കൊല്ലം: കൊല്ലം നീണ്ടകര കായലിൽ കുളിക്കാനിറങ്ങിയ വിദ്യാർത്ഥി മുങ്ങിമരിച്ചു. കേന്ദ്രീയ വിദ്യാലയത്തിലെ ഏഴാം ക്ലാസ് വിദ്യാർത്ഥിയായ മിലൻ ബിജുവാണ് മരിച്ചത്.
ഇന്നലെ വൈകിട്ടാണ് നാലംഗ സംഘം കുളിക്കാനായി കായലിൽ ഇറങ്ങിയത്. ഡ്രെഡ്ജിംഗ് നടക്കുന്ന ഭാഗത്താണ് അപകടം സംഭവിച്ചത്. ആഴവും ചെളിയും കൂടുതലായ പ്രദേശത്തേക്ക് കുട്ടി അകപ്പെട്ടതായാണ് പ്രാഥമിക വിവരം.
രാത്രി എട്ട് മണിയോടെയാണ് ഫയർഫോഴ്സിന് വിവരം ലഭിച്ചത്. തുടർന്ന് സ്കൂബാ സംഘം ഉൾപ്പെടെ രക്ഷാപ്രവർത്തകർ സ്ഥലത്തെത്തി തെരച്ചിൽ ആരംഭിച്ചു.
ഏകദേശം അരമണിക്കൂർ നീണ്ട തെരച്ചിലിനൊടുവിലാണ് ചെളിയിൽ അകപ്പെട്ട നിലയിൽ കുട്ടിയെ കണ്ടെത്തിയത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ കൂടുതൽ അന്വേഷണം തുടരുകയാണ്.
