കോഴിക്കോട്: പയ്യോളി തുറയൂര് പഞ്ചായത്തിലും ഷിഗല്ല. പഞ്ചായത്തിലെ 13-ാം വാര്ഡിലെ ഒമ്പത് വയസുകാരനാണ് ഷിഗല്ല സ്ഥിരീകരിച്ചത്. നേരത്തെ പഞ്ചായത്തിൽ രോഗം സ്ഥിരീകരിച്ച് ചികിത്സയിൽ തുടരുന്ന ഒരു കുട്ടിയുടെ ബന്ധുവാണ് ഒൻപതു വയസുകാരൻ. ഇതോടെ ജില്ലയിൽ ഷിഗല്ല റിപ്പോർട്ട് ചെയ്തവരുടെ എണ്ണം 13 ആയി.
കേരളത്തിൽ മലപ്പുറം, കോഴിക്കോട്, കൊല്ലം, വയനാട്, തിരുവനന്തപുരം തുടങ്ങി വിവിധ ജില്ലകളിൽ ഷിഗല്ല രോഗലക്ഷണങ്ങൾ സ്ഥിരീകരിക്കുകയും ചില മരണങ്ങളും റിപ്പോർട്ട് ചെയ്യപ്പെട്ടിട്ടുണ്ട്.
ബാക്ടീരിയ മൂലമുണ്ടാകുന്ന ഒരു സാംക്രമിക രോഗമാണ് ഷിഗല്ല. കടുത്ത വയറിളക്കം, ശക്തമായ വയറുവേദന, പനി, ഛർദ്ദി, അമിതമായ ക്ഷീണം എന്നിവയാണ് രോഗലക്ഷണങ്ങൾ. മലിനമായ വെള്ളത്തിലൂടെയും ഭക്ഷണത്തിലൂടെയുമാണ് പ്രധാനമായും രോഗം പകരുന്നത്.
