ആലപ്പുഴ: കേരള ക്രിക്കറ്റ് ലീഗിന്റെ (കെസിഎല്) മൂന്നാം സീസണില് ആലപ്പി റിപ്പിള്സിനെ പരിചയസമ്പന്നനായ സച്ചിന് ബേബി നയിക്കും. മുഹമ്മദ് അസ്ഹറുദ്ദീനെയാണ് ടീമിന്റെ വൈസ് ക്യാപ്റ്റനായി പ്രഖ്യാപിച്ചത്. ആഭ്യന്തര ക്രിക്കറ്റില് വര്ഷങ്ങളുടെ അനുഭവസമ്പത്തുള്ള ഇരുവരുടെയും നേതൃത്വത്തില് കിരീടപ്പോരാട്ടത്തിനാണ് ആലപ്പി റിപ്പിള്സ് ഒരുങ്ങുന്നത്.
പുതിയ സീസണിനായി കൃത്യമായ തയ്യാറെടുപ്പുകളാണ് ടീം നടത്തുന്നത്. മുഹമ്മദ് അസ്ഹറുദ്ദീനെയും ജലജ് സക്സേനയെയും നിലനിര്ത്തിയതിന് പുറമെ, 10 ലക്ഷം രൂപയ്ക്ക് സച്ചിന് ബേബിയെ ടീമിലെത്തിച്ചതും ആലപ്പിയുടെ കരുത്ത് വര്ധിപ്പിച്ചിട്ടുണ്ട്.
സച്ചിന് ബേബി, മുഹമ്മദ് അസ്ഹറുദ്ദീന്, ജലജ് സക്സേന എന്നിവരുടെ പരിചയസമ്പത്തിനൊപ്പം സിബിന് ഗിരീഷ്, അഭിജിത് പ്രവീണ് തുടങ്ങിയ യുവതാരങ്ങളും ടീമിലുണ്ട്. ആക്രമണാത്മക ബാറ്റിങ് നിരയും കരുത്തുറ്റ ഓള്റൗണ്ടര്മാരും മികച്ച ബൗളിങ് നിരയും ഒത്തുചേരുന്ന സന്തുലിത ടീമുമായാണ് ആലപ്പി റിപ്പിള്സ് ഇത്തവണ കളത്തിലിറങ്ങുന്നത്.
ആരാധകരുടെ പ്രതീക്ഷയ്ക്കൊത്ത് ഉയര്ന്ന് കെസിഎല് മൂന്നാം സീസണില് ശ്രദ്ധേയ പ്രകടനം കാഴ്ചവച്ച് കിരീടപ്പോരാട്ടത്തില് ശക്തമായ വെല്ലുവിളി ഉയര്ത്തുകയാണ് ടീമിന്റെ ലക്ഷ്യം.
