ഗ്രേറ്റര്‍ നോയിഡ: സ്റ്റാഫ് സെലക്ഷന്‍ കമ്മീഷന്‍ നടത്തുന്ന ഓണ്‍ലൈന്‍ പരീക്ഷകളില്‍ വന്‍തോതില്‍ ക്രമക്കേട് നടത്തിവന്ന പ്രമുഖ തട്ടിപ്പ് സംഘത്തെ ഉത്തര്‍പ്രദേശ് സ്‌പെഷ്യല്‍ ടാസ്‌ക് ഫോഴ്സ് പിടികൂടി. പരീക്ഷ പാസാക്കി നല്‍കാമെന്ന് ഉറപ്പുനല്‍കി ഒരോ ഉദ്യോഗാര്‍ത്ഥിയില്‍ നിന്നും നാല് ലക്ഷം രൂപയോളം ഈടാക്കിയാണ് ഇവര്‍ തട്ടിപ്പ് നടത്തിയിരുന്നത്. ഗ്രേറ്റര്‍ നോയിഡയിലെ ഒരു പരീക്ഷാ കേന്ദ്രത്തില്‍ നടത്തിയ റെയ്ഡില്‍ സംഘത്തിന്റെ സൂത്രധാരന്‍ ഉള്‍പ്പെടെ ഏഴുപേരെ എസ്.ടി.എഫ് അറസ്റ്റ് ചെയ്തു. ഇവരില്‍ നിന്ന് 50 ലക്ഷം രൂപയോളം നഗരപ്പണവും ലാപ്‌ടോപ്പുകളും മൊബൈല്‍ ഫോണുകളും പരീക്ഷയുമായി ബന്ധപ്പെട്ട നിരവധി രേഖകളും പിടിച്ചെടുത്തിട്ടുണ്ട്.
സെന്‍ട്രല്‍ ആംഡ് പോലീസ് ഫോഴ്സ്, സെക്രട്ടേറിയറ്റ് സെക്യൂരിറ്റി ഫോഴ്സ്, കോണ്‍സ്റ്റബിള്‍ ജി.ഡി, അസം റൈഫിള്‍സ് റൈഫിള്‍മാന്‍ പരീക്ഷ-2026 എന്നിവയ്‌ക്കായി നടത്തുന്ന ഓണ്‍ലൈന്‍ പരീക്ഷകളിലാണ് ഈ സംഘം ക്രമക്കേട് നടത്തിയിരുന്നതെന്ന് എസ്.ടി.എഫ് വ്യക്തമാക്കി. പരീക്ഷാ സമയത്ത് തന്നെ തത്സമയം ഉദ്യോഗാര്‍ത്ഥികള്‍ക്ക് ഉത്തരങ്ങള്‍ എത്തിച്ചുനല്‍കാന്‍ അത്യാധുനിക സാങ്കേതിക വിദ്യകളാണ് ഇവര്‍ ഉപയോഗിച്ചിരുന്നത്. എസ്.എസ്.സി ഓണ്‍ലൈന്‍ പരീക്ഷകളില്‍ സംഘടിതമായി കൊള്ളരുതായ്മകള്‍ നടക്കുന്നുണ്ടെന്ന രഹസ്യവിവരത്തെ തുടര്‍ന്ന് നടത്തിയ രഹസ്യ അന്വേഷണമാണ് ഗ്രേറ്റര്‍ നോയിഡയിലെ നോളജ് പാര്‍ക്ക് മേഖലയിലുള്ള ‘ബാലാജി ഡിജിറ്റല്‍ സോണ്‍’ എന്ന പരീക്ഷാ കേന്ദ്രത്തിലേക്ക് ഉദ്യോഗസ്ഥരെ എത്തിച്ചത്.
മെയ് 22-ന് എസ്.ടി.എഫ് ഇവിടെ നടത്തിയ മിന്നല്‍ പരിശോധനയിലാണ് പ്രദീപ് ചൗഹാന്‍, അരുണ്‍ കുമാര്‍, സന്ദീപ് ഭാട്ടി, നിഷാന്ത് രാഘവ്, അമിത് റാണ, ഷാക്കിര്‍ മാലിക്, വിവേക് കുമാര്‍ എന്നീ ഏഴ് പ്രതികള്‍ പിടിയിലാവുന്നത്. പ്രതികള്‍ എസ്.എസ്.സി പരീക്ഷാ സംവിധാനം നേരിട്ട് ഹാക്ക് ചെയ്യുകയല്ല ചെയ്തത്. പകരം, പരീക്ഷാ കേന്ദ്രത്തിലെ കമ്പനി സെര്‍വറുകളെ മറികടന്ന് ഇവര്‍ സ്വന്തമായി ഒരു ‘പ്രോക്‌സി സെര്‍വര്‍’ സ്ഥാപിക്കുകയായിരുന്നു. സ്‌ക്രീന്‍ ഷെയറിങ് ആപ്ലിക്കേഷനുകള്‍ വഴി ചോദ്യപ്പേപ്പറുകള്‍ പരീക്ഷാ കേന്ദ്രത്തിന് പുറത്തിരിക്കുന്ന വിദഗ്ധരിലേക്ക് തത്സമയം എത്തിച്ചു.
പുറത്തിരിക്കുന്ന ഈ വിദഗ്ധര്‍ ചോദ്യങ്ങള്‍ പരിഹരിക്കുകയും റിമോട്ട് ആക്‌സസ് വഴി പരീക്ഷാ കേന്ദ്രത്തിലിരിക്കുന്ന ഉദ്യോഗാര്‍ത്ഥികളുടെ കമ്പ്യൂട്ടറുകളില്‍ കൃത്യമായ ഉത്തരങ്ങള്‍ രേഖപ്പെടുത്തുകയും ചെയ്തു. പ്രതികളിലൊരാളായ പ്രദീപ് ചൗഹാന്‍ ദീര്‍ഘനാളായി ഈ തട്ടിപ്പ് ശൃംഖല നടത്തിവരികയായിരുന്നു. ‘എഡ്യൂക്വിറ്റി’ എന്ന കമ്പനി വഴി എസ്.എസ്.സി ഓണ്‍ലൈന്‍ പരീക്ഷകള്‍ നടത്തുന്ന ഈ കേന്ദ്രം സജ്ജീകരിച്ചത് ഇയാളാണ്. സാങ്കേതിക കാര്യങ്ങളും പ്രോക്‌സി സെര്‍വര്‍ ഇന്‍സ്റ്റാളേഷനും നിയന്ത്രിച്ചിരുന്നത് അരുണ്‍ കുമാര്‍ എന്ന പ്രതിയായിരുന്നു.
സമീപകാലത്ത് രാജ്യത്ത് വലിയ വിവാദമുണ്ടാക്കിയ ‘നീറ്റ്-യു.ജി 2026’ ചോദ്യപ്പേപ്പര്‍ ചോര്‍ച്ചയ്‌ക്ക് പിന്നാലെ പരീക്ഷകളുടെ സുതാര്യതയെക്കുറിച്ച് രാജ്യവ്യാപകമായി കടുത്ത ആശങ്കകള്‍ നിലനില്‍ക്കുന്ന സാഹചര്യത്തിലാണ് ഈ പുതിയ അറസ്റ്റ്. ഈ തട്ടിപ്പ് ശൃംഖലയില്‍ ഉള്‍പ്പെട്ടിട്ടുള്ള മറ്റ് സാങ്കേതിക വിദഗ്ധര്‍, ഇടനിലക്കാര്‍, ഇതിന്റെ ആനുകൂല്യം കൈപ്പറ്റിയ ഉദ്യോഗാര്‍ത്ഥികള്‍ എന്നിവരെ കണ്ടെത്താനായി എസ്.ടി.എഫ് അന്വേഷണം വ്യാപിപ്പിച്ചിട്ടുണ്ട്. കഴിഞ്ഞ വര്‍ഷങ്ങളില്‍ നടന്ന മറ്റ് റിക്രൂട്ട്മെന്റ് പരീക്ഷകളിലും ഇതേ രീതിയിലുള്ള തട്ടിപ്പുകള്‍ നടന്നിട്ടുണ്ടോ എന്നും ഉദ്യോഗസ്ഥര്‍ പരിശോധിക്കുന്നുണ്ട്.
