ന്യൂഡൽഹി: ഉപഭോക്താക്കൾക്ക് ലഭിക്കാത്ത സേവനത്തിന് അവരിൽ നിന്ന് നിരക്ക് ഈടാക്കാൻ കഴിയില്ലെന്ന് സുപ്രീം കോടതി വ്യക്തമാക്കി. വൈദ്യുതി നിരക്ക് നിശ്ചയിക്കുന്നത് കേവലം ഒരു ഗണിതശാസ്ത്ര വ്യായാമമല്ലെന്നും, മറിച്ച് ഉപഭോക്താക്കളുടെ താൽപ്പര്യങ്ങൾ സംരക്ഷിക്കുന്നതിനുള്ള ഒരു നിയന്ത്രണ പ്രക്രിയയാണെന്നും കോടതി നിരീക്ഷിച്ചു. ഡൽഹിയിലെ റിതാല കമ്പൈൻഡ് സൈക്കിൾ പവർ പ്ലാന്റുമായി ബന്ധപ്പെട്ട അപ്പലേറ്റ് ട്രിബ്യൂണൽ ഫോർ ഇലക്ട്രിസിറ്റിയുടെ 2025 ഫെബ്രുവരിയിലെ ഉത്തരവ് റദ്ദാക്കിക്കൊണ്ടാണ് ജസ്റ്റിസുമാരായ പി.എസ്. നരസിംഹ, അലോക് ആരാധെ എന്നിവരടങ്ങിയ ബെഞ്ച് ഈ വിധി പുറപ്പെടുവിച്ചത്.
2018 മാർച്ചിൽ വൈദ്യുതി വിതരണം നിർത്തിയ പ്ലാന്റിന്റെ ബാക്കി മൂലധനച്ചെലവ് നിരക്കിലൂടെ ഈടാക്കാൻ കഴിയില്ലെന്ന ഡൽഹി ഇലക്ട്രിസിറ്റി റെഗുലേറ്ററി കമ്മീഷന്റെ 2019-ലെ ഉത്തരവ് സുപ്രീം കോടതി പുനഃസ്ഥാപിച്ചു. നിലച്ചുപോയ ഒരു സേവനത്തിന്റെ പേരിൽ ഉപഭോക്താക്കളുടെ മേൽ അധിക ബാധ്യത അടിച്ചേൽപ്പിക്കാൻ കഴിയില്ലെന്ന് കോടതി വ്യക്തമാക്കി. 2003-ലെ ഇലക്ട്രിസിറ്റി ആക്ട് പ്രകാരം ഉപഭോക്തൃ താൽപ്പര്യങ്ങൾ സംരക്ഷിക്കുക എന്നത് ഏറ്റവും പ്രധാനപ്പെട്ട തത്വമാണെന്നും ബെഞ്ച് ചൂണ്ടിക്കാട്ടി. 2010-ലെ കോമൺവെൽത്ത് ഗെയിംസ് സമയത്ത് ഡൽഹിയിലെ അടിയന്തര വൈദ്യുതി ആവശ്യങ്ങൾ നിറവേറ്റുന്നതിനായാണ് ഈ പ്ലാന്റ് സ്ഥാപിച്ചത്.
