തിരുവനന്തപുരം: വി ഡി സതീശന്റെ നേതൃത്വത്തിലുള്ള പുതിയ യുഡിഎഫ് സർക്കാരിന്റെ സത്യപ്രതിജ്ഞാ ചടങ്ങിൽ മുതിർന്ന കോൺഗ്രസ് നേതാവും തിരുവനന്തപുരം എംപിയുമായ ശശി തരൂർ പങ്കെടുക്കില്ല.
ചില അന്താരാഷ്ട്ര പരിപാടികളിൽ പങ്കെടുക്കുന്നതിനായി മുൻകൂട്ടി നിശ്ചയിച്ചത് പ്രകാരം അദ്ദേഹം അമേരിക്കയിലേക്ക് പോകുന്നതിനാലാണ് ചടങ്ങിൽ നിന്ന് വിട്ടുനിൽക്കുന്നത്. എക്സ് പോസ്റ്റിലൂടെ ശശി തരൂർ തന്നെയാണ് ഇക്കാര്യം വ്യക്തമാക്കിയത്.
സത്യപ്രതിജ്ഞാ ചടങ്ങിൽ പങ്കെടുക്കാൻ കഴിയാത്തതിൽ ഖേദമുണ്ടെന്നും തരൂർ പറയുന്നു . ഈ ആഴ്ച അവസാനം താൻ ബോസ്റ്റണിൽ ഉണ്ടാകുമെന്നും തന്റെ അൽമ മാറ്റർ (പൂർവ കലാലയം) ആയ ടഫ്റ്റ്സ് യൂണിവേഴ്സിറ്റിയിലെ ‘ഫ്ലെച്ചർ സ്കൂൾ ഓഫ് ലോ ആൻഡ് ഡിപ്ലോമസി’യുടെ ബിരുദദാന ചടങ്ങിൽ മുഖ്യപ്രഭാഷണം നടത്തേണ്ടതുണ്ട്.
യുഎസിലെ തന്റെ പഴയകാല ഓർമ്മകൾ പുതുക്കാനുള്ള അവസരമാണിതെന്നും ശശി തരൂർ എക്സിൽ കുറിച്ചു. വി ഡി സതീശൻ മന്ത്രിസഭയുടെ സത്യപ്രതിജ്ഞാ ചടങ്ങ്മേയ് 18-നാണ് തിരുവനന്തപുരത്ത് നടക്കുന്നത്.
