കോഴിക്കോട്: കോഴിക്കോട് പാളയത്ത് യുവാവിനെ വീട്ടിനുള്ളില് മരിച്ച നിലയില് കണ്ടെത്തിയ സംഭവം കൊലപാതകമാണെന്ന് പൊലീസ് സ്ഥിരീകരിച്ചു. പാളയം പുതിയകോവിലകംപറമ്പ് സ്വദേശി ബിജു (പശുക്കച്ചവടക്കാരന്) ആണ് ക്രൂരമായി കൊല്ലപ്പെട്ടത്. കഴുത്തിലും ശരീരത്തിന്റെ വിവിധ ഭാഗങ്ങളിലും വെട്ടേറ്റ പാടുകളോടെയാണ് മൃതദേഹം കണ്ടെത്തിയത്.
ഇന്ന് പുലര്ച്ചെ മൂന്നുമണിയോടെയാണ് നഗരമധ്യത്തിലെ പാളയം പച്ചക്കറി മാര്ക്കറ്റിന് സമീപമുള്ള ഒറ്റമുറി വീട്ടില് രക്തത്തില് കുളിച്ച നിലയില് ബിജുവിന്റെ മൃതദേഹം കണ്ടെത്തിയത്. പശുവിനെ കറക്കാന് വിളിക്കാനെത്തിയ അമ്മ ബേബിയാണ് മകനെ മരിച്ച നിലയില് ആദ്യം കണ്ടത്. തുടര്ന്ന് വിവരം അറിയിച്ചതിനെ തുടര്ന്ന് പൊലീസ് സ്ഥലത്തെത്തി അന്വേഷണം ആരംഭിച്ചു.
പ്രാഥമിക പരിശോധനയില് കഴുത്തിനും ശരീരത്തിന്റെ വിവിധ ഭാഗങ്ങള്ക്കും ഗുരുതരമായ വെട്ടേറ്റതായി കണ്ടെത്തി. ഇന്ക്വസ്റ്റ് നടപടികള് പൂര്ത്തിയാക്കിയ ശേഷം മൃതദേഹം പോസ്റ്റ്മോര്ട്ടത്തിനായി മാറ്റി. സംഭവത്തിന് പിന്നില് ലഹരിമാഫിയയാണെന്ന് കുടുംബം ആരോപിച്ചു. സമീപത്തെ ഒരു പറമ്പ് ലഹരി സംഘങ്ങളുടെ താവളമാണെന്നും അവരുടെ പ്രവര്ത്തനങ്ങളെ ബിജു ചോദ്യം ചെയ്തിരുന്നുവെന്നും കുടുംബാംഗങ്ങള് പറയുന്നു. ഓപ്പറേഷന് തൂഫാന് നടപടികളുടെ ഭാഗമായി ലഹരി സംഘങ്ങളെക്കുറിച്ച് ബിജു പൊലീസിന് വിവരങ്ങള് കൈമാറിയിരുന്നുവെന്നും അതിന്റെ പ്രതികാരമായിരിക്കാം കൊലപാതകമെന്നുമാണ് കുടുംബത്തിന്റെ ആരോപണം.
സംഭവത്തില് നിര്ണായക സൂചനകള് ലഭിച്ചിട്ടുണ്ടെന്ന് സിറ്റി പൊലീസ് കമ്മിഷണര് എ.പി. ഷൗക്കത്തലി അറിയിച്ചു. ശാസ്ത്രീയ തെളിവുകളും സിസിടിവി ദൃശ്യങ്ങളും ഉള്പ്പെടെ പരിശോധിച്ച് അന്വേഷണം ഊര്ജിതമാക്കിയതായി പൊലീസ് അറിയിച്ചു. പ്രതികളെ ഉടന് കണ്ടെത്താനാകുമെന്നാണ് അന്വേഷണ സംഘത്തിന്റെ പ്രതീക്ഷ.
