽ വെച്ചായിരുന്നു സംഭവം. സംസ്ഥാന മുഖ്യമന്ത്രിയെ തീരുമാനിക്കാനുള്ള യോഗത്തിനെത്തിയതാണ് ബിന്ദുകൃഷ്ണ.
യോഗം നടക്കുന്ന ഹാളിലേയ്ക്കെത്താൻ വേഗത്തിൽ നടക്കുന്നതിനിടെ ചെറിയാൻ ഫിലിപ്പിനെ കണ്ട ബിന്ദു കൃഷ്ണ അദ്ദേഹത്തിന് കൈ കൊടുക്കാൻ ശ്രമിച്ചു. എന്നാൽ ഹസ്തദാനത്തിൽ ഒതുങ്ങാൻ കൂട്ടാക്കാതെ ബിന്ദുകൃഷ്ണയെ ചേർത്ത് പിടിച്ച് പരസ്യമായി സ്നേഹ പ്രകടനം നടത്താൻ ചെറിയാൻ ഫിലിപ്പ് ശ്രമിക്കുകയായിരുന്നു
മാധ്യമപ്രവർത്തകർക്ക് മുന്നിൽ വച്ച് നടന്ന ഈ ആലിംഗന ശ്രമം ക്യാമറകൾ ഒപ്പിയെടുത്തു. ബിന്ദു കൃഷ്ണ കൈ കൊടുക്കാൻ ശ്രമിച്ചപ്പോൾ അത് കണക്കാക്കാതെ ചെറിയാൻ ഫിലിപ് അവരെ കെട്ടിപ്പിടിക്കാൻ ശ്രമിക്കുന്നതും ബിന്ദു കൃഷ്ണ ഒഴിഞ്ഞ് മാറുന്നതും , ചെറിയാൻ ഫിലിപ്പിനെ അകറ്റുന്നതും, ചെറിയാൻ ഫിലിപ്പ് വീണ്ടും ബിന്ദു കൃഷ്ണയെ കൈകളിൽ പിടിച്ച് നിർത്താൻ ശ്രമിക്കുന്നതും ദൃശ്യങ്ങളിൽ കാണാം . ഒടുവിൽ ബലമായി ചെറിയാൻ ഫിലിപ്പിനെ തട്ടിമാറ്റി ആലിംഗന ശ്രമത്തിൽ നിന്നും കഷ്ടിച്ച് രക്ഷപെട്ടാണ് ബിന്ദു കൃഷ്ണ മുന്നോട്ട് നീങ്ങുന്നത്. സ്ഥലത്തുണ്ടായിരുന്ന പാലോട് രവി ഉൾപ്പെടെയുള്ള മറ്റ് നേതാക്കൾക്ക് കൈ കൊടുത്ത ശേഷമാണ് ബിന്ദു കൃഷ്ണ യോഗസ്ഥലത്തേക്ക് പോയത്.
ഈ വീഡിയോ പുറത്ത് വന്നതിന് പിന്നാലെ ചെറിയാൻ ഫിലിപ്പിനെതിരെ രൂക്ഷമായ വിമർശനങ്ങളാണ് ഉയരുന്നത് .
മുൻപ് കോൺഗ്രസിലെ സ്ത്രീകൾക്കെതിരെ ചെറിയാൻ ഫിലിപ് നടത്തിയ അശ്ളീല പരാമർശം ഈ വിഷയവുമായി ബന്ധപ്പെട്ട് വീണ്ടും ചർച്ചയാകുന്നുണ്ട്.
