വാഷിംഗ്ടണ്‍: ഇന്ത്യന്‍ സൈന്യത്തിന്റെ യുദ്ധശേഷിയും പ്രതിരോധ സജ്ജീകരണങ്ങളും കൂടുതല്‍ ശക്തമാക്കുന്നതിനായി 428 മില്യണ്‍ ഡോളറിലധികം (ഏകദേശം 3,500 കോടിയിലധികം രൂപ) മൂല്യം വരുന്ന രണ്ട് വന്‍ പ്രതിരോധ കരാറുകള്‍ക്ക് അമേരിക്കന്‍ സ്റ്റേറ്റ് ഡിപ്പാര്‍ട്ട്‌മെന്റ് അനുമതി നല്‍കി. ഇന്ത്യന്‍ സായുധ സേന നിലവില്‍ ഉപയോഗിക്കുന്ന അത്യാധുനിക അപ്പാച്ചെ അറ്റാക്ക് ഹെലികോപ്റ്ററുകള്‍, എം777 അള്‍ട്രാ-ലൈറ്റ് ഹോവിറ്റ്സര്‍ പീരങ്കികള്‍ എന്നിവയുടെ ദീര്‍ഘകാല അറ്റകുറ്റപ്പണികളും സാങ്കേതിക പിന്തുണയും ഉറപ്പാക്കുന്നതാണ് ഈ പുതിയ കരാറുകള്‍.
വ്യോമസേനയുടെയും കരസേനയുടെയും കരുത്തായ ഈ പ്രതിരോധ സംവിധാനങ്ങള്‍ തടസ്സമില്ലാതെ പ്രവര്‍ത്തനസജ്ജമാക്കി നിര്‍ത്താന്‍ ലക്ഷ്യമിട്ടാണ് യു.എസ് നീക്കം. എ.എച്ച്-64ഇ അപ്പാച്ചെ ഹെലികോപ്റ്ററുകളുടെ സുഗമമായ പ്രവര്‍ത്തനത്തിനാവശ്യമായ സാങ്കേതിക-ലോജിസ്റ്റിക്‌സ് സഹായങ്ങള്‍ ഇന്ത്യയ്‌ക്ക് ലഭിക്കും. യു.എസ് സര്‍ക്കാരിന്റെയും പ്രമുഖ ആഗോള കമ്പനികളായ ബോയിംഗ്, ലോക്ക്ഹീഡ് മാര്‍ട്ടിന്‍ എന്നിവരുടെയും എന്‍ജിനീയറിങ് പിന്തുണയും ഉദ്യോഗസ്ഥര്‍ക്കുള്ള പ്രത്യേക പരിശീലനവും ഇതിന്റെ ഭാഗമായി ഉറപ്പാക്കും.
അതിര്‍ത്തികളില്‍ നിര്‍ണായകമായ എം777എ2 അള്‍ട്രാ-ലൈറ്റ് പീരങ്കികളുടെ സുരക്ഷയും കാര്യക്ഷമതയും വര്‍ദ്ധിപ്പിക്കാന്‍ ഈ തുക വിനിയോഗിക്കും. ആഗോള പ്രതിരോധ നിര്‍മ്മാതാക്കളായ ബി.എ.ഇ സിസ്റ്റംസ് ആണ് ഇതിന് നേതൃത്വം നല്‍കുന്നത്. പീരങ്കികളുടെ അനുബന്ധ ഉപകരണങ്ങള്‍, സ്‌പെയര്‍ പാര്‍ട്‌സുകള്‍, തകരാറുകള്‍ പരിഹരിക്കാനുള്ള സാങ്കേതിക സഹായം, ഫീല്‍ഡ് സര്‍വീസ് പ്രതിനിധികളുടെ സേവനം എന്നിവ ഇതിലുണ്ടാകും.
ഇന്‍ഡോ-പസഫിക്, ദക്ഷിണേഷ്യന്‍ മേഖലകളില്‍ രാഷ്‌ട്രീയ സ്ഥിരതയും സാമ്പത്തിക പുരോഗതിയും ഉറപ്പാക്കുന്നതില്‍ ഇന്ത്യയ്‌ക്കുള്ള പങ്കിനെ യു.എസ് സ്റ്റേറ്റ് ഡിപ്പാര്‍ട്ട്‌മെന്റ് അടിവരയിട്ടു കൂടുന്നു. ഇരു രാജ്യങ്ങളും തമ്മിലുള്ള തന്ത്രപ്രധാനമായ പങ്കാളിത്തം കൂടുതല്‍ ആഴത്തിലുള്ളതാക്കാന്‍ പുതിയ കരാറുകള്‍ സഹായിക്കുമെന്നും, പ്രാദേശിക സുരക്ഷാ ഭീഷണികളെ പ്രതിരോധിക്കാന്‍ ഇന്ത്യന്‍ സൈന്യത്തെ ഇത് കൂടുതല്‍ പ്രാപ്തമാക്കുമെന്നും യു.എസ് വ്യക്തമാക്കി.
