ബെംഗളൂരു: ഭാര്യയ്ക്ക് സ്വന്തമായി മതിയായ വരുമാനവും സാമ്പത്തിക സ്വാതന്ത്ര്യവും ഉണ്ടെങ്കിൽ, ഭർത്താവിൽ നിന്ന് ജീവനാംശം ലഭിക്കാൻ സ്വതവേയുള്ള നിയമപരമായ അവകാശമല്ലെന്ന് കർണാടക ഹൈക്കോടതി. ജീവനാംശം അനുവദിക്കുമ്പോൾ സ്ത്രീയാണെന്ന ഒറ്റ കാരണത്തിന്റെ അടിസ്ഥാനത്തിൽ തീരുമാനമെടുക്കാനാകില്ല. ഇരുകക്ഷികളുടെയും സാമ്പത്തിക സാഹചര്യം, വരുമാനം, ജീവിതനിലവാരം എന്നിവ സമഗ്രമായി പരിശോധിക്കണമെന്നും കോടതി നിരീക്ഷിച്ചു.
ഗാർഹിക പീഡന നിയമം, ഹിന്ദു ദത്തെടുക്കലും ജീവനാംശവും സംബന്ധിച്ച നിയമം, ക്രിമിനൽ പ്രൊസീജർ കോഡ് എന്നിവ പ്രകാരം ഹർജി നൽകിയെന്ന കാരണത്താൽ മാത്രം ഭർത്താവ് ജീവനാംശം നൽകണമെന്ന് നിർബന്ധിക്കാനാകില്ലെന്നും ഹൈക്കോടതി വ്യക്തമാക്കി. ഓരോ കേസും അതിന്റെ പ്രത്യേക സാഹചര്യങ്ങളും തെളിവുകളും വിലയിരുത്തിയാണ് തീരുമാനിക്കേണ്ടതെന്ന് കോടതി ചൂണ്ടിക്കാട്ടി.
പരിഗണിച്ച കേസിൽ ഭാര്യയ്ക്ക് സ്ഥിരവരുമാനമുണ്ടെന്നും ഭർത്താവിനേക്കാൾ ഉയർന്ന വരുമാനമാണ് ലഭിക്കുന്നതെന്നും കോടതി രേഖപ്പെടുത്തി. സാമ്പത്തിക ബാധ്യതകളെക്കുറിച്ചും വായ്പകളെക്കുറിച്ചും ആവശ്യമായ രേഖകളും വ്യക്തമായ വിവരങ്ങളും ഹർജിക്കാരി സമർപ്പിച്ചിരുന്നില്ലെന്നും കോടതി നിരീക്ഷിച്ചു. അതിനാൽ ജീവനാംശം അനുവദിക്കുന്നതിൽ സാമ്പത്തിക യാഥാർഥ്യങ്ങൾ നിർണായകമാണെന്ന് കോടതി വ്യക്തമാക്കി.
ജീവനാംശവുമായി ബന്ധപ്പെട്ട കേസുകളിൽ ലിംഗപരമായ മുൻധാരണകൾക്ക് പകരം നീതിയുക്തവും വസ്തുനിഷ്ഠവുമായ സമീപനമാണ് കോടതികൾ സ്വീകരിക്കേണ്ടതെന്ന് ഈ വിധി വ്യക്തമാക്കുന്നതായി നിയമവിദഗ്ധർ വിലയിരുത്തുന്നു. ഭാര്യയുടെ വരുമാനം, ഭർത്താവിന്റെ വരുമാനം, ഇരുവരുടെയും സാമ്പത്തിക ബാധ്യതകൾ, ജീവിതനിലവാരം എന്നിവയെല്ലാം പരിശോധിച്ച ശേഷമേ ജീവനാംശം സംബന്ധിച്ച അന്തിമ തീരുമാനമുണ്ടാകാവൂവെന്നാണ് കർണാടക ഹൈക്കോടതിയുടെ സുപ്രധാന നിരീക്ഷണം.
