തിരുവനന്തപുരം: സംസ്ഥാനത്തെ എന്‍ജിനീയറിങ്, ഫാര്‍മസി പ്രവേശനത്തിനുള്ള കീം 2026 പരീക്ഷയുടെ റാങ്ക് പട്ടിക പ്രസിദ്ധീകരിച്ചു. എന്‍ജിനീയറിങ് വിഭാഗത്തില്‍ അങ്കമാലി സ്വദേശി റോഷന്‍ രാജു ഒന്നാം റാങ്ക് നേടിയപ്പോള്‍, കണ്ണൂര്‍ സ്വദേശി ധ്യാന്‍ തേജ് രണ്ടാം റാങ്ക് സ്വന്തമാക്കി. എന്‍ജിനീയറിങ് റാങ്ക് പട്ടികയില്‍ ആകെ 79,717 വിദ്യാര്‍ഥികള്‍ ഇടംപിടിച്ചു.
ഫാര്‍മസി വിഭാഗത്തില്‍ തൃശൂര്‍ സ്വദേശി വിനായകന്‍ നാരായണന്‍ ഒന്നാം റാങ്കും ജെസ്സി ജസ്റ്റിന്‍ രണ്ടാം റാങ്കും നേടി. ഫാര്‍മസി റാങ്ക് പട്ടികയില്‍ 26,943 പേരാണ് ഉള്‍പ്പെട്ടിരിക്കുന്നത്. കീം പരീക്ഷ പരാതികളില്ലാതെയും സമയബന്ധിതമായും നടത്താനായതായി ഉന്നത വിദ്യാഭ്യാസ മന്ത്രി റോജി എം. ജോണ്‍ അറിയിച്ചു.
കേരളത്തിലാകെ 192 പരീക്ഷാ കേന്ദ്രങ്ങളിലായി പരീക്ഷ നടന്നതോടൊപ്പം സംസ്ഥാനത്തിന് പുറത്തും വിദേശത്തും പരീക്ഷാ കേന്ദ്രങ്ങള്‍ ഒരുക്കിയിരുന്നു. കേരളത്തില്‍ നിന്ന് 95,016 വിദ്യാര്‍ഥികളാണ് പരീക്ഷയെഴുതിയത്. സിബിഎസ്ഇ പുനര്‍മൂല്യനിര്‍ണയ ഫലം വൈകിയതിനെ തുടര്‍ന്നാണ് കീം റാങ്ക് പട്ടിക പ്രസിദ്ധീകരിക്കുന്നത് വൈകിയതെന്ന് മന്ത്രി വ്യക്തമാക്കി.
പുനര്‍മൂല്യനിര്‍ണയത്തിന് അപേക്ഷിച്ച ചില വിദ്യാര്‍ഥികള്‍ക്ക് മാര്‍ക്ക് ഷീറ്റ് അപ്ലോഡ് ചെയ്യാന്‍ അവസരം നല്‍കുന്നതിനായാണ് ഫലപ്രഖ്യാപനം നീട്ടിവെച്ചത്. സിബിഎസ്ഇ വിദ്യാര്‍ഥികള്‍ക്ക് മാര്‍ക്ക് ലിസ്റ്റ് സമര്‍പ്പിക്കാനുള്ള സമയം രണ്ട് തവണ നീട്ടി നല്‍കിയതായും അദ്ദേഹം പറഞ്ഞു. രാജ്യത്താകെ പുനര്‍മൂല്യനിര്‍ണയ ഫലത്തിന്റെ ഏകദേശം 13 ശതമാനം ഇനിയും പുറത്തുവരാനുണ്ടെങ്കിലും, കേരളത്തില്‍ നിന്നുള്ള വിദ്യാര്‍ഥികളുടെ എണ്ണം വളരെ കുറവാണെന്നും മന്ത്രി കൂട്ടിച്ചേര്‍ത്തു.
എന്‍ജിനീയറിങ് വിഭാഗത്തില്‍ ഒന്നാം റാങ്ക് നേടിയ റോഷന്‍ രാജുവിനെയും രണ്ടാം റാങ്കുകാരനായ ധ്യാന്‍ തേജിനെയും മന്ത്രി ഫോണില്‍ വിളിച്ച് അഭിനന്ദിച്ചു. ഇതോടെ സംസ്ഥാനത്തെ എന്‍ജിനീയറിങ്, ഫാര്‍മസി പ്രവേശന നടപടികള്‍ക്ക് വേഗം കൈവരുമെന്നാണ് പ്രതീക്ഷ. റാങ്ക് പട്ടിക പ്രസിദ്ധീകരിച്ചതോടെ കൗണ്‍സലിങ് ഉള്‍പ്പെടെയുള്ള തുടര്‍ നടപടികള്‍ ഉടന്‍ ആരംഭിക്കും.
