ഒറിഗണ്: ഇന്ത്യന് ജാവലിന് ത്രോയില് പുതിയ പ്രതീക്ഷയായി 19കാരന് ആശിഷ് യാദവ്. 2026 ലോക U20 ചാമ്പ്യന്ഷിപ്പില് പുരുഷ ജാവലിന് ത്രോയില് വെള്ളിമെഡല് സ്വന്തമാക്കി ആശിഷ് യാദവ് ചരിത്രനേട്ടം കുറിച്ചു. 74.09 മീറ്റര് ദൂരം കണ്ടെത്തിയ ആശിഷ്, ദക്ഷിണാഫ്രിക്കയുടെ ജാന്-ഹെന്ഡ്രിക് ഹെയ്മാന്സിന് പിന്നിലാണ് രണ്ടാം സ്ഥാനത്തെത്തിയത്. 80.50 മീറ്റര് എറിഞ്ഞാണ് ഹെയ്മാന്സ് സ്വര്ണം നേടിയത്. ഡൊമിനിക്കയുടെ ആഡിസണ് ജെയിംസ് 73.89 മീറ്ററുമായി വെങ്കലം സ്വന്തമാക്കി.
നീരജ് ചോപ്ര ലോക U20 ചാമ്പ്യന്ഷിപ്പില് ജാവലിന് ത്രോയില് സ്വര്ണം നേടിയിട്ട് കൃത്യം പത്ത് വര്ഷത്തിന് ശേഷമാണ് മറ്റൊരു ഇന്ത്യന് പുരുഷ താരം ഈ വേദിയില് മെഡല് നേടുന്നത്. 2016ല് ബൈഡ്ഗോഷില് നീരജ് നേടിയ സ്വര്ണത്തിന് പിന്നാലെ ലോക U20 ജാവലിന് പോഡിയത്തിലെത്തുന്ന രണ്ടാമത്തെ ഇന്ത്യന് താരമാണ് ആശിഷ്. മത്സരത്തിന്റെ തുടക്കത്തില് ആശിഷിന് കാര്യങ്ങള് അനുകൂലമായിരുന്നില്ല. ആദ്യ ശ്രമത്തില് 69.96 മീറ്റര് മാത്രമാണ് കണ്ടെത്തിയത്. രണ്ടാം ശ്രമം ഫൗളായതോടെ സമ്മര്ദ്ദത്തിലായ താരം മൂന്നാം ശ്രമത്തിലാണ് 74.09 മീറ്റര് എറിഞ്ഞ് രണ്ടാം സ്ഥാനത്തേക്ക് കുതിച്ചത്.
തുടര്ന്ന് 72.31, 70.62, 67.98 മീറ്റര് എന്നിങ്ങനെയായിരുന്നു താരത്തിന്റെ പ്രകടനം. 74.49 മീറ്ററാണ് ആശിഷിന്റെ വ്യക്തിഗതവും ഈ സീസണിലെയും മികച്ച ദൂരം. അതിന് തൊട്ടുതാഴെയുള്ള പ്രകടനമാണ് ലോക ചാമ്പ്യന്ഷിപ്പില് വെള്ളി മെഡലിന് വഴിയൊരുക്കിയത്. യോഗ്യതാ റൗണ്ടിലും ആശിഷ് മികച്ച പ്രകടനം നടത്തിയിരുന്നു. ഗ്രൂപ്പ് എയില് 69.87 മീറ്റര് എറിഞ്ഞ് ഒന്നാമതെത്തിയ താരം ആകെ റാങ്കിങ്ങില് ഹെയ്മാന്സിന് പിന്നില് രണ്ടാം സ്ഥാനത്തായിരുന്നു. ഇന്ത്യയുടെ മറ്റൊരു താരം ടി. ധരണീധരനും ഫൈനലില് ശ്രദ്ധേയമായ പ്രകടനം നടത്തി. 72.35 മീറ്ററാണ് അഞ്ചാം റൗണ്ടില് കണ്ടെത്തിയത്. ഇതോടെ ആറാം സ്ഥാനത്താണ് മത്സരം പൂര്ത്തിയാക്കിയത്.
2016ല് നീരജ് ചോപ്ര സ്ഥാപിച്ച 86.48 മീറ്റര് ലോക U20 റെക്കോര്ഡ് ഇന്നും ചാമ്പ്യന്ഷിപ്പ് റെക്കോര്ഡായി തുടരുന്നു. ഒളിമ്പിക്സ്, ലോക ചാമ്പ്യന്ഷിപ്പ്, ഡയമണ്ട് ലീഗ് തുടങ്ങി ലോക വേദികളിലെല്ലാം ചരിത്രം കുറിച്ച നീരജിന് പിന്നാലെ പുതിയ താരങ്ങള് ഉയര്ന്നുവരുന്നതാണ് ഇന്ത്യന് ജാവലിന് ത്രോയ്ക്ക് വലിയ പ്രതീക്ഷ നല്കുന്നത്.
