മോഹൻലാലും തരുൺ മൂർത്തിയും ഒന്നിക്കുന്ന പുതിയ ചിത്രം ‘അതിമനോഹരം’ തൊടുപുഴയിൽ പുരോഗമിക്കുന്നു. ആഷിക്ക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക്ക് ഉസ്മാൻ നിർമ്മിക്കുന്ന ഈ ചിത്രത്തിന്റെ ചിത്രീകരണം ഇതുവരെ ഏകദേശം 90 ദിവസത്തോളം പൂർത്തിയാക്കിയിട്ടുണ്ട്.
കൊച്ചിയിലും രണ്ടാഴ്ചയോളം നീണ്ടുനിന്ന ചിത്രീകരണത്തിന് ശേഷമാണ് സംഘം തൊടുപുഴയിൽ വീണ്ടും ഷൂട്ടിംഗ് തുടരുന്നത്. 120 ദിവസത്തോളം നീളുന്ന ഷെഡ്യൂളിൽ ഭൂരിഭാഗം രംഗങ്ങളും ഇതിനോടകം ചിത്രീകരിച്ചുകഴിഞ്ഞതായി അണിയറപ്രവർത്തകർ അറിയിച്ചു.
ജൂൺ 20ഓടെ ഈ ഘട്ടം പൂർത്തിയാക്കി, ജൂലൈ പകുതിയോടെ ചിത്രീകരണം വീണ്ടും ആരംഭിക്കാനാണ് പദ്ധതിയിടുന്നത്. ജൂൺ അവസാനം മോഹൻലാൽ യൂറോപ്യൻ പര്യടനത്തിലേക്ക് പോകുന്നതിനാലാണ് ഇടവേള നൽകുന്നത്. ജൂലൈ പകുതിയിൽ അദ്ദേഹം തിരിച്ചെത്തിയ ശേഷം അവസാനഘട്ട ചിത്രീകരണം ആരംഭിക്കും.
തൊടുപുഴ, കൊച്ചി, ശബരിമല, ഹൈദരാബാദ്, മുംബൈ തുടങ്ങിയ വിവിധ ലൊക്കേഷനുകളിലായാണ് ശേഷിക്കുന്ന ചിത്രീകരണം പൂർത്തിയാക്കുന്നത്.
സാധാരണക്കാരനായ ഒരു പൊലീസ് സബ്ബ് ഇൻസ്പെക്ടറായ ലൗലജൻ എന്ന കഥാപാത്രത്തിന്റെ ഔദ്യോഗിക ജീവിതവും വ്യക്തിജീവിതവും ചുറ്റിപ്പറ്റിയാണ് ചിത്രത്തിന്റെ കഥ പുരോഗമിക്കുന്നത്. സംഘർഷഭരിതമായ മുഹൂർത്തങ്ങളിലൂടെ മനുഷ്യബന്ധങ്ങളുടെ തീവ്രതയും ചിത്രം അവതരിപ്പിക്കുന്നു.
നായികയായി മീരാ ജാസ്മിൻ എത്തുന്നു. ലാലു അലക്സ്, മനോജ് കെ. ജയൻ, ജഗദീഷ്, ഇർഷാദ്, സുധീഷ്, പ്രമോദ് വെളിയനാട്, സജീവൻ, ശ്രീനാഥ് ബാബു, കിരൺ പീതാംബരൻ, വിജി വിശ്വനാഥ്, ഭാമ അരുൺ, പ്രാർത്ഥന തുടങ്ങി വലിയ താരനിരയും ചിത്രത്തിന്റെ ഭാഗമാണ്.
‘ഇഷ്ക്’, ‘ആലപ്പുഴ ജിംഖാന’, ‘മഹാറാണി’ എന്നീ ചിത്രങ്ങളിലൂടെ ശ്രദ്ധേയനായ രതീഷ് രവിയാണ് തിരക്കഥ. ജെയ്ക് ബിജോയ് സംഗീത സംവിധാനം നിർവഹിക്കുന്നു. ഷാജികുമാറാണ് ഛായാഗ്രാഹകൻ. വിവേക് ഹർഷൻ എഡിറ്റിംഗ് കൈകാര്യം ചെയ്യുന്നു.
വിഷ്ണു ഗോവിന്ദ് ഓഡിയോ ഗ്രാഫിയും, ഗോകുൽ ദാസ് കലാസംവിധാനവും നിർവഹിക്കുന്നു. റോണക്സ് സേവ്യർ മേക്കപ്പ് വിഭാഗത്തിലും, മഷർ ഹംസ വസ്ത്രാലങ്കാരത്തിലും പ്രവർത്തിക്കുന്നു. ബിനു പപ്പു കോ-ഡയറക്ടറായും മിറാഷ് ഖാൻ ചീഫ് അസോസിയേറ്റ് ഡയറക്ടറായും പ്രവർത്തിക്കുന്നു.
സെൻട്രൽ പിക്ചേഴ്സ് ചിത്രം പ്രദർശനത്തിനെത്തിക്കുന്നു.