തിരുവനന്തപുരം: നിയമസഭയിൽ ഗവർണറുടെ നയപ്രഖ്യാപന പ്രസംഗത്തിന് മുന്നോടിയായി വന്ദേമാതരം മുഴുവൻ ആലപിക്കാത്തതിൽ ശക്തമായ പ്രതിഷേധവുമായി ബിജെപി എംഎൽഎ വി. മുരളീധരൻ. ഗവർണർ പങ്കെടുക്കുന്ന പരിപാടികളിൽ ദേശീയ ഗീതമായ വന്ദേമാതരം മുഴുവൻ ആലപിക്കണം എന്ന കേന്ദ്രസർക്കാർ നിർദേശമുണ്ടായിട്ടും നിയമസഭയിൽ അത് പാലിക്കപ്പെട്ടില്ല. ഇത് ലോക്ഭവനോടും ഗവർണറോടുമുള്ള അവഹേളനമാണ്. ജമാ അത്തെ ഇസ്ലാമിക്കും സിപിഎമ്മിനും വഴങ്ങുകയാണ് വി.ഡി സതീശൻ സർക്കാറെന്ന് വി. മുരളീധരൻ ചൂണ്ടിക്കാട്ടി.
വി. മുരളീധരൻ എംഎൽഎ ഫേസ്ബുക്കിൽ പങ്കുവച്ച കുറിപ്പ്
ബഹുമാനപ്പെട്ട ഗവർണർ പങ്കെടുക്കുന്ന പരിപാടികളിൽ ദേശീയ ഗീതമായ വന്ദേമാതരം മുഴുവൻ ആലപിക്കണം എന്ന കേന്ദ്രസർക്കാർ നിർദേശമുണ്ടായിട്ടും നിയമസഭയിൽ അത് പാലിക്കപ്പെട്ടില്ല. ഇത് ലോക്ഭവനോടും ബഹു.ഗവർണറോടുമുള്ള അവഹേളനമാണ്.
150 ആം വാർഷികം ആഘോഷിക്കുന്ന ദേശീയഗീതവും അപമാനിക്കപ്പെട്ടു. ജമാ അത്തെ ഇസ്ലാമിക്കും സിപിഎമ്മിനും വഴങ്ങുകയാണ് വി.ഡി സതീശൻ സർക്കാർ എന്ന് വ്യക്തം…ദേശീയഗീതം മതനിരപേക്ഷതയ്ക്ക് നിരക്കാത്തത് എന്ന അവരുടെ വാദം സർക്കാർ അംഗീകരിക്കുന്നു എന്നാണ് ഇതിലൂടെ വ്യക്തമാകുന്നത്. 1896ൽ കോൺഗ്രസ് ദേശീയ സമ്മേളനത്തിൽ ആദ്യമായി ആലപിച്ച ‘വന്ദേമാതര’ത്തോട് എന്നുമുതലാണ് കോൺഗ്രസിന് അയിത്തം തുടങ്ങിയത് എന്ന് വി.ഡി സതീശൻ വ്യക്തമാക്കണം…ശക്തമായ പ്രതിഷേധം രേഖപ്പെടുത്തുന്നു…
വന്ദേമാതരം പൂർണ്ണ രൂപത്തിൽ ആലപിക്കാത്തത് ഗുരുതര പ്രോട്ടോക്കോൾ ലംഘനമാണ് . ദേശീയ ഗീതമായ വന്ദേമാതരത്തിന് പൂർണ്ണരൂപത്തിലുള്ള ആറ് ചരണങ്ങളും ആലപിക്കണമെന്നാണ് കേന്ദ്ര ആഭ്യന്തര മന്ത്രാലയത്തിന്റെ ഉത്തരവ്. വന്ദേമാതരം പൂർണ്ണമായി ആലപിക്കാത്തത് ഗുരുതര ചട്ടലംഘനമായാണ് ലോക്ഭവനും കണക്കാക്കുന്നത്. ദേശീയ ഗീതത്തിന്റെ പൂർണ്ണരൂപം ആലപിക്കാത്തതിൽ ഗവർണർ സർക്കാരിനോട് വിശദീകരണം തേടാനും സാധ്യതയുണ്ട്. സത്യപ്രതിജ്ഞ ചടങ്ങിൽ ദേശീയ ഗീതം പൂർണ്ണമായും ആലപിച്ചിരുന്നു. എന്നാൽ നിലവിലെ നിലപാട് മാറ്റം മുസ്ലിം ലീഗ് അടക്കമുള്ള വർഗീയ കക്ഷികളെ ഭയന്നാണ് എന്നാണ് വ്യക്തമാകുന്നത്.
വന്ദേമാതരത്തിന്റെ 150-ാം വാർഷികത്തിലാണ് ദേശീയ ഗീതമായ വന്ദേമാതരത്തിനും ആഭ്യന്തര മന്ത്രാലയം പ്രോട്ടോകോൾ നിർബന്ധമാക്കിയത്. ദേശീയ ഗാനത്തിന് സമാനമാണിത്. ഔദ്യോഗിക ചടങ്ങുകളിൽ വന്ദേമാതരത്തിന്റെ പൂർണ്ണരൂപത്തിലുള്ള ആറ് ചരണങ്ങളും ആലപിക്കണം. വന്ദേമാതരത്തിന്റെ ഈ ഔദ്യോഗിക പതിപ്പിന്റെ ആകെ ദൈർഘ്യം 3 മിനിറ്റ് 10 സെക്കൻഡ് (190 സെക്കൻഡ്) ആയിരിക്കണമെന്നാണ് ചട്ടം. ഇതെല്ലാം കേരള നിയമസഭയിൽ ലംഘിക്കപ്പെട്ടു.
