കൊച്ചി: ഏറെ ചർച്ച ചെയ്യപ്പെട്ട തലശ്ശേരി ഫസൽ വധക്കേസിലെ നിർണായക തൊണ്ടിമുതലായ രക്തം പുരണ്ട തൂവാല കോടതിയിൽ നിന്ന് നഷ്ടപ്പെട്ട സംഭവത്തിൽ ആഭ്യന്തര അന്വേഷണത്തിന് കൊച്ചി സി.ബി.ഐ കോടതി ശുപാർശ ചെയ്യും. എറണാകുളം സി.ജെ.എം കോടതിയിൽ സൂക്ഷിച്ചിരുന്ന തൊണ്ടിമുതലാണ് ദുരൂഹ സാഹചര്യത്തിൽ കാണാതായത്. കേസ് വഴിതിരിച്ചുവിടാൻ സി.പി.എം ക്രിമിനൽ സംഘം ബോധപൂർവം ചമച്ചെടുത്ത തെളിവായിരുന്നു ഈ തൂവാല.
തൂവാല ഹാജരാക്കാൻ സി.ബി.ഐ കോടതി നിർദേശിച്ചതിനെ തുടർന്ന് എറണാകുളം സി.ജെ.എം കോടതിയിൽ നിന്ന് സീൽ ചെയ്ത കവർ എത്തിച്ചിരുന്നു. എന്നാൽ കവറിന്റെ നടുഭാഗം കീറിയ നിലയിലായിരുന്നു. തൊണ്ടിമുതലുകൾ സൂക്ഷിക്കേണ്ട ചുമതല കോടതിയിലെ തൊണ്ടി ക്ലർക്കിനാണ്. സംഭവത്തിന്റെ ഗൗരവം കണക്കിലെടുത്ത് ജില്ലാ പ്രിൻസിപ്പൽ സെഷൻസ് കോടതിയാണ് ആഭ്യന്തര അന്വേഷണത്തിന് ഉത്തരവിടേണ്ടത്.
എൻ.ഡി.എ പ്രവർത്തകനും തേജസ് പത്രത്തിന്റെ ഏജന്റുമായിരുന്ന മുഹമ്മദ് ഫസലിനെ 2006 ഒക്ടോബർ 22-ന് പുലർച്ചെ പത്രം വിതരണം ചെയ്യാൻ പോകുന്നതിനിടയിലാണ് തലശ്ശേരിയിൽ വെച്ച് സി.പി.എം ക്രിമിനൽ സംഘം കൊലപ്പെടുത്തുന്നത്. കേസിൽ സി.പി.എം നേതാവും തലശ്ശേരി എം.എൽ.എയുമായ കാരായി രാജൻ, കാരായി ചന്ദ്രശേഖരൻ, കൊടി സുനി അടക്കമുള്ളവരാണ് പ്രതികൾ. കൊലപാതകത്തിന് പിന്നിൽ ആർ.എസ്.എസ് പ്രവർത്തകരാണെന്ന് വരുത്തിതീർക്കാനും പ്രദേശത്ത് വർഗീയ സംഘർഷം ഉണ്ടാക്കാനും സി.പി.എം ആസൂത്രിത ശ്രമം നടത്തിയിരുന്നു. ഇതിന്റെ ഭാഗമായി ധർമ്മടം അണ്ടലൂർ ഭാഗത്തുള്ള ഒരു ആർ.എസ്.എസ് പ്രവർത്തകന്റെ വീടിനടുത്ത് ഫസലിന്റെ രക്തത്തിൽ മുക്കിയ തൂവാല കൊണ്ടുപോയിടുകയായിരുന്നു.
സി.പി.എം നേതാക്കളുടെ ഈ ഗൂഢാലോചനയും സുത്രധാരത്വവും സി.ബി.ഐ അന്വേഷണത്തിൽ വ്യക്തമായി തെളിഞ്ഞിട്ടുള്ളതാണ്. കൊലപാതകം നടന്ന സമയത്ത് ഫസലിന്റെ യഥാർത്ഥ തൂവാല അദ്ദേഹത്തിന്റെ കൈയിൽ തന്നെയുണ്ടായിരുന്നു. കാണാതായ തൂവാലയുടെ ഫോറൻസിക് പരിശോധനകൾ നേരത്തെ തന്നെ പൂർത്തിയാക്കി റിപ്പോർട്ട് കോടതിയിൽ സമർപ്പിച്ചിട്ടുള്ളതിനാൽ, തൊണ്ടിമുതൽ നഷ്ടപ്പെട്ടത് കേസ് തെളിയിക്കുന്നതിനോ പ്രൊസിക്യൂഷൻ നടപടികൾക്കോ യാതൊരുവിധ തടസ്സവും ഉണ്ടാക്കില്ലെന്ന് അധികൃതർ വ്യക്തമാക്കി.
