ലിമ: 2026 ഫിഫ ലോകകപ്പില് നോര്വേയ്ക്കായി നടത്തിയ തകര്പ്പന് പ്രകടനത്തിന് പിന്നാലെ എര്ലിങ് ഹാളണ്ടിനോടുള്ള ആരാധന ലോകമെമ്പാടും വ്യാപിക്കുകയാണ്. ഇതിന്റെ ഏറ്റവും പുതിയ ഉദാഹരണമാണ് പെറുവില് നിന്നെത്തുന്നത്. ഹാലണ്ടിന്റെ പേരില് നൂറുകണക്കിന് നവജാത ശിശുക്കള്ക്ക് പേരിട്ടതായി പെറുവിന്റെ ദേശീയ തിരിച്ചറിയല് രജിസ്ട്രി അറിയിച്ചു. റിപ്പോര്ട്ട് പ്രകാരം, പെറുവില് 468 നവജാത ശിശുക്കള്ക്ക് ‘ഹാളണ്ട്’ എന്ന പേരും 91 കുട്ടികള്ക്ക് ‘എര്ലിങ് ഹാളണ്ട്’ എന്ന പൂര്ണ പേരും രജിസ്റ്റര് ചെയ്തിട്ടുണ്ട്.
2026 ലോകകപ്പില് നാല് മത്സരങ്ങളില് നിന്ന് ഏഴ് ഗോളുകള് നേടിയ ഹാളണ്ട്, നോര്വേയെ ചരിത്രത്തിലാദ്യമായി ലോകകപ്പിന്റെ ക്വാര്ട്ടര് ഫൈനലിലെത്തിക്കുന്നതില് നിര്ണായക പങ്കുവഹിച്ചു. ബ്രസീലിനെതിരായ പ്രീക്വാര്ട്ടര് പോരാട്ടത്തില് ഇരട്ടഗോള് നേടി ടീമിന്റെ ചരിത്രവിജയത്തിനും അദ്ദേഹം വഴിയൊരുക്കിയിരുന്നു. ലോകകപ്പ് ആരംഭിച്ചതിന് ശേഷമാണ് ഹാളണ്ടിന്റെ പേരിലുള്ള രജിസ്ട്രേഷനുകളില് വന് വര്ധനയുണ്ടായതെന്ന് ദേശീയ തിരിച്ചറിയല് രജിസ്ട്രിയുടെ വക്താവ് ഇവാന് ടോറസ് വ്യക്തമാക്കി.
ക്വാര്ട്ടര് ഫൈനലിലേക്ക് നോര്വേ മുന്നേറിയതോടെ ഈ എണ്ണം വീണ്ടും കുത്തനെ ഉയര്ന്നതായും അദ്ദേഹം പറഞ്ഞു. ‘ഫുട്ബോള് താരങ്ങള് പലപ്പോഴും പെറുവിലെ മാതാപിതാക്കള്ക്ക് കുഞ്ഞുങ്ങള്ക്ക് പേരിടാനുള്ള പ്രചോദനമാകാറുണ്ട്. ഇപ്പോള് ഹാളണ്ടും പെറുവുകാരനായി മാറിയിരിക്കുകയാണ്,’ എന്ന് ടോറസ് തമാശയായി പ്രതികരിച്ചു. പെറുവില് ഫുട്ബോള് താരങ്ങളുടെ പേരില് കുട്ടികള്ക്ക് പേരിടുന്നത് പുതിയ കാര്യമല്ല.
ഔദ്യോഗിക കണക്കുകള് പ്രകാരം രാജ്യത്ത് 3,402 പേര് ‘മെസ്സി’ എന്ന പേരും, അതില് 292 പേര് ‘ലയണല് മെസ്സി’ എന്ന പൂര്ണ പേരും വഹിക്കുന്നുണ്ട്. ക്രിസ്റ്റ്യാനോ റൊണാള്ഡോയുടെ പേരിലുള്ളവര് 1,185 പേരും, ലാമിന് യമാല് എന്ന പേരിലുള്ളവര് 1,241 പേരുമാണ്. എന്നാല് ഈ പട്ടികയില് ഒന്നാം സ്ഥാനത്ത് ഇപ്പോഴും ബ്രസീല് സൂപ്പര്താരം നെയ്മര് തന്നെയാണ്. പെറുവില് 33,809 പേര് നെയ്മറിന്റെ പേരാണ്.
