തിരുവനന്തപുരം: ആഭ്യന്തര ക്രിക്കറ്റിലെ തകര്പ്പന് പ്രകടനങ്ങളിലൂടെ ശ്രദ്ധേയനായ കേരള അണ്ടര്-19 ക്രിക്കറ്റ് ടീം ക്യാപ്റ്റനും വിക്കറ്റ് കീപ്പറുമായ മാനവ് കൃഷ്ണയ്ക്ക് ദേശീയ ടീമിലേക്ക് വിളി. ശ്രീലങ്കയ്ക്കെതിരെ നടക്കാനിരിക്കുന്ന ചതുര്ദിന (ടെസ്റ്റ്) പരമ്പരയ്ക്കുള്ള ഇന്ത്യന് അണ്ടര്-19 ടീമിലേക്കാണ് ഈ തിരുവനന്തപുരം പേരൂര്ക്കട സ്വദേശി തിരഞ്ഞെടുക്കപ്പെട്ടത്. വിക്കറ്റിന് പിന്നിലെ മിന്നല് വേഗതയും ബാറ്റിങ്ങിലെ വെടിക്കെട്ട് പ്രകടനവുമാണ് മാനവിന് ഇന്ത്യന് ജേഴ്സിയിലേക്കുള്ള വഴിതുറന്നത്.
കഴിഞ്ഞ അണ്ടര്-19 സീസണില് മാത്രം അടിച്ചുകൂട്ടിയത് 592 റണ്സാണ്. ടൂര്ണമെന്റില് തുടര്ച്ചയായ രണ്ട് മത്സരങ്ങളിലാണ് താരം സെഞ്ച്വറി നേടിയത്. സൗരാഷ്ട്രയ്ക്കെതിരെ 189 റണ്സും ഹൈദരാബാദിനെതിരെ 144 റണ്സും മാനവ് സ്വന്തമാക്കി. 2026 ജനുവരിയില് ഗോവയ്ക്കെതിരായ മത്സരത്തിലൂടെ ഫസ്റ്റ് ക്ലാസ് ക്രിക്കറ്റിലും താരം സാന്നിധ്യമറിയിച്ചു. 2025-ലെ കെസിഎല് ലേലത്തില് പങ്കെടുത്ത ഏറ്റവും പ്രായം കുറഞ്ഞ കളിക്കാരിലൊരാളായിരുന്നു മാനവ്.
ഡല്ഹിയില് വെച്ച് ക്രിക്കറ്റ് കരിയറിന് തുടക്കം കുറിച്ച മാനവ് തന്റെ 13-ാം വയസിലാണ് കേരളത്തിലേക്ക് മാറുന്നത്. മികച്ച കായികക്ഷമതയും കളി നിയന്ത്രിക്കാനുള്ള നേതൃപാടവവും കൈമുതലായുള്ള ഈ യുവതാരം കേരളത്തിന്റെ അണ്ടര്-16, അണ്ടര്-19 ടീമുകളെ വിജയകരമായി നയിച്ചിട്ടുണ്ട്. ഒമാന് സന്ദര്ശിച്ച കേരളത്തിന്റെ സീനിയര് ടീമിലും മാനവ് അംഗമായിരുന്നു. എന്എസ്കെ ട്രോഫിയിലെ ‘പ്രോമിസിങ് യങ്സ്റ്റര്’ പുരസ്കാരം നേടിയ ഈ പ്രതിഭയ്ക്ക് ബിസിസിഐയുടെ സെന്റര് ഫോര് എക്സലന്സ് ക്യാമ്പിലും പ്രത്യേക പരിശീലനം ലഭിച്ചിട്ടുണ്ട്.
തിരുവനന്തപുരത്തെ എസ്.എസ്. ഷൈന് എന്ന പരിശീലകന് കീഴിലാണ് മാനവ് ക്രിക്കറ്റ് അഭ്യസിക്കുന്നത്. ഉണ്ണികൃഷ്ണന്-അനിത കെ. നായര് ദമ്പതികളുടെ മകനാണ്. മാനവിന്റെ സഹോദരനായ മാധവ് കൃഷ്ണയും കേരളത്തിന്റെ അണ്ടര്-19 ക്രിക്കറ്റ് ടീമിലെ സജീവ അംഗമാണ്.
