ന്യൂഡൽഹി: ഇന്ത്യയുടെ ബ്രിക്സ് അധ്യക്ഷതയ്‌ക്ക് കീഴിൽ, ബ്രിക്സ് വനിതാ വർക്കിംഗ് ഗ്രൂപ്പിന്റെ രണ്ടാമത് തയ്യാറെടുപ്പ് യോഗം കേന്ദ്ര വനിതാ ശിശുവികസന മന്ത്രാലയം സംഘടിപ്പിച്ചു. വനിതാ ശിശുവികസന മന്ത്രാലയം സെക്രട്ടറി അനിൽ മാലിക് വെർച്വൽ പ്ലാറ്റ്‌ഫോമിലൂടെയാണ് ഈ യോഗത്തിന് അധ്യക്ഷത വഹിച്ചത്.
പ്രതിരോധശേഷി, നവീകരണം, സഹകരണം, സുസ്ഥിരത എന്നിവയ്‌ക്കായുള്ള നിർമ്മിതി എന്ന ഇന്ത്യയുടെ ബ്രിക്സ് അധ്യക്ഷതയുടെ മുഖ്യ പ്രമേയത്തിന് കീഴിൽ, പരസ്പര മുൻഗണനകൾ മുന്നോട്ട് കൊണ്ടുപോകുന്നതിന് ബ്രിക്സ് അംഗരാജ്യങ്ങൾക്കിടയിൽ തുടർച്ചയായ സഹകരണം ഉണ്ടാകേണ്ടതിന്റെ പ്രാധാന്യം യോഗത്തിൽ അനിൽ മാലിക് എടുത്തുപറഞ്ഞു. വനിതകളുടെ ഡിജിറ്റൽ-സാമ്പത്തിക പങ്കാളിത്തം, സംരംഭകത്വം എന്നിവയ്‌ക്കായുള്ള ശേഷി വികസന ചട്ടക്കൂട്, മികച്ച പ്രവർത്തനങ്ങളുടെ ശേഖരം എന്നിവയുൾപ്പെടെയുള്ള പ്രധാന മുൻഗണനാ മേഖലകളിൽ പൊതുവായ സമവായം രൂപീകരിക്കുന്നതിനെക്കുറിച്ചും ബഹുരാഷ്‌ട്ര സഹകരണം ശക്തിപ്പെടുത്തുന്നതിനെക്കുറിച്ചും യോഗത്തിൽ പങ്കെടുത്ത ബ്രിക്സ് അംഗരാജ്യങ്ങൾ ആശയവിനിമയം നടത്തി.
ബ്രിക്സ് അംഗങ്ങൾക്കിടയിൽ സംഭാഷണങ്ങൾ, പരസ്പര പഠനം, ഫലപ്രാപ്തിയിലൂന്നിയ സഹകരണം എന്നിവ പ്രോത്സാഹിപ്പിക്കുന്നതിനുള്ള ഇന്ത്യയുടെ പ്രതിജ്ഞാബദ്ധത ചെയർമാൻ ആവർത്തിച്ചു. ചർച്ചകളെ കേവലം സംഭാഷണങ്ങളിൽ ഒതുക്കാതെ, വിശാലമായ ബ്രിക്സ് അജണ്ടയ്‌ക്ക് അർത്ഥവത്തായ സംഭാവനകൾ നൽകുന്ന പ്രായോഗിക ഫലങ്ങളിലേക്ക് മാറ്റേണ്ടതിന്റെ പ്രാധാന്യവും അദ്ദേഹം യോഗത്തിൽ ഊന്നിപ്പറഞ്ഞു.
