ന്യൂഡല്‍ഹി: ഇന്ത്യന്‍ കരസേനയുടെ 31-ാമത് മേധാവിയായി ജനറല്‍ ധീരജ് സേത്ത് ചുമതലയേറ്റു. നാല് പതിറ്റാണ്ടോളം നീണ്ട സൈനിക സേവനത്തിന് ശേഷം വിരമിച്ച ജനറല്‍ ഉപേന്ദ്ര ദ്വിവേദിയുടെ പിന്‍ഗാമിയായാണ് അദ്ദേഹം നിയമിതനായത്. ഖഡ്ക്വാസ്ലയിലെ നാഷണല്‍ ഡിഫന്‍സ് അക്കാദമിയിലെ പൂര്‍വവിദ്യാര്‍ഥിയായ ജനറല്‍ ധീരജ് സേത്ത് 1986 ഡിസംബറിലാണ് ഇന്ത്യന്‍ സേനയില്‍ കമ്മിഷന്‍ നേടിയത്. വിവിധ നിര്‍ണായക സൈനിക ചുമതലകളിലൂടെ ശ്രദ്ധേയനായ അദ്ദേഹം രാജ്യത്തിന്റെ വിവിധ തന്ത്രപ്രധാന മേഖലകളില്‍ സേവനമനുഷ്ഠിച്ചിട്ടുണ്ട്.
സൗത്ത് വെസ്റ്റേണ്‍ കമാന്‍ഡിന്റെയും സതേണ്‍ കമാന്‍ഡിന്റെയും മേധാവിയായി പ്രവര്‍ത്തിച്ചിട്ടുള്ള ധീരജ് സേത്ത്, അതിവേഗ ആക്രമണങ്ങള്‍ക്കായി രൂപീകരിച്ച സുദര്‍ശന്‍ ചക്ര കോര്‍പ്‌സ്, രാജസ്ഥാനിലെ ആര്‍മേഡ് റെജിമെന്റ്, വെസ്റ്റേണ്‍ തിയേറ്ററിലെ ആര്‍മേഡ് ബ്രിഗേഡ്, ജമ്മു-കശ്മീരിലെ ഭീകരവിരുദ്ധ സേന എന്നിവയ്‌ക്കും നേതൃത്വം നല്‍കിയിട്ടുണ്ട്.
സേനാ ആസ്ഥാനത്ത് സുപ്രധാന തന്ത്രപരമായ ചുമതലകളും വഹിച്ചിട്ടുള്ള ജനറല്‍ ധീരജ് സേത്തിന്റെ നിയമനം ഇന്ത്യന്‍ കരസേനയുടെ ആധുനികവല്‍ക്കരണത്തിനും ദേശീയ സുരക്ഷാ സംവിധാനത്തിന്റെ കൂടുതല്‍ കരുത്തുറ്റ പ്രവര്‍ത്തനങ്ങള്‍ക്കും നിര്‍ണായകമാകുമെന്നാണ് വിലയിരുത്തല്‍.
