കണ്ണൂര്: കനത്ത കാലവര്ഷവും അതിശക്തമായ മഴ മുന്നറിയിപ്പും കണക്കിലെടുത്ത് കണ്ണൂര് ജില്ലയിലെ വിദ്യാഭ്യാസ സ്ഥാപനങ്ങള്ക്ക് നാളെ ജില്ലാ കളക്ടര് അവധി പ്രഖ്യാപിച്ചു. കേന്ദ്ര കാലാവസ്ഥാ നിരീക്ഷണ കേന്ദ്രം ജില്ലയില് അതീവ ജാഗ്രത നിര്ദ്ദേശമായ ‘റെഡ് അലര്ട്ട്’ പുറപ്പെടുവിച്ച സാഹചര്യത്തിലാണ് മുന്കരുതല് നടപടി.
പ്രൊഫഷണല് കോളേജുകള്, ഐ.സി.എസ്.ഇ/സി.ബി.എസ്.ഇ സ്കൂളുകള്, കേന്ദ്രീയ വിദ്യാലയങ്ങള്, അങ്കണവാടികള്, ട്യൂഷന് സെന്ററുകള്, മദ്രസകള് ഉള്പ്പെടെയുള്ള മതവിദ്യാഭ്യാസ സ്ഥാപനങ്ങള് എന്നിവയ്ക്കെല്ലാം ഈ അവധി ബാധകമായിരിക്കും. എന്നാല് റസിഡന്ഷ്യല് സ്കൂളുകള് സാധാരണ പോലെ പ്രവര്ത്തിക്കും. മുന്കൂട്ടി നിശ്ചയിച്ചിട്ടുള്ള പൊതുപരീക്ഷകള്, സര്വ്വകലാശാലാ പരീക്ഷകള്, അഭിമുഖങ്ങള് എന്നിവയ്ക്ക് മാറ്റമുണ്ടായിരിക്കില്ലെന്നും അധികൃതര് വ്യക്തമാക്കി.
തുടര്ച്ചയായ മഴയെ തുടര്ന്ന് റെഡ് അലര്ട്ട് പ്രഖ്യാപിച്ചിട്ടുള്ള വടക്കന് കേരളത്തിലെ മറ്റ് ജില്ലകളായ കോഴിക്കോട്, വയനാട്, കാസര്കോട് എന്നിവിടങ്ങളിലും വിദ്യാഭ്യാസ സ്ഥാപനങ്ങള്ക്ക് നാളെ അവധിയായിരിക്കും. കുട്ടികളുടെ സുരക്ഷ മുന്നിര്ത്തി അതത് ജില്ലാ കളക്ടര്മാരാണ് അവധി പ്രഖ്യാപിച്ച് ഉത്തരവിറക്കിയത്.
