ഇക്സാന്: പരിക്കിന് ശേഷം തിരിച്ചെത്തിയ ഇന്ത്യന് ബാഡ്മിന്റണ് താരം അശ്മിത ചാലിഹയുടെ സ്വപ്നതുല്യമായ തിരിച്ചുവരവ് തുടരുന്നു. കൊറിയ മാസ്റ്റേഴ്സ് സൂപ്പര് 300 ബാഡ്മിന്റണ് ടൂര്ണമെന്റില് ഫൈനലിലെത്തി അശ്മിത പുതിയ ചരിത്രം കുറിച്ചു. ലോക ടൂര് സിംഗിള്സ് വിഭാഗത്തില് കരിയറിലെ ആദ്യ ഫൈനലാണ് 26കാരിയായ താരം സ്വന്തമാക്കിയത്. സെമിഫൈനലില് കൗമാരതാരം രാക്ഷിത രാംരാജിനെ മൂന്ന് ഗെയിം നീണ്ട പോരാട്ടത്തിനൊടുവില് 21-13, 16-21, 21-13 എന്ന സ്കോറിനാണ് അശ്മിത കീഴടക്കിയത്. 48 മിനിറ്റ് നീണ്ട മത്സരത്തില് തുടക്കം മുതല് ആക്രമണാത്മകമായ സമീപനമാണ് അശ്മിത സ്വീകരിച്ചത്.
ആദ്യ ഗെയിമില് 2-2 എന്ന നിലയില് നിന്ന് 6-2ലേക്ക് മുന്നേറിയ അശ്മിത പിന്നീട് തുടര്ച്ചയായി അഞ്ച് പോയിന്റുകള് സ്വന്തമാക്കി 13-6ന്റെ ലീഡ് നേടി. രാക്ഷിതയ്ക്ക് തിരിച്ചുവരവിന് അവസരം നല്കാതെ 21-13ന് ഗെയിം സ്വന്തമാക്കി. എന്നാല് രണ്ടാം ഗെയിമില് രാക്ഷിത ശക്തമായ തിരിച്ചുവരവ് നടത്തി. 4-1ന് മുന്നിലെത്തിയ താരം പിന്നീട് 8-3ലേക്ക് ലീഡ് ഉയര്ത്തി. അശ്മിത തിരിച്ചടിക്കാന് ശ്രമിച്ചെങ്കിലും ചില അനാവശ്യ പിഴവുകള് തിരിച്ചടിയായി. 12-13 വരെ അശ്മിത എത്തിയെങ്കിലും രാക്ഷിത വീണ്ടും നിയന്ത്രണം ഏറ്റെടുത്തു. ഒടുവില് 21-16ന് രണ്ടാം ഗെയിം സ്വന്തമാക്കി മത്സരം നിര്ണായകമായ മൂന്നാം ഗെയിമിലേക്ക് നീട്ടി.
മൂന്നാം ഗെയിമില് അശ്മിത തന്റെ മികവ് പൂര്ണമായി പുറത്തെടുത്തു. മൂന്ന് മികച്ച സ്മാഷുകളിലൂടെ 9-1ന്റെ വമ്പന് ലീഡ് നേടിയ താരം ഇടവേളയില് 11-3ന് മുന്നിലായിരുന്നു. രാക്ഷിത തിരിച്ചുവരാന് ശ്രമിച്ചെങ്കിലും അശ്മിത സമ്മര്ദ്ദം കൈവിടാതെ മുന്നേറി. 18-9ന് മുന്നിലെത്തിയ അശ്മിതയ്ക്ക് തുടര്ച്ചയായ മത്സര പോയിന്റുകളും ലഭിച്ചു. രണ്ട് അവസരങ്ങള് നഷ്ടപ്പെടുത്തിയെങ്കിലും രാക്ഷിതയുടെ ഷോട്ട് പുറത്തേക്ക് പോയതോടെ അശ്മിത വിജയം ഉറപ്പിച്ചു.
വലത് കാല്മുട്ടിലെ മീഡിയല് മെനിസ്കസ് പരിക്കിനെ തുടര്ന്ന് മൂന്ന് മാസത്തോളം മത്സരങ്ങളില് നിന്ന് വിട്ടുനിന്ന ശേഷമാണ് അശ്മിത മേയില് വീണ്ടും കോര്ട്ടിലെത്തിയത്. തിരിച്ചുവരവിന് പിന്നാലെ തന്നെ മികച്ച പ്രകടനങ്ങളാണ് താരം കാഴ്ചവയ്ക്കുന്നത്. മക്കാവു ഓപ്പണില് സെമിഫൈനലിലെത്തിയ അശ്മിത കൊറിയ മാസ്റ്റേഴ്സില് ക്വാര്ട്ടര് ഫൈനലില് ജപ്പാന്റെ ഒന്നാം സീഡും ലോക 22-ാം റാങ്കുകാരിയുമായ ഹിന അകെച്ചിയെയും അട്ടിമറിച്ചിരുന്നു. ഇപ്പോള് ലോക 50-ാം റാങ്കിലുള്ള അശ്മിത ദേശീയ മികവിന്റെ കേന്ദ്രമായ ഗുവാഹത്തിയിലെ നാഷണല് സെന്റര് ഓഫ് എക്സലന്സിലാണ് പരിശീലനം നടത്തുന്നത്. പാര്ക്ക് തേ-സാങിന്റെ കീഴിലാണ് പരിശീലനം.
ഫൈനലില് നാലാം സീഡായ ചൈനയുടെ ഹാന് ക്വാന്സിയെയാണ് അശ്മിത നേരിടുക. ലോക 35-ാം റാങ്കുകാരിയായ ഹാന് സെമിഫൈനലില് 22-20, 18-21, 21-14 എന്ന സ്കോറിന് വിജയം നേടിയാണ് ഫൈനലില് കടന്നത്. കരിയറിലെ ആദ്യ ബി.ഡബ്ല്യു.എഫ് ലോക ടൂര് സിംഗിള്സ് ഫൈനലിനിറങ്ങുന്ന അശ്മിതയ്ക്ക് കിരീടം സ്വന്തമാക്കാനായാല് അത് തിരിച്ചുവരവിന്റെ ഏറ്റവും വലിയ നേട്ടമായി മാറും. അശ്മിതയുടെ ഫൈനല് പ്രവേശനം ഇന്ത്യന് ബാഡ്മിന്റണിനും വലിയ നേട്ടമാണ്. തുടര്ച്ചയായ രണ്ടാം ആഴ്ചയാണ് ഒരു ഇന്ത്യന് വനിതാ സിംഗിള്സ് താരം ബി.ഡബ്ല്യു.എഫ് ലോക ടൂര് ഫൈനലിലെത്തുന്നത്. കഴിഞ്ഞ ഞായറാഴ്ച തായ്പെയ് ഓപ്പണില് തന്വി ശര്മ കിരീടം നേടിയിരുന്നു.
