ഗ്ലാസ്ഗോ: 2026 കോമണ്വെല്ത്ത് ഗെയിംസില് ഇന്ത്യയുടെ മെഡല് അക്കൗണ്ട് തുറന്ന് പാരാ പവര്ലിഫ്റ്റര് ജണ്ഡു കുമാര്. പുരുഷ ഹെവിവെയ്റ്റ് പാരാ പവര്ലിഫ്റ്റിംഗ് വിഭാഗത്തില് വെങ്കലം നേടിയ 29-കാരന് ഗ്ലാസ്ഗോയില് ഇന്ത്യയുടെ ആദ്യ മെഡല് സ്വന്തമാക്കി. ബിഹാറിലെ നളന്ദ സ്വദേശിയായ ജണ്ഡു, ഒരുകാലത്ത് ഇ-റിക്ഷ ഓടിച്ചും പിതാവിനെ പച്ചക്കറി കച്ചവടത്തില് സഹായിച്ചുമാണ് ജീവിതം മുന്നോട്ടുകൊണ്ടുപോയിരുന്നത്. പുരുഷ ലൈറ്റ് വെയ്റ്റ് വിഭാഗത്തില് ഇന്ത്യ മെഡല് നഷ്ടപ്പെടുത്തി നാലാം സ്ഥാനത്ത് ഫിനിഷ് ചെയ്തതിന് പിന്നാലെയായിരുന്നു ജണ്ഡുവിന്റെ തകര്പ്പന് പ്രകടനം.
ഗ്രൂപ്പ് ബി മത്സരാര്ത്ഥിയായ ജണ്ഡു രണ്ടാം ശ്രമത്തില് 190 കിലോഗ്രാം ഉയര്ത്തി 130.9 പോയിന്റുമായി ലീഡിലെത്തി. വ്യക്തിഗത മികച്ച പ്രകടനത്തേക്കാള് എട്ട് കിലോഗ്രാം കുറവായിരുന്നെങ്കിലും ആ ശ്രമം തന്നെ മെഡല് പ്രതീക്ഷ ശക്തമാക്കി. അവസാന ശ്രമത്തില് 196 കിലോഗ്രാം ഉയര്ത്തി ഗെയിംസ് റെക്കോര്ഡിലേക്ക് എത്താന് ശ്രമിച്ചെങ്കിലും ബാര് റാക്കില് തട്ടിയതോടെ ശ്രമം പരാജയമായി. തുടര്ന്ന് മത്സരിച്ച ഗ്രൂപ്പ് എയിലെ താരങ്ങള്ക്കിടയിലും ജണ്ഡുവിന്റെ സ്കോര് മറികടക്കാന് വളരെ കുറച്ചുപേര്ക്കാണ് സാധിച്ചത്.
നൈജീരിയയുടെ റിലുവാന് ഇദ്രിസ് 208 കിലോഗ്രാം ഉയര്ത്തി 132.8 പോയിന്റോടെ സ്വര്ണം നേടി. ഇംഗ്ലണ്ടിന്റെ മാത്യു ഹാര്ഡിംഗ് 199 കിലോഗ്രാം ഉയര്ത്തി 131.0 പോയിന്റോടെ വെള്ളി കരസ്ഥമാക്കി. 130.9 പോയിന്റോടെ ജണ്ഡു കുമാര് വെങ്കല മെഡല് സ്വന്തമാക്കി. സ്വര്ണവും വെള്ളിയും നേടിയ താരങ്ങളെയും ജണ്ഡുവിനെയും ഒഴികെ മറ്റാര്ക്കും 130 പോയിന്റ് കടക്കാനായില്ല. മെഡല് നേട്ടത്തിന് ശേഷം വികാരാധീനനായ ജണ്ഡു, ഇന്ത്യയുടെ ആദ്യ മെഡല് നേടാനായതില് വലിയ സന്തോഷമുണ്ടെന്ന് പ്രതികരിച്ചു.
പോളിയോ ബാധിതനായി ജനിച്ച ജണ്ഡു കുമാര് ബിഹാറിലെ നളന്ദ ജില്ലയിലെ ഹര്നൗട്ടിലാണ് വളര്ന്നത്. കുടുംബത്തിന്റെ ഉപജീവനത്തിനായി പിതാവിനൊപ്പം റോഡരികില് പച്ചക്കറി വിറ്റും കോവിഡ് കാലത്ത് ഇ-റിക്ഷ ഓടിച്ചുമാണ് ജീവിതം മുന്നോട്ടുകൊണ്ടുപോയത്. 2017-ല് പാരാ അത്ലറ്റിക്സിലൂടെയാണ് കായികരംഗത്തേക്ക് എത്തിയത്. പിന്നീട് ജിമ്മിലെ പരിശീലനത്തിനിടെയാണ് പവര്ലിഫ്റ്റിംഗിനോട് താല്പര്യം വളര്ന്നത്.
2023-ലെ ദേശീയ ചാമ്പ്യന്ഷിപ്പില് പങ്കെടുക്കാന് സ്വന്തം ഇ-റിക്ഷ വരെ വിറ്റാണ് യാത്രാചെലവ് കണ്ടെത്തിയത്. ആ മത്സരത്തില് വിജയിക്കാനായില്ലെങ്കിലും അദ്ദേഹത്തിന്റെ കഴിവ് തിരിച്ചറിഞ്ഞ പാരാലിമ്പിക് വെങ്കല മെഡല് ജേതാവ് രാജീന്ദര് സിംഗ് റാഹേലു പരിശീലനത്തിന് അവസരം നല്കി. തുടര്ന്ന് ദേശീയ റെക്കോര്ഡുകള് സ്ഥാപിച്ച ജണ്ഡു, 2025 ബെയ്ജിംഗ് ലോകകപ്പിലും 2026 ഏഷ്യ-ഒഷ്യാനിയ ചാമ്പ്യന്ഷിപ്പിലും വെങ്കലം നേടി അന്താരാഷ്ട്ര വേദിയില് ശ്രദ്ധേയനായി. ഇപ്പോള് കോമണ്വെല്ത്ത് ഗെയിംസില് ഇന്ത്യയുടെ ആദ്യ മെഡല് സമ്മാനിച്ച താരം, 2028 ലോസ് ആഞ്ചലസ് പാരാലിമ്പിക്സില് രാജ്യത്തിന് മെഡല് നേടുക എന്നതാണ് തന്റെ അടുത്ത ലക്ഷ്യമെന്ന് വ്യക്തമാക്കി.
