പാലക്കാട്: ഇസ്ലാമിക് ഫ്രണ്ട്‌ലി ജിമ്മിൽ പൊലീസിൽ പരാതി നൽകി ബിജെപി ഈസ്റ്റ് ജില്ലാ അധ്യക്ഷൻ പ്രശാന്ത് ശിവൻ. ഫണ്ടിംഗ്, ഉടമസ്ഥാവകാശം, ലക്ഷ്യങ്ങൾ എന്നിവ ഉൾപ്പെടെ അന്വേഷിക്കണമെന്ന് പരാതിയിൽ അദ്ദേഹം ആവശ്യപ്പെട്ടു. ഇത്തരം രീതികൾ സമൂഹത്തിൽ വേർതിരിവ് സൃഷ്ടിക്കുന്നു എന്നും പരാതിയിൽ ചൂണ്ടിക്കാട്ടുന്നു. പൊതു വാണിജ്യ സ്ഥാപനങ്ങളിൽ ഇത്തരം വേർതിരിവുകൾ കൊണ്ടുവരുന്നത് വർഗീയ ധ്രുവീകരണത്തിനും പൊതുസമാധാന തകർച്ചയ്ക്കും കാരണമാകുമെന്ന് ചൂണ്ടിക്കാട്ടിയാണ് ജില്ലാ പോലീസ് മേധാവിക്ക് പരാതി നൽകിയിരിക്കുന്നത്
സംഭവത്തിൽ അടിയന്തര അന്വേഷണം നടത്തി എഫ്ഐആർ രജിസ്റ്റർ ചെയ്യണമെന്നാണ് ബിജെപിയുടെ ആവശ്യം. ‘j.a.u.h.a.r.a.l.i’ എന്ന സോഷ്യൽ മീഡിയ അക്കൗണ്ട് വഴി പ്രചരിച്ച ഒരു പ്രൊമോഷണൽ വീഡിയോ ശ്രദ്ധയിൽപ്പെട്ടതിനെത്തുടർന്നാണ് പരാതി.
പുതനഗരത്തിൽ പുതുതായി നവീകരിച്ച ‘എഎസ്ബി ജിം’ (ASB Gym) എന്ന സ്ഥാപനത്തെ പരിചയപ്പെടുത്തുന്ന വീഡിയോയിൽ, ഇത് ശരീഅത്ത് നിയമപ്രകാരമാണ് പ്രവർത്തിക്കുന്നതെന്ന് പ്രചാരകൻ അവകാശപ്പെടുന്നത്. ഫിറ്റ്നസ് നിയമങ്ങളുടെ മറവിൽ മതപരമായ കൽപനകളെ അടിസ്ഥാനമാക്കി കർശനമായ നിയന്ത്രണങ്ങളാണ് ഈ സ്ഥാപനം നടപ്പിലാക്കുന്നത്
കൃത്യമായ സമയക്രമങ്ങളോടെയുള്ള കർശനമായ സ്ത്രീ-പുരുഷ വേർതിരിവ്, ജിമ്മിനുള്ളിൽ സംഗീതം പൂർണമായും നിരോധിക്കൽ, കർശനമായ മതപരമായ വസ്ത്രധാരണ രീതി അടിച്ചേൽപ്പിക്കൽ, സൗഹൃദപരമായ സംഭാഷണങ്ങൾക്കും ചർച്ചകൾക്കും നിയന്ത്രണം ഏർപ്പെടുത്തൽ എന്നിവയാണ് ജിമ്മിലെ നിയമങ്ങളായി സോഷ്യൽ മീഡിയ പോസ്റ്റുകളിൽ ഉള്ളതെന്ന് പരാതിയിൽ ചൂണ്ടിക്കാണിക്കുന്നു.
കേരളം പോലുള്ള ഒരു മതേതര സംസ്ഥാനത്ത് പൊതുവായ ഒരു വാണിജ്യ ഫിറ്റ്നസ് സെന്റർ “ശരീഅത്ത് അനുസൃതമാണ്” എന്ന് പ്രഖ്യാപിക്കുന്നത് അപകടകരമായ കീഴ്‌വഴക്കമാണെന്ന് പ്രശാന്ത് ശിവൻ എസ്‌പിക്ക് നൽകിയ കത്തിൽ പറയുന്നു. എല്ലാ സമുദായങ്ങളിലെയും ആളുകൾ ഒത്തുപോകുന്ന പൊതു ഇടങ്ങളിൽ ഇത് ബോധപൂർവ്വം വർഗീയ വേർതിരിവ് ഉണ്ടാക്കും.
മുൻകാലങ്ങളിൽ കേരളത്തിലുണ്ടായ തീവ്രവാദ നെറ്റ്‌വർക്കുകളുടെ സാന്നിധ്യവും നിരോധിക്കപ്പെട്ട പിഎഫ്ഐ, സിമി തുടങ്ങിയ സംഘടനകളുടെ ചരിത്രവും കണക്കിലെടുക്കുമ്പോൾ, പൊതു ഇടങ്ങളിൽ ഇത്തരം കടുംപിടുത്തങ്ങൾ കൊണ്ടുവരുന്നത് കർശനമായ സുരക്ഷാ നിരീക്ഷണത്തിന് വിധേയമാക്കണമെന്നും ബിജെപി ആവശ്യപ്പെട്ടു
ഭാരതീയ ന്യായ സംഹിത 2023-ലെ സെക്ഷൻ 196 (വിവിധ വിഭാഗങ്ങൾക്കിടയിൽ ശത്രുത വളർത്തൽ), സെക്ഷൻ 197 (ദേശീയ ഐക്യത്തിന് വിരുദ്ധമായ പ്രസ്താവനകൾ നടത്തൽ), സെക്ഷൻ 353 (പൊതുജനങ്ങളെ തെറ്റിദ്ധരിപ്പിക്കുന്നതും വിദ്വേഷം ഉണ്ടാക്കുന്നതുമായ പ്രചാരണം) എന്നിവ പ്രകാരം കേസെടുക്കണമെന്നാണ് ബിജെപിയുടെ ആവശ്യം.
പുതനഗരത്തിലെ എഎസ്ബി ജിമ്മിന് പിന്നിലെ ഫണ്ടിംഗ്, ഉടമസ്ഥാവകാശം, പ്രത്യയശാസ്ത്രപരമായ ലക്ഷ്യങ്ങൾ എന്നിവയെക്കുറിച്ച് അന്വേഷിക്കുക, സംഘാടകർക്കെതിരെ കേസെടുക്കുക, ഇത്തരം വേർതിരിവ് കാണിക്കുന്ന രീതികൾ നിർത്തലാക്കുക എന്നീ ആവശ്യങ്ങളാണ് പോലീസിന് മുന്നിൽ വെച്ചിട്ടുള്ളത്. കൂടാതെ, മതേതര വാണിജ്യ മാർഗനിർദേശങ്ങൾ ലംഘിച്ചതിന്റെ അടിസ്ഥാനത്തിൽ ഈ ജിംനേഷ്യത്തിന്റെ വ്യാപാര ലൈസൻസ് റദ്ദാക്കണമെന്ന് ആവശ്യപ്പെട്ട് പുതനഗരം ഗ്രാമപഞ്ചായത്ത് അധികാരികൾക്ക് പ്രത്യേകം നിവേദനം സമർപ്പിക്കുമെന്നും ബിജെപി ജില്ലാ നേതൃത്വം വ്യക്തമാക്കി.
