ന്യൂഡല്ഹി: ലോക പരിസ്ഥിതി ദിനത്തോടനുബന്ധിച്ച് ഡല്ഹിയില് പതിനെട്ട് ‘നമോ ഓക്സിജന് പാര്ക്കുകള്’ ഉദ്ഘാടനം ചെയ്തു. കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രി ഭൂപേന്ദര് യാദവും ഡല്ഹി മുഖ്യമന്ത്രി രേഖാ ഗുപ്തയും ചേര്ന്നാണ് പാര്ക്കുകളുടെ ഉദ്ഘാടനം നിര്വ്വഹിച്ചത്. ഇതോടൊപ്പം രാജ്യവ്യാപകമായി നടപ്പിലാക്കുന്ന ‘ഏക് പേഡ് മാ കേ നാം’ (അമ്മയുടെ പേരില് ഒരു തൈ) കാമ്പയിന്റെ ഭാഗമായുള്ള വിവിധ പരിസ്ഥിതി സൗഹൃദ പദ്ധതികള്ക്കും കേന്ദ്രമന്ത്രി തുടക്കം കുറിച്ചു.
പ്രധാനമന്ത്രി നരേന്ദ്ര മോദിയുടെ നേതൃത്വത്തില് പരിസ്ഥിതി സംരക്ഷണ പ്രവര്ത്തനങ്ങളില് ഇന്ത്യ ഇന്ന് ആഗോളതലത്തില് മുന്പന്തിയിലാണെന്ന് ചടങ്ങില് സംസാരിച്ച ഭൂപേന്ദര് യാദവ് പറഞ്ഞു. സൗരോര്ജ്ജ ഉത്പാദന ശേഷി വര്ദ്ധിപ്പിക്കുന്നതില് ലോകത്തിലെ മുന്നിര രാജ്യങ്ങളിലൊന്നായി മാറുക, അന്താരാഷ്ട്ര സോളാര് അലയന്സ് രൂപീകരിക്കുക, ഇന്റര്നാഷണല് ബിഗ് ക്യാറ്റ് അലയന്സ് ആരംഭിക്കുക, യുഎന് കാലാവസ്ഥാ വ്യതിയാന കണ്വെന്ഷന് കീഴിലുള്ള ലക്ഷ്യങ്ങള് നിശ്ചിത സമയത്തിന് മുന്പ് തന്നെ കൈവരിക്കുക തുടങ്ങിയ വലിയ നേട്ടങ്ങള് ഇന്ത്യ സ്വന്തമാക്കിയതായി അദ്ദേഹം ചൂണ്ടിക്കാട്ടി. ‘ഏക് പേഡ് മാ കേ നാം’ എന്ന പ്രധാനമന്ത്രിയുടെ ദീര്ഘവീക്ഷണം വൃക്ഷത്തൈ നടീലിനെ നന്ദിയും ഉത്തരവാദിത്തവുമുള്ള ഒരു ജനകീയ പ്രസ്ഥാനമാക്കി മാറ്റിയെന്നും, തൈകള് നടുന്നതിനൊപ്പം അവയെ വരുംതലമുറയ്ക്കായി സംരക്ഷിച്ചു വളര്ത്താന് ഓരോ പൗരനും മുന്നോട്ടു വരണമെന്നും അദ്ദേഹം അഭ്യര്ത്ഥിച്ചു.
ഡല്ഹിയിലെ വായുഗുണനിലവാരം മെച്ചപ്പെടുത്തുന്നതിനുള്ള ഏറ്റവും പ്രധാനപ്പെട്ട മാര്ഗ്ഗം ഹരിതാഭ വര്ദ്ധിപ്പിക്കുക എന്നതാണെന്ന് ഡല്ഹി മുഖ്യമന്ത്രി രേഖാ ഗുപ്ത ചടങ്ങില് വ്യക്തമാക്കി. ഡല്ഹിയിലുടനീളം 15 ലക്ഷം വൃക്ഷത്തൈകള് നട്ടുപിടിപ്പിക്കാനാണ് ഡല്ഹി സര്ക്കാര് ലക്ഷ്യമിടുന്നത്. പരിസ്ഥിതി സംരക്ഷണത്തില് പൊതുജന പങ്കാളിത്തം അനിവാര്യമാണെന്ന് വ്യക്തമാക്കിയ മുഖ്യമന്ത്രി, തൈകള് വെച്ചുപിടിപ്പിക്കുന്നതില് മാത്രമല്ല, അവയുടെ തുടര്ന്നുള്ള പരിചരണത്തിലും ജനങ്ങള് ഒത്തൊരുമിച്ച് പ്രവര്ത്തിക്കണമെന്നും കൂട്ടിച്ചേര്ത്തു.
ചടങ്ങിന്റെ ഭാഗമായി വിശിഷ്ടാതിഥികള് ‘ഏക് പേഡ് മാ കേ നാം’ കാമ്പയിന് കീഴില് വൃക്ഷത്തൈകള് നടുകയും, ‘പൊടിരഹിത ഡല്ഹി’ പദ്ധതിയുടെ ഭാഗമായി പ്രാദേശിക പുല്വര്ഗ്ഗങ്ങളെയും ചെടികളെയും പരിചയപ്പെടുത്തുന്ന പ്രദര്ശനം സന്ദര്ശിക്കുകയും ചെയ്തു. കൂടാതെ, ഡല്ഹി സര്ക്കാര് തയ്യാറാക്കിയ ‘വര്ക്കിംഗ് പ്ലാന് ഫോര് ഡല്ഹി’, ‘അസോള ഭാട്ടി സാങ്ച്വറി മാനേജ്മെന്റ് പ്ലാന്’, ‘ഡല്ഹി ബേര്ഡ് അറ്റ്ലസ്’ എന്നീ മൂന്ന് പ്രധാന പരിസ്ഥിതി പ്രസിദ്ധീകരണങ്ങളും ചടങ്ങില് പ്രകാശനം ചെയ്തു.
