പാരിസ്: ലോകകപ്പ് സെമിഫൈനലില്‍ സ്‌പെയിനിനോട് തോറ്റതിന് പിന്നാലെ ഫ്രാന്‍സ് ദേശീയ ടീമിന്റെ മുഖ്യപരിശീലകന്‍ ദിദിയര്‍ ദെഷാംപ്സ് സ്ഥാനമൊഴിയുമെന്ന് റിപ്പോര്‍ട്ടുകള്‍. പ്രമുഖ ഫുട്‌ബോള്‍ മാധ്യമപ്രവര്‍ത്തകന്‍ ഫാബ്രിസിയോ റൊമാനോയാണ് ഇക്കാര്യം റിപ്പോര്‍ട്ട് ചെയ്തത്. ദെഷാംപ്സ് പടിയിറങ്ങുകയാണെങ്കില്‍ ഫ്രാന്‍സിന്റെ ഇതിഹാസതാരം സിനദീന്‍ സിദാന്‍ പുതിയ മുഖ്യപരിശീലകനായി എത്തുമെന്ന സൂചനകളും ശക്തമാണ്.
2012 മുതല്‍ ഫ്രാന്‍സ് ദേശീയ ടീമിനെ നയിക്കുന്ന ദെഷാംപ്സിന്റെ കീഴില്‍ ഫ്രാന്‍സ് 2018 ലോകകപ്പില്‍ കിരീടം നേടിയിരുന്നു. 2022 ലോകകപ്പില്‍ ടീമിനെ ഫൈനലിലേക്കും 2026 ലോകകപ്പില്‍ സെമിഫൈനലിലേക്കും എത്തിക്കാനും അദ്ദേഹത്തിന് സാധിച്ചു. ഈ നേട്ടങ്ങള്‍ പരിഗണിക്കുമ്പോള്‍ ഫ്രാന്‍സ് ഫുട്‌ബോള്‍ ചരിത്രത്തിലെ ഏറ്റവും വിജയകരമായ പരിശീലകരില്‍ ഒരാളായാണ് ദെഷാംപ്സ് വിലയിരുത്തപ്പെടുന്നത്.
ലോകകപ്പ് സെമിയില്‍ ഫ്രാന്‍സിനെ എതിരില്ലാത്ത രണ്ട് ഗോളുകള്‍ക്ക് കീഴടക്കിയാണ് സ്‌പെയിന്‍ ഫൈനലിലേക്ക് മുന്നേറിയത്. മികേല്‍ ഒയാര്‍സബാലും പെഡ്രോ പോറോയും നേടിയ ഗോളുകളാണ് ഫ്രാന്‍സിന്റെ സ്വപ്‌നങ്ങള്‍ അവസാനിപ്പിച്ചത്. 2010ന് ശേഷം ആദ്യമായാണ് സ്‌പെയിന്‍ ലോകകപ്പ് ഫൈനലില്‍ പ്രവേശിക്കുന്നത്.
