ബര്മിങ്ഹാം: വനിതാ ടി20 ലോകകപ്പിന്റെ ആവേശപ്പോരാട്ടങ്ങള്ക്ക് തുടക്കം കുറിച്ചുകൊണ്ട് ഇന്ത്യ ഇന്ന് തങ്ങളുടെ ആദ്യ മത്സരത്തില് ചിരവൈരികളായ പാകിസ്ഥാനെ നേരിടുന്നു. ഇംഗ്ലണ്ടിലെ എഡ്ജ്ബാസ്റ്റണില് ഇന്ത്യന് സമയം വൈകിട്ട് ഏഴിനാണ് മത്സരം. കഴിഞ്ഞ വര്ഷം നവംബറില് ഏകദിന ലോകകപ്പ് കിരീടം ചൂടിയ ഇന്ത്യന് സംഘം, ടി20 ലോകകപ്പും സ്വന്തമാക്കുക എന്ന സുവര്ണ്ണ ലക്ഷ്യത്തോടെയാണ് ഇംഗ്ലണ്ടില് എത്തിയിരിക്കുന്നത്.
ഇതുവരെ ഇരുടീമുകളും ടി20യില് 16 തവണ നേര്ക്കുനേര് വന്നപ്പോള് 13 ലും വിജയം ഇന്ത്യക്കൊപ്പമായിരുന്നു. എന്നാല് പാകിസ്ഥാന് നേടിയ മൂന്ന് വിജയങ്ങളില് രണ്ടെണ്ണം ലോകകപ്പ് വേദികളിലായിരുന്നു എന്നത് ഇന്ത്യക്ക് കൃത്യമായ മുന്നറിയിപ്പ് നല്കുന്നുണ്ട്. അതുകൊണ്ടുതന്നെ മത്സരത്തെ ഒട്ടും നിസ്സാരമായി കാണാന് ഇന്ത്യന് ക്യാമ്പ് തയാറല്ല.
സ്മൃതി മന്ധാന, ഷെഫാലി വര്മ സഖ്യം നല്കുന്ന തുടക്കത്തിലാണ് ഇന്ത്യയുടെ പ്രധാന പ്രതീക്ഷ. പവര്പ്ലേ ഓവറുകളില് അതിവേഗം റണ്സുയര്ത്താന് കെല്പ്പുള്ളവരാണ് ഇരുവരുമെങ്കിലും, ഷെഫാലിയുടെ സമീപകാലത്തെ ഫോമില്ലായ്മ ടീമിന് നേരിയ ആശങ്കയുണ്ടാക്കുന്നുണ്ട്.
നായകന് ഹര്മന്പ്രീത് കൗര് നയിക്കുന്ന മധ്യനിര ബാറ്റിങ് ലൈനപ്പ് ശക്തമാണ്. ഹര്മന്പ്രീതിനൊപ്പം മികച്ച ഫോമിലുള്ള ജമിമ റോഡ്രിഗസ്, റിച്ച ഘോഷ്, ഭാരതി ഫുല്മലി, യസ്തിക ഭാടിയ, ദീപ്തി ശര്മ എന്നിവരുടെ ഫോമും മത്സരത്തില് നിര്ണ്ണായകമാകും. മറുവശത്ത്, മികച്ച ഫോമിലുള്ള ഓള്റൗണ്ടറും ക്യാപ്റ്റനുമായ സന ഫാത്തിമയുടെ പ്രകടനത്തിലാണ് പാകിസ്ഥാന്റെ പൂര്ണ്ണ പ്രതീക്ഷകള്.
ഇന്ത്യയും പാകിസ്ഥാനും ഉള്പ്പെടുന്ന ഗ്രൂപ്പ് എയില് ഓസ്ട്രേലിയ, ദക്ഷിണാഫ്രിക്ക, ബംഗ്ലാദേശ്, നെതര്ലന്ഡ്സ് എന്നീ ടീമുകളാണുള്ളത്. ആദ്യ മത്സരത്തില് ദക്ഷിണാഫ്രിക്കയെ പരാജയപ്പെടുത്തിയ ഓസ്ട്രേലിയയാണ് നിലവില് ഗ്രൂപ്പില് മുന്നില്.
ഇന്ത്യയുടെ സാധ്യത ഇലവന്:
സ്മൃതി മന്ധാന, ഷെഫാലി വര്മ, യസ്തിക ഭാടിയ, ഹര്മന്പ്രീത് കൗര്, ജമിമ റോഡ്രിഗസ്, റിച്ച ഘോഷ്, ദീപ്തി ശര്മ, ഭാരതി ഫുല്മലി, ശ്രേയങ്ക പാട്ടീല്, ക്രാന്തി ഗൗഡ്, രേണുക സിങ്.
