ശ്രീനഗർ: ജമ്മു കശ്മീരിൽ വിഘടനവാദ പ്രവർത്തനങ്ങൾക്കും ഭീകരവാദ ഫണ്ടിംഗിനുമെതിരെ കടുത്ത നടപടികളുമായി ഭരണകൂടം മുന്നോട്ട്. വടക്കൻ കശ്മീരിലെ ബാരാമുള്ള ജില്ലയിൽ ഉൾപ്പെടുന്ന സോപാറിലെ 16 കേന്ദ്രങ്ങളിലാണ് പോലീസ് ഒരേസമയം വൻ പരിശോധന നടത്തിയത്. നിരോധിത ഭീകരവാദ സംഘടനയായ ജമാഅത്തെ ഇസ്ലാമിയുമായി ബന്ധമുള്ള വ്യക്തികളുടെയും സ്ഥാപനങ്ങളുടെയും ഇടങ്ങളിലാണ് ഈ വിപുലമായ റെയ്ഡ് നടക്കുന്നത്. വിഘടനവാദ സംഘടനകളുടെ സാമ്പത്തിക ഇടപാടുകളെ കേന്ദ്രീകരിച്ചാണ് പ്രധാനമായും അന്വേഷണം പുരോഗമിക്കുന്നത്.
കഴിഞ്ഞ ദിവസം രാത്രി ആരംഭിച്ച ഈ പരിശോധനകളിൽ നിർണ്ണായകമായ തെളിവുകൾ ലഭിച്ചതായാണ് വിവരം. ജമാഅത്തെ ഇസ്ലാമിയുമായി ബന്ധപ്പെട്ട നിരവധി ലഘുലേഖകളും ഡിജിറ്റൽ തെളിവുകൾ അടങ്ങിയ ചില ഇലക്ട്രോണിക് ഉപകരണങ്ങളും റെയ്ഡിൽ പോലീസ് പിടിച്ചെടുത്തിട്ടുണ്ട്. നിലവിൽ നിരോധിക്കപ്പെട്ടിട്ടും ഈ സംഘടനയുമായി ബന്ധമുള്ള ചിലർ രഹസ്യമായി സാമ്പത്തിക ഇടപാടുകൾ നടത്തുന്നതായും മറ്റ് അനുബന്ധ സംഘടനകളുടെ പേരിൽ കശ്മീരിലെ വിവിധ മേഖലകളിൽ സജീവമായി പ്രവർത്തിക്കുന്നതായും പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് കടുത്ത നടപടിയിലേക്ക് സുരക്ഷാസേന കടന്നത്.
2019-ലാണ് കേന്ദ്ര സർക്കാർ യു.എ.പി.എ (UAPA) നിയമപ്രകാരം ജമാഅത്തെ ഇസ്ലാമിയെ നിരോധിച്ചത്. എന്നാൽ, പരസ്യമായ പ്രവർത്തനങ്ങൾ അവസാനിപ്പിച്ചെങ്കിലും സംഘടനയുടെ ആളുകൾ ‘സ്ലീപ്പർ സെല്ലുകളായി’ മാറി കശ്മീരിൽ വിഘടനവാദ പ്രവർത്തനങ്ങൾ തുടരുന്നുവെന്ന കൃത്യമായ സൂചനകളുടെ അടിസ്ഥാനത്തിലാണ് ഇപ്പോഴത്തെ പരിശോധനകൾ. ജമാഅത്തെ ഇസ്ലാമിയുമായി ബന്ധമുള്ള എല്ലാ കേന്ദ്രങ്ങളിലേക്കും വരും ദിവസങ്ങളിൽ റെയ്ഡ് വ്യാപിപ്പിക്കുമെന്നാണ് സുരക്ഷാ ഉദ്യോഗസ്ഥരിൽ നിന്നും ലഭിക്കുന്ന വിവരം.
