കൊല്ക്കത്ത: അന്താരാഷ്ട്ര യോഗദിനാചരണത്തിന്റെ ഭാഗമായി കൊല്ക്കത്തയില് നടന്ന വിപുലമായ പരിപാടിയില് പങ്കെടുത്ത പ്രധാനമന്ത്രി നരേന്ദ്ര മോദി, യോഗ ലോകത്തെ ഒന്നിപ്പിക്കുന്ന ശക്തിയാണെന്നും അത് ജീവിതത്തിന്റെ അവിഭാജ്യ ഘടകമാക്കണമെന്നും ആഹ്വാനം ചെയ്തു. പശ്ചിമ ബംഗാളില് സംഘടിപ്പിച്ച ശുചിത്വ പ്രവര്ത്തനങ്ങളെയും അദ്ദേഹം പ്രത്യേകം അഭിനന്ദിച്ചു.
”ഇന്ന് രാജ്യമൊട്ടാകെയും ലോകമെമ്പാടുമുള്ള ജനങ്ങളും യോഗയിലൂടെ പരസ്പരം ബന്ധപ്പെടുകയാണ്. മനുഷ്യരാശിയെ ഒരുമിപ്പിക്കുന്ന അതുല്യമായ ശക്തിയാണ് യോഗ. അന്താരാഷ്ട്ര യോഗദിനത്തില് ലോകമെമ്പാടുമുള്ള ജനങ്ങള്ക്ക് ഹൃദയം നിറഞ്ഞ ആശംസകള് നേരുന്നു,” എന്ന് പ്രധാനമന്ത്രി പറഞ്ഞു.
യോഗാചരണത്തിനായി ആത്മീയ പാരമ്പര്യത്തിന് പേരുകേട്ട ബംഗാളിന്റെ മണ്ണില് എത്താന് കഴിഞ്ഞത് അഭിമാനകരമാണെന്നും രാമകൃഷ്ണ പരമഹംസര്, സ്വാമി വിവേകാനന്ദന്, ലാഹിരി മഹാശയന് തുടങ്ങിയ മഹാത്മാക്കളുടെ സംഭാവനകള് ലോകമെമ്പാടും യോഗയുടെ മഹത്വം പ്രചരിപ്പിക്കാന് സഹായിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.
അത്തരം മഹാന്മാര് ജീവിച്ച ഭൂമിയില് ആയിരക്കണക്കിന് ആളുകള്ക്കൊപ്പം യോഗാഭ്യാസത്തില് പങ്കെടുക്കാന് കഴിഞ്ഞത് ആത്മീയമായി ഏറെ സമ്പന്നമായ അനുഭവമാണെന്നും പ്രധാനമന്ത്രി പറഞ്ഞു.
ആധുനിക ലോകം നേരിടുന്ന ശാരീരികവും മാനസികവും സാമൂഹികവുമായ നിരവധി വെല്ലുവിളികള്ക്ക് യോഗ ഫലപ്രദമായ പരിഹാരമാണെന്ന് അദ്ദേഹം അഭിപ്രായപ്പെട്ടു. ശരീരാരോഗ്യത്തിനും മാനസിക സന്തുലിതാവസ്ഥയ്ക്കും ആന്തരിക സമാധാനത്തിനും യോഗ വലിയ പിന്തുണ നല്കുന്നുവെന്നും അദ്ദേഹം കൂട്ടിച്ചേര്ത്തു.
യോഗദിനം വര്ഷത്തില് ഒരിക്കല് മാത്രം ആഘോഷിക്കുന്ന ചടങ്ങായി കാണാതെ ദൈനംദിന ജീവിതത്തിന്റെ ഭാഗമാക്കണമെന്ന് പ്രധാനമന്ത്രി ജനങ്ങളോട് അഭ്യര്ഥിച്ചു. വ്യക്തിപരമായും സമൂഹത്തിന്റെ മൊത്തത്തിലുള്ള ക്ഷേമത്തിനുമായി യോഗയെ സ്ഥിരമായ ശീലമാക്കേണ്ടത് കാലഘട്ടത്തിന്റെ ആവശ്യകതയാണെന്നും അദ്ദേഹം പറഞ്ഞു.
അമ്പതുകളിലെത്തുമ്പോള് മുപ്പതുകളിലേതിനേക്കാള് കൂടുതല് ആരോഗ്യവാനും ഊര്ജസ്വലനുമായും കരുത്തുറ്റവനായും ഓരോ വ്യക്തിയും മാറണമെന്ന ലക്ഷ്യത്തോടെ യോഗയെ സ്വീകരിക്കണമെന്നും പ്രധാനമന്ത്രി ആഹ്വാനം ചെയ്തു.
പ്രസംഗത്തിന് ശേഷം ആയിരക്കണക്കിന് ആളുകള്ക്കൊപ്പം പ്രധാനമന്ത്രി കൂട്ടായ യോഗാഭ്യാസത്തില് പങ്കെടുത്തു. ”ആരോഗ്യകരമായ വാര്ധക്യത്തിനായുള്ള യോഗ” എന്നതാണ് ഈ വര്ഷത്തെ യോഗദിന പ്രമേയം. ശാരീരിക ആരോഗ്യം സംരക്ഷിക്കുന്നതിനൊപ്പം മാനസിക ക്ഷേമവും വൈകാരിക സ്ഥിരതയും സജീവമായ വാര്ധക്യവും പ്രോത്സാഹിപ്പിക്കുന്നതില് യോഗയുടെ പ്രാധാന്യം ഉയര്ത്തിക്കാട്ടുന്നതാണ് ഈ പ്രമേയം.
