പാരിസ്: ബാഴ്സലോണ പ്രതിരോധ താരം യൂള്സ് കുണ്ടെയുടെ മോശം ഫോം തുടരുന്നു. ലോകകപ്പ് ഒരുക്കങ്ങളുടെ ഭാഗമായി നടന്ന സൗഹൃദ മത്സരത്തില് കരുത്തരായ ഫ്രാന്സ് ഐവറി കോസ്റ്റിനോട് പരാജയപ്പെട്ടു. ഈ സീസണില് തന്റെ പ്രകടനം പ്രതീക്ഷിച്ച നിലവാരത്തിലേക്ക് ഉയര്ന്നിട്ടില്ലെന്ന് മത്സരത്തിന് മുന്പ് കുണ്ടെ തന്നെ തുറന്നുപറഞ്ഞിരുന്നുവെങ്കിലും, പരിശീലകന് ദിദിയര് ദെഷാംപ്സ് താരത്തെ ആദ്യ ഇലവനില് ഉള്പ്പെടുത്തിയാണ് ഫ്രാന്സിനെ കോര്ട്ടിലിറക്കിയത്.
മത്സരത്തില് റായന് ചെര്ക്കിയിലൂടെ ഫ്രാന്സാണ് ആദ്യം ലീഡെടുത്തത്. എന്നാല് ഒന്നിനെതിരെ രണ്ട് ഗോളുകള്ക്ക് ഐവറി കോസ്റ്റ് മത്സരം പിടിച്ചെടുക്കുകയായിരുന്നു. ഗുവേല ദൗവെ, അമാദ് ഡിയാലോ എന്നിവരാണ് ഐവറി കോസ്റ്റിനായി ഗോളുകള് നേടിയത്. കുണ്ടെയെ സംബന്ധിച്ച് കടുത്ത വെല്ലുവിളി നിറഞ്ഞ മത്സരമായിരുന്നു ഇത്. കളിയുടെ തുടക്കത്തില് മധ്യനിരയിലൂടെ ലഭിച്ച ഒരു മികച്ച അവസരം താരം പാഴാക്കി.
കൂടാതെ 43, 66 മിനിറ്റുകളില് പന്ത് അപകടകരമായ രീതിയില് എതിരാളികള്ക്ക് കൈമാറുകയും ചെയ്തു. എങ്കിലും ചില മികച്ച ഇടപെടലുകള് നടത്താന് താരത്തിന് കഴിഞ്ഞിട്ടുണ്ട്. ആദ്യ പകുതിയില് കളിയില് അത്ര സജീവമല്ലാതിരുന്ന താരം രണ്ടാം പകുതിയില് കൂടുതല് ഇടപെടലുകള് നടത്തിയെങ്കിലും പലപ്പോഴും ധൃതി കൂട്ടുന്നതായി കാണപ്പെട്ടു. ഒടുവില് 67-ാം മിനിറ്റില് കുണ്ടെയ്ക്ക് പകരം മാലോ ഗുസ്റ്റോ കളത്തിലിറങ്ങി.’
തന്റെ ഭാവി ക്ലബ്ബ് കരിയറിനെക്കുറിച്ചുള്ള അഭ്യൂഹങ്ങള് ശക്തമായി നിലനില്ക്കുന്ന സാഹചര്യത്തിലാണ് കുണ്ടെ 2026 ലോകകപ്പിനായി ഒരുങ്ങുന്നത്. ബാഴ്സലോണയില് തന്നെ തുടരാനാണ് തനിക്ക് താല്പര്യമെന്ന് വ്യക്തമാക്കിയ താരം, ലോകകപ്പില് ഫ്രഞ്ച് ജേഴ്സിയില് തന്റെ പഴയ ഫോമിലേക്ക് തിരിച്ചെത്താന് കഴിയുമെന്ന പ്രതീക്ഷയിലാണ്.
