തൃശ്ശൂര്: കോര്പ്പറേഷന്റെ കൂര്ക്കഞ്ചേരി സോണല് ഓഫീസില് അതിക്രമിച്ചു കയറിയ അജ്ഞാതന് പണമോ മറ്റ് വിലപിടിപ്പുള്ള വസ്തുക്കളോ കവരാതെ ഫയലുകളും ലാപ്ടോപ്പും മാത്രം കേന്ദ്രീകരിച്ച് പരിശോധന നടത്തിയത് ദുരൂഹതയുണര്ത്തുന്നു. ഓഫീസിലെ സുപ്രധാന രേഖകള് ചോര്ത്തുക എന്ന ലക്ഷ്യത്തോടെയാണോ ഈ ‘അദൃശ്യ ഓപ്പറേഷന്’ നടന്നതെന്ന സംശയം ശക്തമായിട്ടുണ്ട്.
പിന്വാതിലിന്റെ പൂട്ട് തകര്ത്ത് അകത്തുകയറിയ വ്യക്തി ഓഫീസിലെ മുഴുവന് മുറികളുടെയും അലമാരകളുടെയും പൂട്ടുകള് തല്ലിത്തകര്ത്തിട്ടുണ്ട്. സാധാരണ മോഷണശ്രമങ്ങളില് പണവും സ്വര്ണ്ണവും തിരയാറുള്ള സ്ഥാനത്ത്, ഇവിടെ ഫയലുകള് ഓരോന്നായി വിശദമായി പരിശോധിച്ച നിലയിലാണ് കണ്ടെത്തിയത്. ഓഫീസിനുള്ളിലുണ്ടായിരുന്ന ലാപ്ടോപ്പ് തുറന്ന് പരിശോധിച്ച ശേഷം അത് പുറത്തെ വാതിലിന് സമീപം ഉപേക്ഷിച്ച നിലയില് കണ്ടെത്തുകയായിരുന്നു.
മേശകളും അലമാരകളും തകര്ത്തുവെച്ചെങ്കിലും കൗണ്ടറുകളിലിരുന്ന പണമൊന്നും നഷ്ടപ്പെട്ടിട്ടില്ല. രാവിലെ പതിവുപോലെ ജോലിക്കെത്തിയ ആരോഗ്യവിഭാഗം ജീവനക്കാരാണ് ഓഫീസിന്റെ വാതിലുകള് തുറന്നുകിടക്കുന്നതും അകത്ത് സാധനങ്ങള് വാരിവലിച്ചിട്ടതായും ആദ്യം കണ്ടത്. കോര്പ്പറേഷന് അധികൃതര് നല്കിയ പരാതിയെ തുടര്ന്ന് ഈസ്റ്റ് പോലീസ് സ്ഥലത്തെത്തി അന്വേഷണം ആരംഭിച്ചു. ശാസ്ത്രീയ തെളിവുകളും സിസിടിവി ദൃശ്യങ്ങളും കേന്ദ്രീകരിച്ചാണ് പോലീസ് പരിശോധന.
‘ഓഫീസിലെ പണമൊന്നും നഷ്ടപ്പെട്ടിട്ടില്ല എന്നത് വസ്തുതയാണ്. എന്നാല് വളരെ തന്ത്രപ്രധാനമായ എന്തെങ്കിലും രേഖകളോ വിവരങ്ങളോ നഷ്ടപ്പെട്ടിട്ടുണ്ടോ എന്ന് ഇപ്പോള് പറയാനാകില്ല. ഓഫീസിലെ ഫയലുകള് കൃത്യമായി ഒത്തുനോക്കി വരികയാണ്. അതിനുശേഷമേ കൃത്യമായ ചിത്രം വ്യക്തമാകൂ ഡെപ്യൂട്ടി മേയര് എ പ്രസാദ് പറഞ്ഞു.
