കൊളംബോ: ശ്രീലങ്കയ്‌ക്കെതിരായ ടെസ്റ്റ് പരമ്പരയ്‌ക്കുള്ള ഇന്ത്യന്‍ ടീമില്‍ സര്‍ഫറാസ് ഖാനെ ഉള്‍പ്പെടുത്തി. പരിക്കിനെ തുടര്‍ന്ന് സായ് സുദര്ശന് പരമ്പരയില്‍ നിന്ന് പുറത്തായതോടെയാണ് സര്‍ഫറാസിന് വീണ്ടും ദേശീയ ടീമിലേക്ക് വിളിയെത്തിയത്. ഇടവേളയ്‌ക്കുശേഷമുള്ള തിരിച്ചുവരവില്‍ ടീമില്‍ തന്റെ സ്ഥാനം ഉറപ്പിക്കാനുള്ള വലിയ അവസരമാണ് താരത്തിന് മുന്നിലുള്ളത്. കാലിനേറ്റ പരിക്കിനെ തുടര്‍ന്ന് സായ് സുദര്ശന് ബെംഗളൂരുവിലെ ബിസിസിഐ സെന്റര്‍ ഓഫ് എക്‌സലന്‍സില്‍ ചികിത്സയും പരിശീലനവും തുടരുകയാണ്. ആദ്യ ടെസ്റ്റിന് മുമ്പ് താരം പൂര്‍ണ ഫിറ്റ്‌നസ് വീണ്ടെടുക്കുമെന്നായിരുന്നു ടീം മാനേജ്‌മെന്റിന്റെ പ്രതീക്ഷ. എന്നാല്‍ പരമ്പര പൂര്‍ണമായി നഷ്ടമാകുമെന്ന് വ്യക്തമായതോടെയാണ് പകരക്കാരനെ കണ്ടെത്തിയത്.
2024-25 സീസണിലെ ബോര്‍ഡര്‍-ഗാവസ്‌കര്‍ ട്രോഫിക്ക് ശേഷം ഇതാദ്യമായാണ് സര്‍ഫറാസ് ഇന്ത്യന്‍ ടെസ്റ്റ് ടീമില്‍ തിരിച്ചെത്തുന്നത്. ഇന്ത്യക്കായി ഇതുവരെ ആറ് ടെസ്റ്റുകള്‍ കളിച്ച താരം 37.10 ശരാശരിയില്‍ 317 റണ്‍സ് നേടിയിട്ടുണ്ട്. മൂന്ന് അര്‍ധസെഞ്ച്വറികളും താരത്തിന്റെ പേരിലുണ്ട്. രഞ്ജി ട്രോഫിയില്‍ കഴിഞ്ഞ കുറച്ച് സീസണുകളിലായി സ്ഥിരതയാര്‍ന്ന പ്രകടനമാണ് സര്‍ഫറാസ് പുറത്തെടുത്തത്. ഫസ്റ്റ് ക്ലാസ് ക്രിക്കറ്റില്‍ 62 മത്സരങ്ങളില്‍ നിന്ന് 64.73 എന്ന മികച്ച ബാറ്റിങ് ശരാശരിയും താരത്തിനുണ്ട്.
സര്‍ഫറാസിന്റെ തിരിച്ചുവരവില്‍ ഫിറ്റ്‌നസും നിര്‍ണായകമായി. നേരത്തെ ഫിറ്റ്‌നസിന്റെ പേരില്‍ വിമര്‍ശനം നേരിട്ടിരുന്ന താരം ഈ വര്‍ഷം കഠിന പരിശീലനത്തിലൂടെ ശരീരഭാരം കുറച്ച് മികച്ച ഫിറ്റ്‌നസ് നിലയിലെത്തിയിരുന്നു. സായ് സുദര്ശന് പകരക്കാരനായി സര്‍ഫറാസ് ഖാനും ഷെയ്ഖ് റഷീദും ബിസിസിഐയുടെ പരിഗണനയിലുണ്ടായിരുന്നു. ഫിറ്റ്‌നസ് പരിശോധനകള്‍ക്കായി സര്‍ഫറാസ് ഒരാഴ്ചയായി ബെംഗളൂരുവിലെ സെന്റര്‍ ഓഫ് എക്‌സലന്‍സില്‍ തുടരുകയായിരുന്നു.
സ്പിന്‍ ബൗളിങ്ങിനെ ഫലപ്രദമായി നേരിടാനുള്ള സര്‍ഫറാസിന്റെ കഴിവും ടീമിലേക്ക് തിരിച്ചുവിളിക്കുന്നതില്‍ നിര്‍ണായകമായി. നേരത്തെ ഇന്ത്യക്കായി ടെസ്റ്റ് ക്രിക്കറ്റില്‍ കളിച്ചിട്ടുള്ളതിനാല്‍ അന്താരാഷ്‌ട്ര തലത്തിലെ അനുഭവസമ്പത്തും താരത്തിന് ഗുണകരമാണ്. ടീം ക്യാംപിലേക്ക് വേഗത്തില്‍ ഇണങ്ങാനും താരത്തിന് സാധിക്കും. ശ്രീലങ്കയിലെ സാഹചര്യങ്ങളില്‍ സ്പിന്നര്‍മാരെ നേരിടേണ്ടിവരുന്ന ടെസ്റ്റ് പരമ്പരയില്‍ സര്‍ഫറാസിന്റെ ബാറ്റിങ് മികവ് ഇന്ത്യക്ക് ഉപകാരപ്പെടുമെന്നാണ് വിലയിരുത്തല്‍.
നീണ്ട ഇടവേളയ്‌ക്ക് ശേഷം ലഭിച്ച അവസരം മികച്ച പ്രകടനത്തിലൂടെ മുതലാക്കാനായാല്‍ ഇന്ത്യന്‍ ടെസ്റ്റ് ടീമിലെ തന്റെ സ്ഥാനം വീണ്ടും ഉറപ്പിക്കാനുള്ള നിര്‍ണായക ചുവടുവയ്പ്പാകും സര്‍ഫറാസിന് ശ്രീലങ്കന്‍ പരമ്പര.
