ന്യൂയോര്ക്ക്: ഫിഫ ലോകകപ്പ് 2026 ഫൈനലിന് ദിവസങ്ങള് മാത്രം ശേഷിക്കെ കാനഡയിലെ കാട്ടുതീയില് നിന്നുള്ള പുക ന്യൂയോര്ക്ക്-ന്യൂജഴ്സി മേഖലയെ മൂടിയതോടെ അധികൃതര് എയര് ക്വാളിറ്റി ഹെല്ത്ത് അലര്ട്ട് പ്രഖ്യാപിച്ചു. ഞായറാഴ്ച ന്യൂജഴ്സിയിലെ മെറ്റ്ലൈഫ് സ്റ്റേഡിയത്തില് നടക്കുന്ന അര്ജന്റീന-സ്പെയിന് ലോകകപ്പ് ഫൈനലിന് മുന്നോടിയായാണ് ഈ മുന്നറിയിപ്പ്.
വായുവിലെ മലിനീകരണ തോത് ഉയര്ന്ന സാഹചര്യത്തില് അനാവശ്യമായി പുറത്തിറങ്ങുന്നത് ഒഴിവാക്കാനും കഠിനമായ ശാരീരിക പ്രവര്ത്തനങ്ങള് പരിമിതപ്പെടുത്താനും ന്യൂയോര്ക്ക്, ന്യൂജഴ്സി അധികൃതര് പൊതുജനങ്ങളോട് നിര്ദേശിച്ചു. തുറന്ന സ്റ്റേഡിയമായ മെറ്റ്ലൈഫ് സ്റ്റേഡിയത്തില് 80,000ത്തിലധികം കാണികള് പങ്കെടുക്കുന്ന ലോകകപ്പ് ഫൈനലും വമ്പന് ഹാഫ് ടൈം ഷോയും നടക്കാനിരിക്കെയാണ് ആരോഗ്യ ആശങ്ക ഉയരുന്നത്.
സെമിഫൈനലില് ഫ്രാന്സിനെ തോല്പ്പിച്ച ശേഷം ബുധനാഴ്ച രാത്രി ന്യൂജഴ്സിയിലെത്തിയ സ്പെയിന് ടീം വ്യാഴാഴ്ച പുറത്താണ് പരിശീലനം നടത്തിയത്. നിലവില് വായുമലിനീകരണം ടീമിന്റെ പരിശീലനത്തെ ബാധിച്ചിട്ടില്ലെന്നും ഇക്കാര്യത്തില് സ്പാനിഷ് ക്യാമ്പ് ഔദ്യോഗിക പ്രതികരണം നടത്തിയിട്ടില്ലെന്നും റിപ്പോര്ട്ടുകളുണ്ട്. ഇംഗ്ലണ്ടിനെതിരെ വിജയിച്ച അര്ജന്റീന സെമിക്ക് ശേഷം ജോര്ജിയയില് തുടരുകയായിരുന്നു. വെള്ളിയാഴ്ച മുതല് ന്യൂജഴ്സിയില് പരിശീലനം ആരംഭിക്കാനാണ് മെസിപ്പടയുടെ തീരുമാനം.
ലോകകപ്പ് ഫൈനലിന്റെ ഉദ്ഘാടന പരിപാടിക്കായി പരിശീലനം നടത്തുന്ന കലാകാരന്മാര്ക്കും പുകമൂടിയ അന്തരീക്ഷം വെല്ലുവിളിയായിട്ടുണ്ട്. സ്റ്റേഡിയത്തില് പരിശീലനത്തിലായിരുന്ന നര്ത്തകി കൈറ്റ്ലിന് എഡ്ഗര് ‘ശ്വാസം എടുക്കാന് പോലും ബുദ്ധിമുട്ടാണ്, വായു വളരെ ഭാരമുള്ളതായി അനുഭവപ്പെടുന്നു’ എന്ന് കുടുംബാംഗങ്ങളോട് പറഞ്ഞതായി പ്രാദേശിക മാധ്യമങ്ങള് റിപ്പോര്ട്ട് ചെയ്തു.
വായുമലിനീകരണത്തിന്റെ പ്രത്യാഘാതം ഇതിനകം മറ്റ് മത്സരങ്ങളെയും ബാധിച്ചു. ചിക്കാഗോയില് നടക്കാനിരുന്ന മേജര് ലീഗ് സോക്കര് മത്സരമായ ചിക്കാഗോ ഫയര്വാങ്കൂവര് വൈറ്റ്ക്യാപ്സ് മത്സരം മോശം വായു ഗുണനിലവാരം കാരണം മാറ്റിവെച്ചു. അതേസമയം ന്യൂയോര്ക്കില് നടന്ന വനിതാ ലീഗ് മത്സരത്തില് എയര് ക്വാളിറ്റി ഇന്ഡക്സ് ഉയര്ന്നതിനെ തുടര്ന്ന് ഓരോ പകുതിയിലും രണ്ട് അധിക വാട്ടര് ബ്രേക്കുകള് നിര്ബന്ധമാക്കിയിരുന്നു.
എന്നാല് നിലവില് ലോകകപ്പ് ഫൈനല് മാറ്റിവയ്ക്കുകയോ മത്സരക്രമത്തില് മാറ്റം വരുത്തുകയോ ചെയ്യുമെന്ന് ഫിഫ അറിയിച്ചിട്ടില്ല. വെള്ളിയാഴ്ച മുതല് വായു ഗുണനിലവാരം മെച്ചപ്പെടുമെന്നും ശനിയാഴ്ച പ്രതീക്ഷിക്കുന്ന മഴ കാട്ടുതീയുടെ പുക കുറയ്ക്കാന് സഹായിക്കുമെന്നുമാണ് കാലാവസ്ഥാ വകുപ്പിന്റെ വിലയിരുത്തല്. അതിനാല് നിലവിലെ സാഹചര്യത്തില് നിശ്ചയിച്ച സമയത്ത് തന്നെ ലോകകപ്പ് കലാശപ്പോര് നടക്കുമെന്നാണ് പ്രതീക്ഷ.
